21st Apr2021

ວັນທີ 20 ເມສາ ພົບຜູ້ຕິດເຊື້ອໂຄວິດ 19 ເພີ່ມອີກ 2 ຄົນ

by somchan

ຮສ ດຣ ພູທອນ ເມືອງປາກ ຫົວໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ຮອງລັດຖະມົນຕີ ກະຊວງສາທາລະນະສຸກ ພ້ອມດ້ວຍ  ດຣ ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ແລະ  ດຣ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ  ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ຖະແຫຼງປະຈໍາວັນທີ 20 ເມສາ 2021 ນີ້ໃຫ້ຮູ້ວ່າ:

+ ໃນວັນທີ 19 ເມສາ 2021 ໄດ້ເກັບຕົວຢ່າງມາກວດວິເຄາະທັງໝົດ 456 ຄົນ, ຜົນກວດວິເຄາະທັງໝົດ ແມ່ນພົບຜູ້ຕິດເຊື້ອໃໝ່ 2 ຄົນ, ຄື:

  • ກໍລະນີທີ່ 59

– ເປັນເພດຍິງ, ອາຍຸ 25 ປີ, ສັນຊາດ: ລາວ, ອາຊີບ: ນັກສຶກສາ,

– ທີ່ຢູ່ປະຈຸບັນ:​ ບ້ານໂພນສະຫວ່າງ, ເມືອງຈັນທະບູລີ, ນະຄອນຫຼວງວຽງຈັນ,ເຊິ່ງ.

– ວັນທີ່ 6 ເມສາ 2021 ໝູ່ຂອງເອື້ອຍຮັກ 2 ຄົນ ເພດຊາຍ ລັກລອບຂີ່ເຮືອຂ້າມມາຈາກປະເທດໄທ ແລະ ເຂົ້າພັກຢູ່ບ້ານພັກ ໂຮງແຮມສາຍແພໄໝ 2 ຢູ່ແຂວງສະຫັວນນະເຂດ ແລ້ວໄດ້ມາພົບເອື້ອຍຮັກ ຂອງຜູ້ກ່ຽວ, ທັງ 3 ຄົນ ໄດ້ໄປຮ້ອງຄາຣາໂອເກະ ບໍ່ຮູ້ຊື່ຮ້ານ ເວລາ 20:30 ໂມງ ຈຶ່ງໄດ້ຂຶ້ນລົດຈາກຄິວລົດແຂວງສະຫວັນນະເຂດ ມານະຄອນຫຼວງວຽງຈັນ.

– ວັນທີ 7 ເມສາ 2021​ເວລາ 5:40 ໂມງເຊົ້າ ເດີນທາງມາຮອດນະຄອນຫຼວງວຽງຈັນ, ທັງ 3 ຄົນ ເດີນທາງໄປຮ້ານຄາຣາໂອເກະ 8118 ຕັ້ງຢູ່ບ້ານຮ່ອງໄກ່ແກ້ວ, ເມືອງຈັນທະບູລີ, ຫຼັງຈາກນັ້ນ ເຂົ້າພັກຢູ່ໂຮງແຮມເຈືອງ 2, ບ້ານສີບຸນເຮືອງ, ເມືອງຈັນທະບູລີ.

– ວັນທີ 8 ເມສາ 2021 ໄດ້ມາກິນເຂົ້າຢູ່ຮ້ານອາຫານ Funny 89 ຕັ້ງຢູ່ບ້ານທ່າສະຫວ່າງ, ເມືອງໄຊທານີ, ນະຄອນຫຼວງວຽງຈັນ .

– ວັນທີ 9 ເມສາ 2021 ຕອນແລງ ໄດ້ໄປວັດສີເມືອງ, ເມືອງສີສັດຕະນາກ. ຫຼັງຈາກນັ້ນ ຜູ້ກ່ຽວ ເດີນທາງໄປຮຽນພາສາອັງກິດຢູ່ໂຮງຮຽນ ວຽງຈັນຄໍເລດ. ຕອນຄໍ່າ ມາກິນເຂົ້າຢູ່ຮ້ານອາຫານ Funny 89.

– ວັນທີ 11 ເມສາ 2021  ຕອນຄ່ຳ ຜູ້ກ່ຽວໄດ້ເດີນທາງໄປສະຖານທີ່ບັນເທິງ WhatClub ແລະ ໄປຮ້ານຄາຣາໂອເກະ 8118.

– ວັນທີ 12 ເມສາ​ 2021 ໄປຮ້ານນວດ 111 ຢູ່ບ້ານໜອງບອນ,​ ພາຍຫຼັງນວດແລ້ວ ໄດ້ໄປກິນເຂົ້າປຽກໄກ່ໂອກ ຢູ່ປ້ຳນ້ຳມັນສີບຸນເຮືຶອງ.  ຕອນຄ່ໍາ ຜູ້ກ່ຽວ ແລະ ເອື້ອຍຮັກ ເດີນທາງໄປກິນປິ້ງປາໝຶກ ຢູ່ທົ່ງຂັນຄຳ, ຕໍ່ໜ້າສະຖານີດັບເພິງ, ເມືອງຈັນທະບູລີ.

– ວັນທີ 13​ ເມສາ 2021 ​ໝູ່ເອື້ອຍຮັກທັງ 2​ ຄົນມີໄຂ້ ແລະ ເມື່ອຍ. ບໍ່ໄດ້ພົບກັບຜູ້ກ່ຽວ.

– ວັນທີ 14-15 ເມສາ 2021 ຜູ້ກ່ຽວຮູ້ສຶກເມື່ອຍ.

– ວັນທີ 16-17 ເມສາ 2021  ທັງ 3 ຄົນ ອອກຈາກໂຮງແຮມ ມາຂຶ້ນເຮືອໄປທ່າບໍ່, ແຂວງໜອງຄາຍ, ປະເທດໄທ. ຜູ້ກ່ຽວໄດ້ຮັບໂທລະສັບ ວ່າ ທັງ 3 ຄົນ ຕິດເຊື້ອ COVID-19 ແລະ ໜຶ່ງໃນໝູ່ເອື້ອຍຮັກ ມີອາການໜັກ. ຜູ້ກ່ຽວເດີນທາງໄປກວດຢູ່ໂຮງໝໍລາວ-ຫວຽດ ດ້ວຍອາການໄຂ້, ເມື່ອຍ, ຖອກທ້ອງ ແລະ ໄດ້ຢາຈຳນວນໜຶ່ງມາກິນຢູ່ບ້ານ ອາການດີຂຶ້ນ.

– ວັນທີ 19 ເມສາ 2021 ເດີນທາງມາກິນເຂົ້າຢູ່ເຮືອນໝູ່ມີ 3 ຄົນລວມທັງຜູ້ກ່ຽວ. ຮູ້ສຶກອ່ອນເພຍຈຶ່ງໄດ້ມາກວດຢູ່ໂຮງໝໍມິດຕະພາບ,ຖືກເກັບຕົວຢ່າງ ແລະ ເຂົ້ານອນແຍກປ່ຽວ, ຜົນກວດວິເຄາະ ແມ່ນພົບເຊື້ອ COVID-19, ປະຈຸບັນ ເຂົ້ານອນແຍກປ່ຽວ,​ ຕິດຕາມອາການ ແລະ ຮັບການປິ່ນປົວຢູ່ໂຮງໝໍມິດຕະພາບ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 19 ຄົນ,​ ໄດ້ເກັບຕົວຢ່າງມາກວດວິເຄາະ, ປະຈຸບັນແມ່ນຍັງລໍຖ້າຜົນກວດ. ພ້ອມດຽວກັນນັ້ນ ຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈໍາກັດບໍລິເວນຜູ້ສໍາຜັດໃກ້ຊິດຈົນຄົບ 14 ວັນ.

  • ສ່ວນກໍລະນີຢັ້ງຢືນທີ 60

– ເປັນເພດຍິງ, ອາຍຸ 28 ປີ, ສັນຊາດ ລາວ, ອາຊີບ ແມ່ເຮືອນ, ທີ່ຢູ່ປະຈຸບັນ ບ້ານ ນາຊອນ, ເມືອງນາຊາຍທອງ, ນະຄອນຫຼວງວຽງຈັນ.

– ວັນທີ 7 ເມສາ 2021 ເສີມດັງຢູ່ກຸງເທບ ປະເທດໄທ.

– ວັນທີ 8-9 ເມສາ 2021ບໍ່ໄດ້ເດີນທາງໄປໃສ.

– ວັນທີ 10 ເມສາ 2021 ມີໄຂ້, ເຈັບຄໍ, ໄອ ແລະ ຖ່າຍແຫຼວເປັນມູກ.

– ວັນທີ 11-17 ເມສາ​ 2021 ບໍ່ໄດ້ເດີນທາງໄປໃສ.

– ວັນທີ 18 ເມສາ 2021​ ຂຶ້ນລົດແທັກຊີຈາກກຸງເທບ ມາຮອດ ໜອງຄາຍ ປະເທດໄທ, ຫຼັງຈາກນັ້ນ ມີຄົນໄທຕິດຕໍ່ຜູ້ຂັບເຮືອ ໃຫ້ມາສົ່ງຢູ່ຝັ່ງລາວ ແລະ ມີລົດມາສົ່ງຜູ້ກ່ຽວຢູ່ທ່າເຮືອ.

– ວັນທີ 19 ເມສາ 2021​ ຂ້າມເຮືອນ້ອຍມາຮອດຝັ່ງລາວ ຢູ່ເຂດເກົ້າລ້ຽວ, ເມືອງສີໂຄດຕະບອງ, ມີລົດຮູນໃດ ມາຮັບເອົາຜູ້ກ່ຽວ.ຜູ້ກ່ຽວແວ່ໄປຫາໝູ່ຢູ່ເຂດຊ້າງສາມຫົວ. ແລ້ວຈ້າງລົດຕຸກໆ ໄປກວດຢູ່ໂຮງໝໍມະໂຫສົດ ເພື່ອຂໍກວດຊອກຫາ COVID-19, ແພດແນະນຳໃຫ້ໄປກວດຢູ່ໂຮງໝໍມິດຕະພາບ.ເມື່ອມາຮອດໂຮງໝໍມິດຕະພາບໄດ້ຖືກເກັບຕົວຢ່າງກວດ.

– ວັນທີ 20 ເມສາ 2021  ຜົນກວດວິເຄາະ ພົບເຊື້ອ COVID-19 ປະຈຸບັນເຂົ້ານອນແຍກປ່ຽວ,​ຕິດຕາມອາການ ແລະ ຮັບການປິ່ນປົວຢູ່ໂຮງໝໍມິດຕະພາບ. ສຳລັບກຸ່ມສໍາຜັດໃກ້ຊິດໃນເບື້ອງຕົ້ ມີ 04 ຄົນ,​ ພວກເຮົາໄດ້ເກັບຕົວຢ່າງມາກວດວິເຄາະ, ປະຈຸບັນແມ່ນຍັງລໍຖ້າຜົນກວດ.ພ້ອມດຽວກັນນັ້ນພວກເຮົາຍັງໄດ້ສືບຕໍ່ເຝົ້າລະວັງ,ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.

– ສັງລວມການເກັບຕົວຢ່າງກວດວິເຄາະ ນັບແຕ່ເດືອນມັງກອນ 2020 ຮອດປະຈຸບັນ ມີທັງໝົດ 148,745 ຕົວຢ່າງ, ໃນນັ້ນ ກວດພົບເຊື້ອສະສົມ 60 ຄົນ.

Off

Comments are closed.