29th Apr2021

ປກສ ເມືອງສີສັດຕະນາກ ສືບຕໍ່ໂຄສະນາຜົນຮ້າຍ ແລະ ໄພອັນຕະລາຍຂອງພະຍາດໂຄວິດ-19

by somchan

ໃນຕອນເຊົ້າຂອງວັນທີ 28 ເມສາ 2021 ກອງບັນຊາການ ປກສ ເມືອງ ສີສັດຕະນາກ ນະຄອນຫລວງວຽງຈັນ ໄດ້ຈັດກຳລັງ ເຄື່ອນໄຫວເຮັດວຽກງານໂຄສະນາປຸກລະດົມຕາມຕະຫລາດ, ເຂດພື້ນທີ່ ທີ່ມີຄວາມສ່ຽງ ພາຍໃນ 37 ບ້ານ ທີ່ຂື້ນກັບເມືອງສີສັດຕະນາກ ໃຫ້ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈ ແລະ ເປັນເຈົ້າການໃນການປ້ອງກັນ, ສະກັດກັ້ນ ແລະ ຕ້ານການແຜ່ເຊື້ອລະບາດຂອງພະຍາດໂຄວິດ 19.

ການລົງໂຄສະນາຄັ້ງນີ້ ພັນໂທ ຄຳຝັ່ງ ເຄືອບພາພອນ ຫົວໜ້າກອງບັນຊາການ ປກສ ເມືອງສີສັດຕະນາກ ໃຫ້ຮູ້ວ່າ: ໄດ້ແຕ່ງກຳລັງລົງໂຄສະນາ ໂດຍເລີ່ມແຕ່ວັນທີ 27 ເມສາ ເປັນຕົ້ນມາ ແລະ ຈະສືບຕໍ່ລົງໂຄສະນາຢູ່ຈຸດຊຸມຊົນ, ພື້ນທີ່ມີຄວາມສ່ຽງເປັນຕົ້ນແມ່ນ ຕະຫລາດ, ສຳນັກງານ-ອົງການ, ພ້ອມນີ້ຍັງຈະສືບຕໍ່ໂຄສະນາຕາມທາງຮ່ອມ-ທາງຊອຍຕ່າງໆຢູ່ພາຍໃນເມືອງ ເພື່ອເຮັດໃຫ້ປະຊາຊົນຮັບຮູ້, ເຂົ້າໃຈເຖິງຜົນຮ້າຍ ແລະ ໄພອັນຕະລາຍຂອງພະຍາດໂຄວິດ 19 ທີ່ກຳລັງແຜ່ລະບາດ ຢູ່ໃນນະຄອນຫລວງວຽງຈັນ ແລະ ຖ້າບໍ່ຈຳເປັນຂໍໃຫ້ປະຊາຊົນກັກໂຕເອງຢູ່ໃນບ້ານ, ເຮືອນ ເພື່ອຄວາມປອດໄພຂອງຕົນເອງ ແລະ ຄົນໃນຄອບຄົວ.

Off

Comments are closed.