01st May2021

ປະທານສູນກາງສະຫະພັນ ກຳມະບານລາວ ຮຽກຮ້ອງໃຫ້ສະມາຊິກກຳມະບານ ແລະ ຜູ້ອອກແຮງງານ ຈົ່ງຮ່ວມແຮງຮ່ວມໃຈ ປະຕິບັດຄຳສັ່ງເລກທີ 15 ຢ່າງເຄັ່ງຄັດ

by somchan

ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານ ສູນກາງສະຫະພັນ ກຳມະບານລາວ ໄດ້ໃຫ້ສຳພາດເນື່ອງໃນໂອກາດວັນກຳມະກອນສາກົນຄົບຮອບ 135 ປີ (1/5/1886-1/5/2021)ວ່າ: ໃນໄລຍະການແຜ່ລະບາດຂອງພະຍາດໂຄວິດ-19 ໂດຍສະເພາະເຂດຊຸມຊົນ ໃນນະຄອນຫລວງວຽງຈັນ ກໍຄືບັນດາແຂວງ ໃນຂອບເຂດທົ່ວປະເທດ, ໄດ້ເຮັດໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ບໍ່ສາມາດສະເຫລີມສະຫລອງວັນດັ່ງກ່າວ.

ໂດຍທ່ານ ນາງ ອາລີ ວົງໜໍ່ບຸນທຳ ໃຫ້ຮູ້ວ່າ: ປັດຈຸບັນທົ່ວປະເທດ ມີຫົວໜ່ວຍແຮງງານ ພາກວິສາຫະກິດ ທັງໝົດ 124.987 ແຫ່ງ, ແຮງງານທີ່ມີວຽກເຮັດງານທຳຊຶ່ງເປັນແຮງງານຢູ່ໃນລະບົບ ມີ 777.825 ຄົນ;ສູນກາງສະຫະພັນກຳມະບານລາວ ໄດ້ຊຸກຍູ້ ແລະ ນໍາພາເພື່ອສ້າງຄວາມເຂັ້ມແຂງ ໃຫ້ແກ່ຫົວໜ່ວຍແຮງງານ, ສາມາດປັບປຸງ ແລະ ສ້າງຕັ້ງກຳມະບານຮາກຖານ ເຂົ້າສູ່ຫົວໜ່ວຍແຮງງານເອກະຊົນ ແລະ ການລົງທຶນ. ສໍາລັບການຕິດຕາມຜົນກະທົບຕ່າງໆ ຕໍ່ກຳມະກອນ ຫລື ຜູ້ອອກແຮງງານ ໃນໄລຍະການລະບາດຂອງພະຍາດໂຄວິດ-19ນີ້ ສູນກາງສະຫະພັນ ກຳມະບານລາວ ກໍໄດ້ ມີການວາງແຜນເພື່ອຊ່ວຍ ແລະ ແກ້ໄຂບັນຫາດັ່ງກ່າວ ເປັນຕົ້ນ ກໍໄດ້ເອົາບັນດາແຈ້ງການ, ບັນດາຄຳສັ່ງຂອງກະຊວງທີ່ກ່ຽວຂ້ອງ ກ່ຽວກັບຜູ້ອອກແຮງງານ, ວິທີປ້ອງກັນ ແລະ ອື່ນໆ ໂຄສະນາດ້ວຍຮູບການຕ່າງໆ ເພື່ອໃຫ້ບັນດາ ກຳມະກອນ, ຜູ້ອອກແຮງງານ ໄດ້ຮັບຮູ້ ແລະ ເຂົ້າໃຈ. ພ້ອມກັນນີ້, ກໍໄດ້ລົງຕິດຕາມກວດກາ ຜົນກະທົບ, ຕິດຕາມການປະຕິບັດຄຳສັ່ງ, ແຈ້ງການຂອງລັດຖະບານວາງອອກ; ໄດ້ມີການເປີດສາຍດ່ວນ 1512  ເພື່ອໃຫ້ກຳມະກອນ ຫລື ຜູ້ອອກແຮງງານ ທີ່ມີບັນຫາສາມາດໂທມາປຶກສາ ແລະ ສະແດງຄຳຄິດເຫັນຂອງຕົນເອງຕໍ່ບັນຫາທາງດ້ານແຮງງານໄດ້.

ໃນໂອກາດນີ້ ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານ ສູນກາງສະຫະພັນ ກຳມະບານລາວ ຍັງໄດ້ເນັ້ນໜັກໃຫ້ ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວ ໃນທົ່ວປະເທດ ຈົ່ງຮ່ວມແຮງຮ່ວມໃຈ, ສາມັກຄີກັນ, ເຊີດຊູຄວາມຮັບຜິດຊອບໜ້າທີ່ການເມືອງຂອງຕົນ, ສ້າງຄວາມເຂັ້ມແຂງ ຂອງສະຫະພັນກໍາມະບານ ແຕ່ລະຂັ້ນຢ່າງໜັກແໜ້ນ ໃຫ້ສົມກັບຄໍາຂວັນທີ່ວ່າ: “ກໍາມະບານລາວ ເຂັ້ມແຂງ, ທັນສະໄໝ, ສາມັກຄີ, ມີວິໄນ ແລະ ນໍ້າໃຈສາກົນກໍາມະຊີບ”. ແລະ ຮຽກຮ້ອງມາຍັງສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວ ບັນດາເຜົ່າ ຈົ່ງຮ່ວມແຮງຮ່ວມໃຈກັນ ປະຕິບັດຄຳສັ່ງເລກທີ 15 ຂອງນາຍົກລັດຖະມົນຕີ ລົງວັນທີ 21 ເມສາ 2021 ວ່າດ້ວຍການ ເພີ່ມທະວີມາດ ຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19 ແລະ ມາດຕະການ ຂອງຄະນະສະ ເພາະກິດ ຢູ່ຂັ້ນສູນກາງ ແລະ ຂັ້ນແຂວງ ວາງອອກຢ່າງເຄັ່ງຄັດ, ມີສະຕິໃນການບໍລິໂພກຂໍ້ມູນຂ່າວສານທາງສື່ອອນລາຍ ແລະ ຮັບຟັງຂໍ້ມູນຂ່າວສານ ທີ່ເປັນທາງການເທົ່ານັ້ນ, ພ້ອມກັນໄປສັກວັກແຊງປ້ອງກັນພະຍາດໂຄວິດ-19 ທີ່ທາງການໄດ້ກໍານົດໄວ້ໃນແຕ່ລະແຂວງ, ຈົ່ງສາມັກຄີກັນອົດທົນຜ່ານຜ່າ ວິກິດການນີ້ໄປພ້ອມໆກັນ ແລະ ເປັນເຈົ້າການນຳກັນໃນການຢູ່ເຮືອນ ຖ້າກໍລະນີຈຳເປັນອອກໄປກໍຕ້ອງໃສ່ຜ້າອັດປາກ-ດັງ, ໝັ່ນລ້າງມື,  ເວັ້ນໄລຍະຫ່າງ ແລະ ເອົາໃຈໃສ່ປະຕິບັດຕາມຄຳແນະນຳຂອງຄະນະສະເພາະກິດ ວາງອອກຢ່າງເຂັ້ມງວດ.

 

Off

Comments are closed.