13th Apr2021

ຮອງນາຍົກລັດຖະມົນຕີຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ

by somchan

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ ໃນວັນຈັນ, ວັນທີ 12 ເມ​ສາ 2021 ນີ້ ທີ່ຫ້ອງວ່າການສຳນັກງານນາຍົກລັດຖະມົນຕີ ເຊິ່ງທ່ານໄດ້ກ່າວວ່າ: ພໍ່ແມ່, ພີ່ນ້ອງ ຊາວລາວ ໃນທົ່ວປະເທດ ທີ່ເຄົາລົບ ຮັກແພງ ທັງຫຼາຍ ! ໃນປີຜ່ານມານີ້ ບັນ​ດາ​ປະ​ເທດ​ໃນ​ທົ່ວ​ໂລກ,​ ລວມ​ທັງ ສ​ປ​ປ​ ລາວ ໄດ້ປະເຊີນກັບ “ ​ການ​ລະ​ບາດຢ່າງ​ຮ້າຍ​ແຮງ​ຂອງ​ພະ​ຍາດ COVID-19 ” ເຊີ່ງໄດ້ແຜ່​ລາມເປັນວົງກວ້າງ ນັບແຕ່ຕົ້ນປີ 2020 ເປັນຕົ້ນມາ.

ເພື່ອຮັບມືກັບສະພາບການດັ່ງກ່າວ ລັດຖະບານ ໄດ້​ກະກຽມ​ຄວາມ​ພ້ອມ ແລະ ​ວາງມາດຕະການປ້ອງກັນແຕ່ຫົວທີ ໂດຍໄດ້ອອກຄໍາສັ່ງເລກທີ 06/ນຍ ແລະ ​ໄດ້​ທົບ​ທວນ ແລະ ປັບ​ປຸງໃຫ້​ສອດ​ຄ່ອງ​ກັບ​ສະ​ພາບ​ການ​ແຜ່​ລະ​ບາດ​ຂອງ​ພະ​ຍາດເປັນ​ແຕ່​ລະ​ໄລ​ຍະ; ​ທຸກ​ພາກ​ສ່ວນ​ໃນ​ສັງ​ຄົມ ໄດ້ເປັນ​ເຈົ້າ​ການ​ໃຫ້​ຄວາມ​ຮ່ວ​ມ​ມື ແລະ ​ຈັດ​ຕັ້ງ​ປະ​ຕິ​ບັດມາດ​ຕະ​ການ​ຕ່າງໆເຫຼົ່າ​ນັ້ນຢ່າງ​ເຂັ້ມ​ງວດ, ພ້ອມ​ກັນ​ນີ້ ກໍ​ໄດ້​ຮັບ​ການ​ຊ່ວຍ​ເຫຼືອ ສະ​ໜັບ​ສະ​ໜູນ​ຈາກ​ສັງ​ຄົມ, ອົງ​ການ​ຈັດ​ຕັ້ງ ແລະ ບັນ​ດາ​ປະ​ເທດ​ເພື່ອນ​ມິດ ຈຶ່ງເຮັດ​ໃຫ້​ພວກ​ເຮົາສາມາດເອົາຊະນະສັດຕູ ໂຕຮ້າຍກາດນີ້ໄດ້ ໃນລະ​ດັບ​ໃດ​ໜຶ່ງ ເຊິ່ງສະແດງອອກ ບໍ່​ມີຜູ້​ຕິດ​ເຊື້ອພະຍາດ​ COVID-19 ພາຍ​ໃນ​ປະ​ເທດ ​ເລີ່ມແຕ່​ກາງ​ເດືອນ ເມ​ສາ 2020 ເປັນຕົ້ນ​ມາ. ໄປ​ຄຽງ​ຄູ່​ກັນ​ນີ້ ລັດ​ຖະ​ບານ ກໍ່​ໄດ້​ຈັດ​ຕັ້​ງ​ສັກ​ຢາວັກຊິນ ໃຫ້​ກຸ່ມ​ເປົ້າ​ໝາຍ, ມາ​ປະ​ຈຸ​ບັນ ໄດ້​ສຳ​ເລັດ​ເຂັມ​ທີ 1 ຈຳ​ນວນ 140.000 ກວ່າ​ຄົນ ແລະ ເຂັມ​ທີ 2 ໄດ້ເກືອບ 28.000 ຄົນ.

​ມາຮອດປັດ​ຈຸ​ບັນ ຢູ່ ສປປ ລາວ ໄດ້ມີຜູ້ຕິດເຊື້ອສະສົມ ລວມທັງໝົດ 52 ຄົນ   ລວມທັງຜູ້ຕິດເຊື້ອໃໝ່ 2 ກໍລະນີ  ທີ່ມີການຢັ້ງຢືນຜົນກວດວິເຄາະວ່າຕິດເຊື້ອໃນວັນທີ 11 ເມສາ 2021 ເຊິ່ງເປັນການພົບຜູ້ຕິດເຊື້ອພາຍໃນປະເທດ ເປັນຄັ້ງທຳອິດໃນໄລຍະ 1 ປີຜ່ານມາ ແລະ ອີກ 1 ກໍລະນີໃຫມ່ ທີ່ມີການຢັ້ງຢືນຜົນກວດວິເຄາະວ່າຕິດເຊື້ອ ໃນວັນທີ 12 ເມສາ 2021 ນີ້. ໃນນີ້ ປີ່ນປົວຫາຍດີ 47 ຄົນ ແລະ ຍັງສືບຕໍ່ປິ່ນປົວ 5 ຄົນ.

ທ່ານຮອງນາຍົກລັດຖະມົນຕີ ຍັງໄດ້ກ່າວອີກວ່າ: ອີງໃສ່ສະພາບການລະບາດ ຢູ່ບັນດາປະເທດໃນໂລກ ໂດຍສະເພາະປະເທດ ທີ່ີມີຊາຍແດນຕິດຈອດກັບປະເທດເຮົາ, ສົມທົບກັບໄລຍະນີ້ ຍັງ​ມີ​ແຮງ​ງານ​ທີ່​ເດີນ​ທາງ​ຈາກ​ປະ​ເທດ​ທີ່​ມີ​ການ​ລະ​ບາດ​ຂອງ​ພະ​ຍາດ ​ເຂົ້າ​ມາ​ໃນປະ​ເທດ​ເຮົາ, ດັ່ງ​ນັ້ນ ແຕ່​ນີ້ ຕໍ່​ໄປ  ພວກເຮົາຕ້ອງພ້ອມກັນມີສະຕິລະວັງຕົວໃຫ້ສູງກວ່າເກົ່າ ແລະ ​ພ້ອມ​ກັນ​ເອົາ​ໃຈ​ໃສ່​ປະ​ຕິ​ບັດເຂັ້ມງວດໃນການປະ​ຕິ​ບັດ​ມາດ​ຕະ​ການ​ທີ່​ຄະ​ນະ​ສະ​ເພາະ​ກິດ​ວາງ​ອອກ ຄື:  ​ສືບຕໍ່ປະຕິບັດຄຳສັ່ງ, ຄຳແນະນຳ, ແຈ້ງການ ທີ່ອອກມາແລ້ວໃຫ້ເຂັ້ມງວດ; ໂດຍ​ສະ​ເພາະ​ ຄຳ​ສັ່ງ​ເພີ່ມຕື່ມ ກ່ຽວ​ກັບ​ການເພີ່ມທະວີການປະຕິບັດບັນດາມາດຕະການ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໃນໄລຍະສະເຫຼີມສະຫຼອງບຸນປີໃໝ່ລາວ ຫາ ທ້າຍເດືອນເມສາ. ຈັ​ດ​ຕັ້ງ​ການສັກ​ວັກ​ຊີນ​ກັນ​ພະ​ຍາດ COVID-19 ຢ່າງ​ຮີບ​ດ່ວນ ໂດຍ​ສະ​ເພາະ​ສຸມ​ໃສ່​ສັກໃຫ້​ກຸ່ມ​ອາ​ຊີບ​​ທີ່ໃຫ້​ການບໍ​ລິ​ການ​ສາ​ທາ​ລະ​ນະ ແລະ ຂະ​ຫຍາຍ​ໄປ​ທຸກ​ສາ​ຂາ​ອາ​ຊີບ​ຕາມ​ແຜນ​ທີ່​ວາງ​ໄວ້. ສະ​ນັ້ນ ຈຶ່ງ​ຮຽກ​ຮ້ອງ​ທຸກ​ພາກ​ສ່ວນໃນ​ສັງ​ຄົມ ຕື່ນ​ຕົວ​ສະ​ໝັກ​ໃຈ​ໃນ​ການ​ສັກ​ວັກ​ຊີນ ເພື່ອ​ປ້ອງ​ກັນ​ຕົນ​ເອງ, ຄອບ​ຄົວ ແລະ ທົ່ວ​ສັງ​ຄົມ; ເຊິ່ງ​ຫຼາຍ​ປະ​ເທດ​ໃນ​ໂລກກໍ່​ໄດ້​ນຳ​ໃຊ້. ຜ່ານ​ການ​ສັກ​ຢາ​ວັນ​ຊີນ ໃຫ້​ກຸ່ມ​ເປົ້າ​ໝາຍ​ໃນ​ໄລ​ຍະ​ຜ່ານ​ມາ ບໍ່​ມີ​ການ​ລາຍ​ງານກ່ຽວ​ກັບ​ຜົນ​ຂ້າງ​ຄຽງ​ທີ່​ຮ້າຍແຮງ​ເກີດ​ຂຶ້ນ. ພ້ອມ​ກັນ​ນີ້ ກໍ່ສະ​ເໜີ​ໃຫ້​ພາກ​ທຸ​ລະ​ກິດ ເປັນ​ເຈົ້າ​ການປະ​ກອບສ່ວນ​​ສະ​ໜັບ​ສະ​ໜູນ​ແຜນ​ການ​ສັກ​ວັກ​ຊີນ ໂດຍ​ຜ່ານ​ກະ​ຊວງ​ສາ​ທາ​ລະ​ນະ​ສຸກ. ເພີ່ມທະວີການ​ຕິດຕາມ, ກວດກາບໍ​ລິ​ເວນລຽບຕາມຊາຍແດນ ຢ່າງເຄັ່ງຄັດ ເພື່ອສະກັດກັ້ນການລັກລອບເຂົ້າປະເທດ ຂອງພົນລະເມືອງລາວ ແລະ ຊາວຕ່າງຊາດ ໂດຍສະເພາະ ຈຸດຂ້າມລອຍລະຫວ່າງປະເທດໃກ້ຄຽງທີ່ມີການລະບາດໃນຊຸມຊົນ ເພື່ອໃຫ້ສາມາດນຳເອົາຜູ້ລັກລອບເຂົ້າເມືອງຜິດກົດໝາຍ ມາກວດວິເຄາະຊອກຫາເຊື້ອ COVID-19 ແລະ ຈຳກັດບໍລິເວນຢູ່ສູນ ທີ່ຄະນະສະເພາະກິດ ກຳນົດໄວ້ ໃຫ້ຄົບ 14 ວັນ ຕາມລະບຽບການ. ​ພ້ອມ​ກັນ​ນີ້, ກໍ່​ຈະປະ​ຕິ​ບັດມາດຕະການ ເດັດ​ຂາດ ຕໍ່ຜູ້ທີ່ລັກລອບເຂົ້າ-ອອກເມືອງ ຕາມກົດໝາຍ ແລະ ລະ​ບຽບ​ການກ່ຽວ​ຂ້ອງ; ສືບຕໍ່ໂຄສະນາຂໍ້ມູນຂ່າວສານ ແລະ ປຸກລະດົມ ໃຫ້ປະຊາຊົນເພີ່ມທະວີໃນ​ການປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ທີ່ຄະນະສະເພາະກິດວາງອອກຢ່າງເຂັ້ມງວດ. ປັບປຸງມາດຕະຖານສູນຈຳກັດບໍລິເວນ,​ ກວດວິເຄາະຫາເຊື້ອພະຍາດ ໃນກຸ່ມຄົນທີ່ມີອາການສົງໃສ ແລະ ມີຄວາມສ່ຽງ.

 

Off

Comments are closed.