04th Apr2021

ການນຳກະຊວງ ປກສ ວາງພວງມະລາ ແລະກະຕ່າດອກໄມ້ ເນື່ອງໃນໂອກາດວັນສ້າງຕັ້ງກຳລັງ ປກສ ຄົບຮອບ 60 ປີ

by somchan

ຕອນເຊົ້າວັນທີ 4 ເມສາ 2021 ນີ້ ການນຳກະຊວງປ້ອງກັນຄວາມສະຫງົບ ນຳໂດຍ ພົນໂທ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ ເລຂາອົງຄະນະພັກກະຊວງ ລັດຖະມົນຕີ ກະຊວງ ປກສ ໄດ້ເຂົ້າວາງພວງມະລາ ຢູ່ທີ່ອະນຸສາວະລີນັກຮົບນິລະນາມ ນະຄອນຫລວງວຽງຈັນ ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ທີ 5 ເມສາ ຄົບຮອບ 60 ປີ ເພື່ອສະແດງຄວາມເຄົາລົບຮັກຄວາມກະຕັນຍູ້ຮູ້ບຸນຄຸນ ເຖິງຄຸນງາມຄວາມດີ ແລະນຳ້ໃຈຕໍ່ສູ້ຢ່າງພິລະອາດຫານ ແລະບໍ່ຍອມຈຳນົນຂອງບັນພະບູລຸດລາວກໍ່ຄືນັກຮົບປະຕິວັດ ທີ່ໄດ້ເສຍສະຫລະຊີວິດເລືອດເນື້ອ ເພື່ອປະເທດຊາດ ແລະປະຊາຊົນຢ່າງອົງອາດກ້າຫານ ພາຍໃຕ້ການຊີ້ນຳນຳພາຂອງພັກປະຊາຊົນ ປະຕິວັດລາວ ຈົນໄດ້ຮັບໄຊຊະນະ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ເຊິ່ງຄຸນງາມຄວາມດີ ແລະຜົນງານອັນໃຫຍ່ຫລວງ ດັ່ງກ່າວ ໄດ້ຖືກຈາລຶກໄວ້ໃນຊີວິດຈິດໃຈຂອງທົ່ວປວງຊົນລາວທັງຊາດຕະຫລອດໄປ.

ຈາກນັ້ນ ພົນໂທ ວິໄລ ຫລ້າຄຳຟອງ ພ້ອມດ້ວຍຄະນະ ໄດ້ເດີນທາງໄປທີ່ຫໍພິພິຕະພັນໄກສອນ ພົມວິຫານ ເພື່ອວາງກະຕ່າດອກໄມ້ຕໍ່ຫນ້າຮູບປັ້ນຫລໍ່ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເພື່ອເປັນການສະແດງຄວາມກະຕັນຍູ້ ຮູ້ບຸນຄຸນ ທີ່ໄດ້ສຸມສະຕິປັນຍາເຫືອແຮງເຂົ້າໃນຂະບວນການຕໍ່ສູ້ຕ້ານການຮຸກຮານຂອງຈັກກະພັດຕ່າງດ້າວ ສາມາດຍາດໄດ້ໄຊຊະນະ ນຳເອົາຄວາມຢູ່ເຢັນເປັນສຸກ ມາສູ່ປະຊາຊົນລາວບັນດາເຜົ່າ ຊຶ່ງຜົນງານ ແລະຄວາມດີຂອງທ່ານທີ່ໄດ້ຈາລືກໄວ້ໃນຄວາມສົງຈື່ຂອງປະຊາຊົນລາວບັນດາເຜົ່າຕະຫລອດກາລະນານ

Off

Comments are closed.