06th Apr2021

ມອບ-ຮັບໂຄງການກໍ່ສ້າງລະບົບສູນຝຶກວິຊາສະເພາະຕຳຫຼວດປ້ອງກັນທີ່ຕັ້ງ

by somchan

ພິທີມອບ-ຮັບໂຄງການກໍ່ສ້າງລະບົບສູນຝຶກວິຊາສະເພາະຕຳຫຼວດປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ໄດ້ຈັດຂື້ນໃນວັນທີ 6 ເມສາ 2021 ນີ້ ໂດຍການເຂົ້າຮ່ວມເປັນກຽດຂອງ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ນາງ ສຸນັດຕາ ລິດປັນຍາ ປະທານບໍລິສັດປັນຍາອອກແບບກໍ່ສ້າງຈຳກັດຜູ້ດຽວ, ມີບັນດາທ່ານຮອງລັດຖະມົນຕີກະຊວງປ້ອງກັນຄວາມສະຫງົບ, ຫົວໜ້າກົມໃຫ່ຍ, ບັນດາຄະນະພັກ-ຄະນະບັນຊາ, ກອງບັນຊາການ, ພະນັກງານ-ນັກຮົບ ແລະ ແຂກຖືກເຊີນເຂົ້າຮ່ວມ.

ພັນເອກ ບຸນແພງ ທິລະສັກ ຮອງຫົວໜ້າກອງບັນຊາການປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ໄດ້ຜ່ານບົດລາຍງາຍຫຍໍ້ປະຫວັດຄວາມເປັນມາຂອງໂຄງການກໍ່ສ້າງລະບົບສູນຝຶກວິຊາສະເພາະຕຳຫຼວດປ້ອງກັນທີ່ຕັ້ງ ທ່ານໄດ້ຍົກໃຫ້ເຫັນວ່າ: ໂຄງການກໍ່ສ້າງລະບົບສູນຝຶກວິຊາສະເພາະຕຳຫຼວດປ້ອງກັນທີ່ຕັ້ງ ແມ່ນໄດ້ລິເລີ່ມຈາກຫຼາຍປັດໃຈເອື້ອອຳນວຍ ແລະ ເງື່ອນໄຂທີ່ເໜາະສົມ, ຄວາມຮຽກຮ້ອງຕ້ອງການຂອງສັງຄົມຕໍ່ກັບວຽກງານປ້ອງກັນທີ່ຕັ້ງ ນັບມື້ມີທ່າອ່ຽງເພີ່ມຂື້ນ, ທັງເປັນການສືບຕໍ່ປະຕິບັດຍຸດທະສາດພັດທະນາກຳລັງປ້ອງກັນຄວາມສະຫງົບປະຊາຊົນ ເວົ້າລວມ, ເວົ້າສະເພາະແມ່ນພັດທະນາກຳລັງຕຳຫຼວດປ້ອງກັນທີ່ຕັ້ງ, ໃຫ້ມີຄວາມເຕີບໃຫ່ຍເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງ ແລະ ຊຳນິຊຳນານທາງດ້ານວິຊາສະເພາະ ເພື່ອກຽມພ້ອມໃນການປົກປັກຮັກສາຄວາມສະຫງົບຄວາມເປັນລະບຽບຮຽບຮ້ອຍ ໃຫ້ແກ່ຈຸດທີ່ຕັ້ງຍຸດທະສາດສຳຄັນຂອງພັກ-ລັດ, ຂົງເຂດເສດຖະກິດ-ສັງຄົມ, ອົງການຈັດຕັ້ງສາກົນທີ່ປະຈຳ ສປປ ລາວ, ເຫັນໄດ້ຄວາມໝາຍ-ຄວາມສຳຄັນຄືດັ່ງກ່າວ ຈຳເປັນຕ້ອງໄດ້ມີສະຖານທີ່ເພື່ອຮອງຮັບການບຳລຸງສ້າງກຳລັງຕຳຫຼວດປ້ອງກັນທີ່ຕັ້ງໃຫ້ສົມຄູ່ກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່.

ສຳລັບສູນຝຶກວິຊາສະເພາະຕຳຫຼວດປ້ອງກັນທີ່ຕັ້ງ ແມ່ນຕັ້ງຢູ່ບ້ານດ່ານຊີ ເມືອງນາຊາຍທອງ ນະຄອນຫຼວງວຽງຈັນ ໄດ້ກໍ່ສ້າງແຕ່ປີ 2016 ໂດຍແມ່ນ ບໍລິສັດປັນຍາອອກແບບກໍ່ສ້າງຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ, ໄດ້ສຳເລັດຄົບມາດຖານທຸກຢ່າງ ໃນວັນທີ 24 ມີນາ 2021 ທີ່ຜ່ານມາ ແລະ ມີຄວາມພ້ອມທຸກດ້ານເພື່ອນຳໃຊ້ເຂົ້າໃນການຝຶກວິຊາສະເພາະຕຳຫຼວດປ້ອງກັນທີ່ຕັ້ງ.

ໃນໂອກາດນີ້ກໍ່ໄດ້ມີການມອບ-ຮັບຢ່າງເປັນທາງການ ກ່າວມອບໂດຍທ່ານ ນາງ ສຸນັດຕາ ລິດປັນຍາ ປະທານບໍລິສັດປັນຍາອອກແບບກໍ່ສ້າງຈຳກັດຜູ້ດຽວ ແລະ ກ່າວຮັບໂດຍ ພົຈວ ໄຊສີ ແກ້ວສະຫງ່າ ຫົວຫນ້າກອງບັນຊາການປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ. ໃນໂອກາດທີ່ມີຄວາມໝາຍສຳຄັນນີ້ ທ່ານລັດຖະມົນຕີກະຊວງປ້ອງກັນຄວາມສະຫງົບ, ປະທານບໍລິສັດ, ເຈົ້າຂອງໂຄງການ ແລະ ບັນດາຄະນະນຳກະຊວງ, ກົມໃຫ່ຍ, ແຂກຖືກເຊີນໄດ້ພ້ອມກັນຕັດແຜບຜ້າເປີດນຳໃຊ້ຢ່າງເປັນທາງການ.

Off

Comments are closed.