30th Apr2021

ທີມແພດປະສົບຜົນສຳເລັດໃນການປິ່ນປົວ ຜູ້ຕິດເຊື້ອໂຄວິດ 19 ຄົນທຳອິດຂອງແຂວງ ສາລະວັນ

by somchan

ທີມແພດໂຮງໝໍແຂວງສາລະວັນ ໄດ້ປະສົບຜົນສຳ ເລັດໃນການປິ່ນປົວຜູ້ຕິດເຊື້ອພະຍາດໂຄວິດ-19 ຄົນທໍາອິດຂອງແຂວງ, ເຊິ່ງເປັນກໍລະນີຜູ້ຕິດເຊື້ອທີ 54 ຂອງປະເທດ ຊື່ ທ້າວ ນຽມ ໃສສູນທອນ ປະຊາຊົນບ້ານ ນາເຕີຍ ເມືອງຄົງເຊໂດນ ແລະ ໄດ້ສົ່ງກັບບ້ານໃນວັນທີ 29 ເມສາ 2021 ທີ່ໂຮງໜໍແຂວງສາລະວັນ ພ້ອມດ້ວຍແພດ, ໜໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຕາມການລາຍງານໃຫ້ຮູ້ວ່າ: ທ້າວ ນຽມ ໃສສູນທອນກວດພົບເຊື້ອໂຄວິດ-19 ໃນວັນທີ 15 ເມສາ 2021 ຈາກນັ້ນໄດ້ເຂົ້າຮັບການປິ່ນປົວຢູ່ທີ່ໂຮງໝໍແຂວງສາລະວັນ ແລະໄດ້ຮັບການເອົາໃຈໃສ່ປິ່ນປົວຈາກທີມງານແພດໝໍກໍ່ຄືການຊີ້ນຳ, ຕິດຕາມຂອງການນໍາແຕ່ລະຂັ້ນຢ່າງເປັນປົກກະຕິ ແລະ ຕໍ່ເນື່ອງ, ຜ່ານການກວດຫາເຊື້ອຈຳນວນ 4 ຄັ້ງ ໃນນັ້ນຄັ້ງທີ 1 ຜົນກວດແມ່ນພົບເຊື້ອ ສ່ວນກວດອີກ 3 ຄັ້ງພາຍຫຼັງແມ່ນບໍ່ພົບເຊື້ອ, ອາການຂອງຜູ້ກ່ຽວປົກກະຕິ ບໍ່ມີໄຂ້, ໄອ,ຈາມ, ບໍ່ເມື່ອຍ, ບໍ່ຫາຍໃຈຜືດ, ກິນ-ດື່ມໄດ້ດີ, ມີແນວຄິດທຸ່ນທ່ຽງປະຕິບັດຕາມຄຳແນະນຳຂອງແພດ-ໝໍໄດ້ເປັນຢ່າງດີ, ສວ່ນຜູ້ທີ່ໄກ້ຊິດກັບທ້າວນຽມແມ່ນໄດ້ມີການຕິດຕາມຜົນກວດຕາມຂັ້ນຕອນ ແລະ ໄດ້ກັບເມືອກັກໂຕຢູ່ບ້ານຂອງຕົນເອງຕາມລະບຽບການຕື່ມອີກ.ສໍາລັບແພດທີ່ເຂົ້າປິ່ນປົວທ້າວນຽມແມ່ນຈະໃດ້ສືບຕໍ່ກັກບໍລິເວນ 14 ວັນ, ຈິ່ງຈະໄດ້ກັບໄປຢູ່ນໍາຄອບຄົວ.

ໂອກາດນີ້ທ້າວນຽມໃດ້ກ່າວຄວາມຂອບໃຈຢ່າງສູງທີ່ອຳນາດການປົກຄອງແຕ່ລະຂັ້ນ ກໍ່ຄືທິມງານແພດໝໍທີ່ເອົາໃຈໃສ່ສຸມທຸກເຮື່ອແຮງເຂົ້າໃນການປິ່ນປົວຈົນຫາຍດີ ແລະໄດ້ກັບອອກໄປດຳລົງຊີວິດຢູ່ນຳຄອບຄົວ ແລະຝາກເຖິງພໍ່ແມ່ພີ່ນ້ອງທຸກຄົນບໍ່ວ່າຈະຢູ່ພາຍໃນປະເທດກໍ່ຄືຜູ້ທີ່ເຮັດວຽກຢູ່ປະເທດ, ເພື່ອນບ້ານຈົ່ງໃດ້ເພີ່ມທະວີຮ່ວມແຮງຮ່ວມໃຈກັນຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19ນີ້ບໍ່ໃຫ້ແຜ່ລາມອອກສູ່ວົງກ້ວາງ.

Off

Comments are closed.