26th Apr2021

ລມຕ ກະຊວງ ອຸດສາຫະກຳ ແລະ ການຄ້າ ລົງເຄື່ອນໄຫວຕິດຕາມລາຄາສິນຄ້າໃນຕະຫຼາດ

by somchan

ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຄະນະ ໄດ້ລົງຕິດຕາມສະພາບການລາຄາສິນຄ້າໃນຕະຫຼາດໃນນະຄອນຫລວງວຽງຈັນ, ໃນວັນທີ 24  ເມສານີ້  ຈຸດປະສົງ ແມ່ນລົງຕິດຕາມສິນຄ້າ, ຕາມຕະຫຼາດປອດສານພິດ ໄອເຕັກ, ຕະຫຼາດກໍາແພງເມືອງ(ດອນກອຍ) ແລະ ດ່ານຂົວມິດຕະພາບ, ກວດກາຄວາມກຽມພ້ອມ ໃນການປ້ອງກັນການລະບາດພະຍາດໂຄວິດ-19;  ການຈັດສັນຕາມຕະຫຼາດ ໄລຍະຜ່ານມາ ເຫັນວ່າ ມີຜູ້ຊື້-ຂາຍ ຫຼາຍສົມຄວນ, ແຕ່ເນື່ອງຈາກການລະບາດຂອງພະຍາດໂຄວິດ-19 ຮອບທີ 2  ນີ້ທາງຄະນະນໍາ ກະຊວງອຸດສະຫະກຳ ແລະ ການຄ້າ ໄດ້ມີຄວາມເປັນຫ່ວງເປັນໄຍເຖິງການດໍາລົງຊີວິດຂອງປະຊາຊົນ ໂດຍສະເພາະຢູ່ ນວ;  ຈຶ່ງໄດ້ລົງໄປຕິດຕາມສະພາບຢູ່ຕະຫຼາດສົດ( ວັນເສົາ ໄອເຕັກ) ແລະ ຕະຫຼາດກໍາແພງເມືອງ(ໜອງໄຮ), ເຫັນວ່າ ມີຄວາມເປັນລະບຽບຮຽບຮ້ອຍດີ.  ການລົງຕິດຕາມຄັ້ງນີ້ ເພື່ອກວດກາສະພາບລາຄາສິນຄ້າເຄື່ອງອຸປະໂພກ ແລະ ບໍລິໂພກ ເປັນຕົ້ນແມ່ນ ປະເພດເຂົ້າສານ,ຊີ້ນ,ປາ ແລະ ສິນຄ້າຕ່າງໆ ທີ່ຈຳເປັນ . ລາຄາເຂົ້າສານແມ່ນຢູ່ໃນເກນປົກະຕິ  ແຕ່ຍັງມີເຂົ້າສານບາງປະເພດ ລາຄາຈາກຕົ້ນທຶນຍັງສູງຢູ່, ສ່ວນການປ້ອງກັນການລະບາດຂອງພະຍາດໂຄວິດ-19 ຜູ້ຈັດສັນຕະຫຼາດ ແມ່ນໃຫ້ຄວາມສໍາຄັນ ໂດຍແຕ່ງຕັ້ງພະນັກງານ ກວດ- ວັດແທກອຸນຫະພູມ, ມີເຈວລ້າງມື ຢູ່ທາງເຂົ້າຕະຫຼາດ ແລະ ຜູ້ເຂົ້າຕະຫຼາດກໍຕ້ອງໃສ່ຜ້າປິດປາກ ເພື່ອປ້ອງກັນການຕິດເຊື້ອ. ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຍັງໄດ້ຮຽກຮ້ອງໃຫ້ ປະຊາຊົນ,ພໍ່ຄ້າ-ຊາວຂາຍ ໃຫ້ຍົກສູງນໍ້າໃຈຮັບຜິດຊອບໃນການຮັບໃຊ້ສັງຄົມໃຫ້ຫຼາຍຂຶ້ນກວ່າເກົ່າ ແລະ ໃຫ້ໃສ່ຜ້າປິດປາກ-ດັງ ຮັກສາໄລຍະຫ່າງ, ກວດ-ວັດແທກອຸນຫະພູມ, ລ້າງມືດ້ວຍນໍ້າທີ່ສະອາດ ຫຼືເຈວ.

ໃນໂອກາດດັ່ງກ່າວທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະການຄ້າ, ໄດ້ແຈ້ງໃຫ້ຮູ້ຕື່ມວ່າ: ໃນຕໍ່ໜ້າທາງພາກສ່ວນທີ່ກ່ຽວຂ້ອງ ຈະຕ້ອງໄດ້ເອົາໃຈໃສ່ຢ່າງໃກ້ຊິດ ເພື່ອຄວບຄຸມ ລາຄາສິນຄ້າ, ການຕິດປ້າຍລາຄາສິນຄ້າ, ການສະເໜີຂາຍຜະລິດຕະພັນຕ່າງໆ  ຖ້າຫາກເຫັນວ່າ ມີການລະເມີດຂາຍເກີນລາຄາກໍານົດໄວ້ ກໍຈະໄດ້ມີການກ່າວເຕືອນ, ປັບໄໝ ແລະ ກ້າວໄປເຖິງ ການຢຸດຕິບໍ່ໃຫ້ຂາຍ;  ຄຽງຄູ່ກັນນັ້ນ ກໍແຕ່ງຕັ້ງເຈົ້າໜ້າທີ່ລົງສົມທົບ ກັບພະແນກ ທີ່ກ່ຽວຂ້ອງ ເພື່ອກວດກາ,ຕິດຕາມ.

Off

Comments are closed.