03rd May2021

ປກສ ກຸ່ມສີວິໄລ ເມືອງໄຊທານີ ເຂັ້ມງວດກວດຄົນເຂົ້າ-ອອກບ້ານໃນເຂດຄວາມຮັບຜິດຊອບເພື່ອປ້ອງກັນການແຜ່ລະບາດຂອງພະຍາດໂຄວິດ-19

by somchan

ປກສ ກຸ່ມສີວິໄລ, ເມືອງໄຊທານີ, ນະຄອນຫຼວງວຽງຈັນ ແມ່ນມີມາດຕະການເຂັ້ມງວດໃນການເຝົ້າລະວັງ, ຄວບຄຸມ, ຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ດ້ວຍການປິດທາງ, ປິດຮ່ອມເຂົ້າ-ອອກບ້ານ, ຫ້າມປະຊາຊົນອອກຈາກບ້ານເຮືອນ ໂດຍປະຕິບັດຕາມຄໍາສັ່ງຂອງທ່ານນາຍົກລັດຖະມົນຕີ ເລກທີ 15/ນຍ ເພື່ອຕ້ານພະຍາດໂຄວິດ-19 ບໍ່ໃຫ້ແຜ່ລະບາດອອກສູ່ວົງກວ້າງ.

ພັທ ສັງ ພິມພາ ຫົວໜ້າ ປກສ ກຸ່ມສີວິໄລ ໃຫ້ຮູ້ວ່າ: ການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ແມ່ນໄດ້ສົມທົບກັບອໍານາດການປົກຄອງບ້ານ, ກຳລັງ ປກຊ-ປກສ ບ້ານ ກໍ່ຄືປະຊາຊົນພາຍໃນເຂດກຸ່ມບ້ານ ເຮັດໜ້າທີ່ຕາມທິດຊີ້ນຳຂອງຂັ້ນເທິງ ນັບແຕ່ມີແຈ້ງການໃຫ້ປິດບ້ານ-ເມືອງ ໃຫ້ປະຊາຊົນກັກຕົວຢູ່ເຮືອນ, ທາງກຸ່ມກໍ່ໄດ້ຈັດຕັ້ງກຳລັງລົງຕັ້ງດ່ານກວດກາຄົນເຂົ້າ-ອອກ ຢູ່ 19 ຈຸດ ໃນນີ້ມີ 3 ຈຸດແມ່ນດ່ານເຂົ້າ-ອອກເມືອງ ນັບແຕ່ວັນທີ 18 ເມສາ 2021, ມາຮອດປັດຈຸບັນ ເຫັນວ່າການເຂົ້າ-ອອກຂອງປະຊາຊົນ ຍັງສັບສົນເນື່ອງຈາກປະຊາຊົນຈຳນວນໜຶ່ງບໍ່ທັນເຂົ້າໃຈຢ່າງເລິກເຊິ່ງກ່ຽວກັບການຕ້ານພະຍາດໂຄວິດ-19 ການໄປ-ມາ ຍັງບໍ່ທັນມີເອກະສານເດີນທາງ. ກຸ່ມສີວິໄລ ເປັນກຸ່ມສ່ຽງທີ່ມີກໍລະນີຜູ້ຕິດເຊື້ອ ທາງເຈົ້າໜ້າທີ່ປະຈຳຈຸດກວດກາ ຈຶ່ງໄດ້ເຂັ້ມງວດໃນການກວດຄົນເຂົ້າ-ອອກ, ວັດແທກອຸນຫະພູມ, ຖ້າບໍ່ມີເອກະສານ ກໍຈະບໍ່ອະນຸຍາດໃຫ້ອອກ-ເຂົ້າບ້ານໄດ້. ໂດຍສະເພາະບ້ານທີ່ມີກຸ່ມສ່ຽງ ແມ່ນໄດ້ປິດທາງຮ່ອມ, ທາງຊອຍ ເດັດຂາດບໍ່ໃຫ້ມີຄົນເຂົ້າ-ອອກ ຫຼື ລົດສັນຈອນຜ່ານທາງໄດ້.

ທ່ານຍັງໄດ້ກ່າວຕື່ມອີກວ່າ ກຳລັງ ປກສ ກຸ່ມສີວິໄລ ຍັງເອົາໃຈໃສ່ວຽກງານໂຄສະນາ ໃຫ້ປະຊາຊົນກັກຕົວຢູ່ເຮືອນ, ຮັກສາອະນາໄມ, ກໍລະນີຈຳເປັນອອກນອກບ້ານ ແມ່ນໃຫ້ມີໜັງສືຢັ້ງຢືນຈາກບ້ານ, ພ້ອມທັງໃຫ້ພໍ່ແມ່ຜູ້ປົກຄອງເອົາໃຈໃສ່ຄຸ້ມຄອງລູກ-ຫຼານຂອງຕົນ ໄປ-ມາ ຕ້ອງໃສ່ຜ້າປິດປາກ-ດັງ, ລ້າງມືດ້ວຍເຈວຂ້າເຊື້ອ. ຕໍ່ກັບຜູ້ທີ່ມີກຸ່ມສ່ຽງ ທາງເຈົ້າໜ້າທີ່ ໄດ້ເປັນເຈົ້າການນຳຊອກຫາ ພ້ອມທັງແຈ້ງໃຫ້ໜ່ວຍສະເພາະກິດນຳໄປກັກຕົວຢູ່ສູນ ເພື່ອຮັບປະກັນໃຫ້ປະຊາຊົນພາຍໃນກຸ່ມບ້ານມີສຸຂະພາບແຂງແຮງຫ່າງໄກຈາກພະຍາດໂຄວິດ-19.

 

Off

Comments are closed.