01st Apr2021

3 ກະຊວງ ເຂົ້າຊົມຫໍພິພິທະພັນ ປກສ ເນື່ອງໃນໂອກາດ ວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 60 ປີ

by somchan

ໃນວັນທີ 30 ມີນາ 2021 ກະຊວງອຸດສາຫະກໍາ ແລະ ການຄ້າ ນໍາໂດຍ ທ່ານ ປອ ບົວວັນ ວິລາວົງ ຫົວຫນ້າກົມອຸດສາຫະກໍາ ແລະ ຫັດຖະກໍາ ພ້ອມດ້ວຍຄະນະ, ກະຊວງພາຍໃນ ນໍາໂດຍ ທ່ານ ເພັດສະຫມອນ ເພັດພູວົງ ຫົວຫນ້າພະແນກກວດສໍານວນເອກະສານລັດຖະກອນ,ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ນໍາໂດຍ ທ່ານ ລຽນໄຊ ບຸນມະນີລັດ ຮອງຫົວໜ້າຫ້ອງການກະຊວງ ພ້ອມດ້ວຍຄະນະ ໄດ້ເຂົ້າຊົມຫໍພິພິທະພັນປ້ອງກັນຄວາມສະຫງົບ ເນື່ອງໃນໂອກາດວັນສ້າງຕັ້ງກໍາລັງປ້ອງກັນ ຄວາມສະຫງົບ ຄົບຮອບ 60 ປີ.

ການເຂົ້າຊົມຫໍພິພິທະພັນປ້ອງກັນຄວາມສະຫງົບຄັ້ງນີ້ ຄະນະຮັບຜິດຊອບໄດ້ອະທິບາຍ ແລະ ຍົກໃຫ້ເຫັນເຖິງການກໍາເນີດເຕີບໃຫຍ່ຂອງກໍາລັງປ້ອງກັນຄວາມສະຫງົບ ຕະຫຼອດໄລຍະ 60 ປີ, ຜ່ານທາງຮູບພາບ ແລະ ວັດຖຸພັນ ທີ່ຈັດວາງສະແດງພາຍໃນຫໍພິພິທະພັນ ທີ່ເປັນການສະແດງເຖີງຄວາມຮັ່ງມີສວຍງາມຂອງປະເທດລາວ,ຄວາມອົງອາດກ້າຫານຂອງບັນພະບູລຸດ ແລະ ປະຊາຊົນລາວ ບັນດາເຜົ່າ ແລະການກໍາເນີດເກີດຂື້ນຂອງກໍາລັງປ້ອງກັນຄວາມສະຫງົບປະຊາຊົນ

ການເຂົ້າຢ້ຽມຊົມຫໍພິພິທະພັນ ປ້ອງກັນຄວາມສະຫງົບ ທັງ 3 ຄະນະໃນຄັ້ງນີ້ ກໍ່ເພື່ອສະແດງຄວາມຮູ້ບຸນຄຸນຕໍ່ການນໍາ ພັກ-ລັດ ທີ່ໄດ້ເສຍສະຫລະ ເຫລືອດເນື້ອເຫື່ອແຮງຕໍ່ສູ້ເພື່ອປົດປ່ອຍປະເທດຊາດ, ເປັນຄວາມເອກອ້າງທະນົງໃຈຕໍ່ມູນເຊື້ ກຽດສັກສີ ຂອງກໍາລັງປ້ອງກັນຄວາມສະຫງົບ ທີ່ມີມູນເຊື້ອກ້າຫານຕໍ່ສູ້ບໍ່ຍອມຈໍານົນ, ພ້ອມທັງ ຈະນຳເອົາມູນເຊື້ອທີ່ດີງາມ ມາສືບຕໍ່ປະຕິບັດເຂົ້າໃນວຽກງານວິຊາສະເພາະ ໃນການພັດທະນາ ແລະ ສ້າງສາປະເທດຊາດ ໃຫ້ມີຄວາມຈະເລີນຮຸ່ງເຮືອງ.

 

Off

Comments are closed.