02nd May2021

ຫຼາຍພາກສ່ວນ ມອບເຄື່ອງ ແລະ ເງິນຊ່ວຍເຫຼືອຕ້ານໂຄວິດ-19

by somchan

ໃນວັນທີ 30 ເມສາ 2021, ທີ່ສຳນັກງານນາຍົກລັດຖະມົນຕີ ໄດ້ມີພິທີມອບ-ຮັບເຄື່ອງແລະ ເງິນຊ່ວຍເຫຼືອ ຈາກພາກສ່ວນຕ່າງໆໃຫ້ແກ່ລັດຖະບານ ລວມມູນຄ່າເກືອບ 6 ຕື້ກີບ ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນ ການແພ່ລະບາດຂອງພະຍາດໂຄວິດ-19 ຢູ່ ສປປ ລາວ.

ຕາງໜ້າໃຫ້ແກ່ລັດຖະບານ ກ່າວຮັບໂດຍ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19; ມີຄະນະສະເພາະກິດ, ຜູ້ຕາງ ໜ້າກະຊວງ ແລະ ວິຊາການກ່ຽວຂ້ອງເຂົ້າຮ່ວມ.

ພາກສ່ວນທີ່ມອບການຊ່ວຍເຫຼືອຄັ້ງນີ້, ປະກອບ ມີ 6 ພາກສ່ວນ ຄື: ກະຊວງເຕັກໂນໂລຊີ ແລະ ການສື່ສານ ມອບເງິນ ຈຳນວນ 33 ລ້ານກີບ ພ້ອມທັງສະເໜີ ລະບົບການຕິດຕາມ Lao KYC application ຕິດຕັ້ງເທິງມືຖື ໃນຂັ້ນພື້ນຖານ ທີ່ກະຊວງໄດ້ຄົ້ນຄວ້າ ແລະທົດລອງນຳໃຊ້ ເພື່ອໃຊ້ໃນການຕິດຕາມປະຫວັດການເຄື່ອນໄຫວ (time line) ຂອງບຸກຄົນ ແລະ ແຈ້ງເຕືອນ ເມື່ອເຂົ້າໃກ້ສະຖານທີ່ ທີ່ມີຄວາມສ່ຽງໃນການແພ່ເຊື້ອ;  ບໍລິສັດ ລາວໂທລະຄົມມະນາຄົມມະຫາຊົນ ມອບເງິນ 2,5 ຕື້ກີບ ແລະ ອຸປະກອນການສື່ສານຂອງບໍລິສັດ ມູນຄ່າ 783 ລ້ານກີບ, ລວມມູນຄ່າທັງໝົດ 3 ຕື້ກວ່າກີບ; ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ມອບເງິນ ຈຳນວນ 100 ລ້ານກີບ ແລະ ອຸປະກອນການສື່ສານຂອງບໍລິສັດ ມູນຄ່າ 1,53 ຕື້ກີບ, ລວມມູນຄ່າທັງໝົດ 1,63 ຕື້ກີບ; ບໍລິສັດຜະລິດ-ໄຟຟ້າລາວມະຫາຊົນ ມອບເງິນ 500 ລ້ານກີບ; ບໍລິສັດ ETL ຈຳກັດມອບເງິນຈຳນວນ 150 ລ້ານກີບ ແລະ ອຸປະກອນການສື່ສານຂອງບໍລິສັດມູນຄ່າ180 ລ້ານກີບ, ລວມມູນຄ່າທັງໝົດ 330 ລ້ານກີບ ແລະ ບໍລິສັດ ລັດວິສາຫະກິດໄປສະນີລາວ ມອບເງິນຈຳນວນ 50 ລ້ານກີບ ແລະ ໃຫ້ການຊ່ວຍເຫຼື່ອການບໍລິການຂົນສົ່ງຮັບໃຊ້ວຽກງານ ຕ້ານພະຍາດໂຄວິດ-19 ໂດຍບໍ່ເສຍຄ່າ ມູນຄ່າ 150 ລ້ານກີບ ລວມມູນຄ່າທັງໝົດ200 ລ້ານກີບ;

ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈ ແລະ ຊົມເຊີຍ ແຕ່ລະພາກສ່ວນ, ຕະຫຼອດຮອດພະນັກງານ ຂອງບັນດາພາກສ່ວນ ທີ່ໄດ້ປະກອບສ່ວນມອບອຸປະກອນ ແລະ ເງິນຊ່ວຍເຫຼືອ ເຂົ້າໃນການຈັດຕັ້ງປະຕິບັດວຽກງານປ້ອງກັນ,ສະກັດກັ້ນ, ຄວບຄຸມ ແລະ ແກ້ ໄຂການແພ່ລະບາດຂອງພະຍາດໂຄວິດ-19 ຢູ່ ສປປ ລາວ. ການປະກອບສ່ວນດັ່ງກ່າວແມ່ນສອດ ຄ່ອງກັບຄວາມຮຽກຮ້ອງຕ້ອງການຕົວຈິງ ຂອງສະພາບການໃນປັດຈຸບັນ,ເຊິ່ງໄດ້ສະແດງເຖິງຫົວຄິດ ປະດິດສ້າງ ຮູ້ໝູນໃຊ້ທ່າແຮງ ທີ່ຕິດພັນກັບໜ້າທີ່ການເມືອງ ຂອງການຈັດຕັ້ງຕົນປະກອບສ່ວນເຂົ້າໃນການປະຕິບັດພາລະກິດລວມຂອງປະເທດຊາດ ໃຫ້ເກີດປະໂຫຍດສູງສຸດ, ທັງສະແດງເຖິງຄວາມເສຍສະຫຼະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມສາມັກຄີເປັນເອກະພາບ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງ-ກຳລັງໃຈອັນໃຫຍ່ຫຼວງໃຫ້ແກ່ພັກ-ລັດ ແລະ ປວງຊົນລາວທັງຊາດ ໂດຍສະເພາະພະນັກງານແພດໝໍ ແລະ ເຈົ້າໜ້າທີ່ທຸກຄົນທີ່ພວມປະຕິບັດໜ້າທີ່ ຕ້ານການແພ່ລະບາດຂອງພະຍາດໂຄວິດ- 19 ຢູ່ໃນທົ່ວປະເທດ,ພ້ອມທັງ ໃຫ້ຄຳໝັ້ນສັນຍາວ່າຈະນໍາໃຊ້ເຄື່ອງຊ່ວຍເຫຼືອ ແລະ ເງິນດັ່ງກ່າວ ໃຫ້ຖືກກັບຈຸດປະສົງເປົ້າໝາຍແລະເກີດປະໂຫຍດສູງສຸດ, ໂດຍສະເໜີໃຫ້ບັນດາພາກສ່ວນທີ່ໄດ້ມອບການຊ່ວຍເຫຼືອໃນຄັ້ງນີ້ ຈົ່ງພ້ອມກັນຕິດຕາມ ແລະ ຊຸກຍູ້ການນຳໃຊ້ເຄື່ອງ ແລະ ເງິນດັ່ງກ່າວໃຫ້ມີຄວາມໂປ່ງໃສ, ໄປຮອດໄປເຖິງເປົ້າໝາຍ, ສອດຄ່ອງກັບເນື້ອໃນຈິດໃຈຂອງການຊ່ວຍເຫຼືອຢ່າງແທ້ຈິງ.

ພ້ອມກັນນີ້, ທ່ານຍັງໄດ້ຮຽກຮ້ອງມາຍັງ ທຸກພາກສ່ວນໃນສັງຄົມ ເພີ່ມທະວີຄວາມເປັນຈິດໜຶ່ງໃຈດຽວກັນ ຮ່ວມກັບລັດຖະບານ ເປັນເຈົ້າການປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ປະກອບສ່ວນເຮັດໃຫ້ ການປະຕິບັດພາລະກິດຕ້ານພະຍາດໂຄວິດ- 19 ຄັ້ງນີ້ ໄດ້ຮັບຜົນສຳເລັດຢ່າງຈົບງາມ ໂດຍສະເພາະ ການຄວບຄຸມຈຳນວນຜູ້ຕິດເຊື້ອໃຫ້ຫຼຸດລົງ ແລະ ບໍ່ໃຫ້ມີຜູ້ເສຍຊີວິດຈາກການແພ່ລະບາດຂອງພະຍາດໂຄວິດ-19 ຢູ່ ສປປ ລາວ ໃນຄັ້ງນີ້.

ນອກນັ້ນ, ທ່ານຮອງນາຍົກລັດຖະມົນຕີ ຍັງໄດ້ແຈ້ງໃຫ້ຊາບ ກ່ຽວກັບສະພາບການແພ່ລະບາດ ຂອງພະຍາດໂຄວິດ-19 ຢູ່ໃນໂລກ ກໍຄື ພາຍໃນ ສປປ ລາວ, ລວມທັງບົດຮຽນ, ທ່າແຮງ ແລະ ມູນເຊື້ອອັນດີງາມຕ່າງໆ ເພື່ອນຳໃຊ້ເຂົ້າໃນການຕໍ່ສູ້ຕ້ານການແພ່ລະບາດຂອງພະຍາດໂຄວິດ-19, ໂດຍຫວັງຢ່າງຍິ່ງວ່າດ້ວຍບົດຮຽນ, ປະສົບການ, ທ່າແຮງ, ມູນເຊື້ອອັນດີງາມ ແລະ ຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ ຈະເຮັດໃຫ້ປະເທດພວກເຮົາ ສາມາດຜ່ານຜ່າຄວາມຫຍຸ້ງ ຍາກ ແລະ ເອົາຊະນະເຊື້ອພະຍາດທີ່ຮ້າຍແຮງດັ່ງກ່າວນີ້ໄດ້.

 

Off

Comments are closed.