05th Apr2021

ພິທີໂຮມຊຸມນຸມເນື່ອງໃນໂອກາດສະເຫຼີມສະຫຼອງວັນສ້າງຕັ້ງກຳລັງ ປກສ ທີ 5 ເມສາ ຄົບຮອບ 60 ປີ

by somchan

ພິທີໂຮມຊຸມນຸມ ເພື່ອຫວນຄືນມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ, ຜົນງານການເຄື່ອນໄຫວປະຕິບັດໜ້າທີ່ ຂອງກໍາລັງປ້ອງກັນຄວາມສະຫງົບ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ ຢູ່ທີ່ສະໂມສອນຂອງກະຊວງປ້ອງກັນຄວາມສະຫງົບ  ໃນວັນທີ 5 ເມສາ 2021 ນີ້ ; ໂດຍການໃຫ້ກຽດເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ພ້ອມດ້ວຍບັນດາການນຳພັກ-ລັດ, ຄະນະພັກ-ຄະນະນໍາກະຊວງ ປກສ, ພະນັກງານ-ນັກຮົບປະຕິວັດອາວຸໂສບໍານານ, ຄະນະພັກ-ຄະນະບັນຊາ ບັນດາກົມກອງອ້ອມຂ້າງກະຊວງ, ປກສ ນະຄອນຫຼວງວຽງຈັນ, ປກສ ບັນດາແຂວງທົ່ວປະເທດ ແລະ ແຂກຖືກເຊີນເຂົ້າຮ່ວມ.

ໃນພິທີ ພົທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ຫວນຄືນມູນເຊື້ອ, ຜົນງານທີ່ພົ້ນເດັ່ນຂອງກໍາລັງປ້ອງກັນຄວາມສະຫງົບ ວ່າ: ກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດປະຕິວັດ ທີ່ສືບທອດມາຈາກກໍາລັງສັນຕລາດ ປີ 1954 ເຊິ່ງແມ່ນພັກປະຊາຊົນປະຕິວັດລາວເປັນຜູ້ສ້າງຕັ້ງ, ສຶກສາອົບຮົມ, ນໍາພາເດັດຂາດ, ໂດຍກົງຮອບດ້ານ; ເປັນກໍາລັງທີ່ຈົງຮັກພັກດີ, ບໍລິສຸດສັດຊືຕໍ່ປະເທດຊາດ, ຕໍ່ປະຊາຊົນຢ່າງແທ້ຈິງ; ພັກຍາມໃດກໍ່ຖືເອົາວຽກງານປ້ອງກັນຄວາມສະຫງົບເປັນຫນຶ່ງໃນວຽກງານຍຸດທະສາດສໍາຄັນ ແລະ ເປັນວຽກງານແຖວຫນ້າຢູ່ສະເຫມີ. ໃນນີ້ ກໍາລັງປ້ອງກັນຄວາມສະຫງົບປະຊາຊົນ ໄດ້ເປັນເຈົ້າການຊອກຮູ້, ກໍາແຫນ້ນສະພາບກົນອຸບາຍຂອງສັດຕູ ແລະ ມີວິທີການ, ມາດຕະການອັນເດັດຂາດໃນ ການແກ້ໄຂບັນດາປັດໃຈຫນໍ່ແຫນງກໍ່ຄວາມບໍ່ສະຫງົບວຸ້ນວາຍ, ກໍ່ການຈະລາຈົນ, ເລີກຮື້ກໍາລັງໃຕ້ດິນ, ນັກສືບສອດແນມ, ພວກກອງປຸ້ນ ທັງຂົນຂວາຍໃຫ້ພວກກອງປຸ້ນອອກມາຍອມ, ແກ້ໄຂພວກນັກເລງອັນຕະພານຢູ່ບັນດາຕົວເມືອງໃຫຍ່ ແລະ ບາງບໍລິເວນ ເປັນຕົ້ນແກ້ໄຂການກະກຽມເດີນຂະບວນປະທ້ວງຕ້ານລະບອບໃຫມ່ຂອງພັກຮ່ວມສໍາພັນ ທີ່ມີກໍາລັງພົນ 200 ກວ່າຄົນ ພ້ອມທັງອາວຸດ, ຕົ້ນປີ 1977 ກໍາລັງປ້ອງກັນຄວາມສະຫງົບ ໄດ້ປະສານສົມທົບແຫນ້ນກັບກໍາລັງປ້ອງກັນຊາດ, ອໍານາດການປົກຄອງແຂວງຈຸດສູມເຂດໃຈກາງສາມາດແກ້ໄຂບັນດາປັດໃຈຫນໍ່ແຫນງກໍ່ຄວາມບໍ່ສະຫງົບ ໄດ້ຢ່າງທັນການ ເປັນຕົ້ນການ ເກາະຜິດ, ການລ່ວງລໍ້າ ແລະ ຢຶດຄອງດິນແດນຂອງພວກປະຕິການຂວາຈັດໄທ ຢູ່ບາງເກາະດອນຕາມລໍາແມ່ນ້ໍາຂອງ ແລະ ບາງບໍລິເວນຕາມຊາຍແດນລາວ-ໄທ ຄື: ຢູ່ດອນຊິງຊູ້, ຫາດດອນຈັນ, ດອນຮຽງ, ດອນຕ່ໍາ, ດອນສັງຄີ, ປີ 1984 ກໍາລັງປ້ອງກັນຄວາມສະຫງົບ ຮ່ວມກັບກອງທັບ ຕໍ່ສູ້ເອົາຊະນະການບຽດຢຶດຂອງປະຕິການຂວາຈັດໄທຢູ່ສະຫນາມຮົບ 3 ຫມູ່ບ້ານຄື: ບ້ານໃຫມ່, ບ້ານກາງ ແລະ ບ້ານສະຫວ່າງ ເມືອງປາກລາຍ ປັດຈຸບັນຂຶ້ນກັບເມືອງທົ່ງມີ ໄຊ ແຂວງໄຊຍະບູລີ, ເລີກຮື້ພວກກອງຫຸ້ນຢູ່ລຽບຕາມເສັ້ນທາງເລກ 13 ເຫນືອ, ເສັ້ນທາງເລກ 7 ແລະ ທາງເລກ 8; ວັນທີ 14 ມິຖຸນາ 1992 ກໍາລັງປ້ອງກັນຄວາມສະຫງົບ ສົມທົບກັບກໍາລັງປ້ອງກັນຊາດ ຕໍ່ສູ້ຕ້ານການບຽດຍຶດຂອງພວກປະຕິການລາວພັດຖິ່ນ 200 ກວ່າຄົນ ຢູ່ດ່ານບ້ານວັງ, ເມືອງຊະນະຄາມ, ກໍາລັງປ້ອງກັນຄວາມສະຫງົບ ໄດ້ກາຍເປັນກໍາລັງຕົ້ນຕໍເຮັດຫນ້າທີ່ກໍ່ສ້າງຮາກຖານການເມືອງ ໄດ້ເຮັດຫນ້າທີ່ປູກລູກຂົນຂວາຍ ກໍ່ສ້າງຮາກຖານການເມືອງພັດທະນາຊົນນະບົດ ຮອບດ້ານ, ຂະບວນການສ້າງບ້ານ ແລະ ຄອບຄົວປ້ອງກັນຄວາມສະຫງົບ, ເພື່ອນໍາເອົາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງພັກ-ລັດ ຫັນໄປສູ່ປະຊາຊົນບັນດາເຜົ່າ ໃຫ້ມີຄວາມຮັບຮູ້-ເຂົ້າໃຈ, ຍົກສູງສະຕິຊາດເປັນເຈົ້າການຮັກສາຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ; ເປັນຕົ້ນປັບປຸງຄຸນນະພາບການຄຸ້ມຄອງສໍາມະໂນຄົວເຂົ້າສູ່ລະບຽບແບບແຜນ, ອອກບັດປະຈໍາຕົວ, ຄຸ້ມຄອງອາຊີບ ແລະ ພາຫະນະພິເສດ, ອາວຸດປືນ, ກາປະທັບ ແລະ ອື່ນໆ ດ້ວຍການນໍາໃຊ້ ລະບົບເຕັກນິກ-ເຕັກໂນໂລຊີທີ່ທັນສະໄຫມເທື່ອລະກ້າວ, ປັບປຸງກໍາລັງປ້ອງກັນຄວາມສະຫງົບກຸ່ມບ້ານ ແລະ ປ້ອງກັນຄວາມສະຫງົບບ້ານ ໃຫ້ເຄື່ອນໄຫວຕາມພາລະບົດບາດ ແລະ ຂອບເຂດສິດຫນ້າທີ່ຂອງຕົນຫຼາຍຂຶ້ນໃນຂອບເຂດທົ່ວປະເທດ; ມາຮອດປັດຈຸບັນສາມາດສ້າງບ້ານປ້ອງກັນຄວາມສະຫງົບດີໄດ້ 8.113 ບ້ານ ຈາກ 8.455 ບ້ານ ໃນທົ່ວປະເທດ, ກວມ 96,96%; ບ້ານປອດຄະດີ 6.549 ບ້ານ, ກວມ 77,46%; ບ້ານປອດຢາເສບຕິດ 5.927 ບ້ານ, ກວມ 70,10%; ຂຶ້ນທະບຽນສໍາມະໂນຄົວລາວສໍາເລັດແລ້ວ 1.293.642 ຄອບຄົວ, ຕ່າງດ້າວ 4.057 ຄອບຄົວ, ໃນຈໍານວນ 1.318.858 ຄອບຄົວ ໃນທົ່ວປະເທດ. ກໍາລັງປ້ອງກັນຄວາມສະຫງົບ ໄດ້ປະກອບພາຫະນະ, ອຸປະກອນເຕັກນິກ-ເຕັກໂນໂລຊີ, ອາວຸດຍຸດໂທປະກອນ, ຢາປິ່ນປົວພະຍາດ-ອຸປະກອນການແພດ ທີ່ທັນສະໄຫມໃຫ້ມີຄວາມຮັບປະກັນ ແລະ ດີຂຶ້ນເທື່ອລະກ້າວ ເພື່ອຮັບໃຊ້ເຂົ້າໃນການປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ;  ກໍາລັງປ້ອງກັນຄວາມສະຫງົບ ໄດ້ຕັ້ງຫນ້າຜັນຂະຫຍາຍແນວທາງການຕ່າງປະເທດຂອງພັກ ໃນຂົງເຂດປ້ອງກັນຄວາມສະຫງົບ ຢ່າງຖືກຕ້ອງຕາມທິດ “ເພີ່ມມິດ ຫຼຸດຜ່ອນສັດຕູ”, ໂດຍປະຕິບັດຕາມແນວທາງແຜນນະໂຍບາຍຂອງພັກ ກ່ຽວກັບການພົວພັນຮ່ວມມືກັບຕ່າງປະເທດຕາມ 5 ຫຼັກການຄື: ສັນຕິພາບ, ເອກະລາດ, ມິດຕະພາບ, ບໍ່ແຊກແຊງເຂົ້າໃນກິດຈະການພາຍໃນເຊິ່ງກັນ ແລະ ກັນ, ການພົວພັນຮ່ວມມືແບບສະເຫມີພາບ ແລະ ຕ່າງຝ່າຍຕ່າງມີຜົນປະໂຫຍດ. ທັງຕໍ່ສູ້, ທັງດຶງດູດ, ຍາດແຍ່ງເອົາການສະຫນັບສະຫນູນ-ການຊ່ວຍເຫຼືອທາງດ້ານການເມືອງ ກໍ່ຄືທາງດ້ານບົດຮຽນ ກໍ່ສ້າງກໍາລັງ, ດ້ານວັດຖຸອຸປະກອນເຕັກນິກຕ່າງໆ.

ດ້ວຍຜົນງານ ແລະ ຄຸນງາມຄວາມດີດັ່ງກ່າວມານັ້ນ, ພັກ-ລັດຖະບານ ແລະ ປະຊາຊົນລາວບັນດາເຜົ່າ ໄດ້ຍ້ອງຍໍ ສັນລະເສີນຢ່າງສົມກຽດ, ມອບນາມມະຍົດໃຫ້ກໍາລັງປ້ອງກັນຄວາມສະຫງົບວ່າ: “ເປັນກໍາລັງປະກອບອາວຸດທີ່ຫນັກແຫນ້ນ, ແຫຼມຄົມ ແລະ ໄວ້ເນື້ອເຊື່ອໃຈທີ່ສຸດຂອງພັກ; ຈົງຮັກພັກດີຕໍ່ພັກ, ຕໍ່ປະຊາຊົນລາວບັນດາເຜົ່າ, ສົມແລ້ວເປັນກໍາລັງປະກອບອາວຸດວິລະຊົນ ຂອງຊາດລາວວິລະຊົນ”. ປະດັບຫຼຽນຄໍາແຫ່ງຊາດໃຫ້ກະຊວງປ້ອງກັນຄວາມສະຫງົບ 04 ຫນ່ວຍ; ໃນນີ້ ໄດ້ຮັບການຍ້ອງຍໍຫຼຽນຄໍາແຫ່ງຊາດຈາກພັກ-ລັດຖະບານແຫ່ງ ສສ ຫວຽດນາມ 01 ຫນ່ວຍ, ມອບຫຼຽນໄຊ-ຫຼຽນກາລວມທັງຫມົດ 19 ຫນ່ວຍ, ທຸງໄຊ 02 ຜືນ; ມອບຫຼຽນໄຊ-ຫຼຽນກາໃຫ້ກໍາລັງປ້ອງກັນຄວາມສະຫງົບລວມທັງຫມົດ 78.879 ຫນ່ວຍ ແລະ ໃບຍ້ອງຍໍຈໍານວນ 73.749 ໃບ; ປະເພດຫຼຽນໄຊ ແລະ ຫຼຽນກາມິດຕະພາບ ຈໍານວນ 803 ຫນ່ວຍ ແລະ ມີຫຼາຍກົມກອງເຫຼົ່າວິຊາສະເພາະ, ມີນາຍ ແລະ ພົນຕໍາຫຼວດຫຼາຍສະຫາຍທີ່ໄດ້ຮັບການຍ້ອງຍໍສັນລະເສີນຈາກພັກ ແລະ ລັດຖະບານຢ່າງສົມກຽດເຊັ່ນ: ວິລະຊົນແຫ່ງຊາດມີ 4 ທ່ານ, ໄດ້ຮັບນາມມະຍົດເປັນນັກຮົບ ແຂ່ງຂັນ 13 ທ່ານ.

ຈາກນັ້ນ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ໄດ້ກ່າວສູນທອນພົດຕໍ່ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ ຄັ້ງນີ້ວ່າ:

ໃນໂອກາດທີ່ມີຄວາມຫມາຍສໍາຄັນນີ້ ສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ຍັງໄດ້ຮ່ວມກັບບັນດາການນໍາພັກ-ລັດ, ຄະນະພັກ-ຄະນະນຳກະຊວງປ້ອງກັນຄວາມສະຫງົບ, ພະນັກງານ-ນັກຮົບ ປະຕິວັດອາວຸໂສບຳນານ, ຄະນະພັກ-ຄະນະບັນຊາ ບັນດາກົມກອງອ້ອມຂ້າງກະຊວງ ປກສ, ປກສ ນະຄອນຫຼວງວຽງຈັນ, ປກສ ແຂວງທົ່ວປະເທດ ແລະ ແຂກຖືກເຊີນ ຈາກພາກສ່ວນຕ່າງໆ ເຂົ້າຮ່ວມພິທີປ່ອຍປາ ຕື່ມອີກ.

 

Off

Comments are closed.