03rd May2021

ປກສ ກຸ່ມເພຍວັດ ສຸມໃສ່ໂຄສະນາເຜີຍແຜ່ວຽກງານຕ້ານພະຍາດໂຄວິດ-19

by somchan

ປກສ ກຸ່ມເພຍວັດ ເມືອງ ສີສັດຕະນາກ ນະຄອນຫຼວງວຽງຈັນໄດ້ຮ່ວມກັບອົງການປົກຄອງບ້ານ ຈໍານວນ 8 ບ້ານ ແລະ ພາກສ່ວນທີ່ກ່ຽວຂ້ອງ ສຸມໃສ່ໃນການສະກັດກັ້ນ,ຄວບຄຸມ ແລະ ຕ້ານພະຍາດໂຄວິດ- 19, ໂດຍໄດ້ເຄື່ອນໄຫວໂຄສະນາເຜີຍແຜ່ກ່ຽວກັບຜົນຮ້າຍ ແລະ ແຈ້ງເຕືອນໃຫ້ປະ ຊາຊົນ ມີສະຕິຕໍ່ການຈັດຕັ້ງປະຕິບັດຄໍາສັ່ງເລກທີ 15/ນຍ ແລະ ຄໍາສັ່ງອື່ນໆທີ່ກ່ຽວຂ້ອງຢ່າງເຂັ້ມງວດ ເພື່ອຮັບປະກັນບໍ່ໃຫ້ມີຜູ້ຕິດເຊື້ອເພີ່ມຂຶ້ນ.

ພັທ ໂອໃດ ພິມມະຈັນ ຫົວໜ້າ ປກສ ກຸ່ມເພຍວັດ ໃຫ້ສໍາພາດ ໃນວັນທີ 2 ພຶດສະພາ 2021 ວ່າ: ກຸ່ມບ້ານເພຍວັດ ມີ 8 ບ້ານ ທີ່ຂຶ້ນກັບ.ພາຍຫຼັງທີ່ໄດ້ຮັບແຈ້ງການ ຈາກພາກສ່ວນທີ່ກ່ຽວຂ້ອງ ກໍໄດ້ເອົາໃຈໃສ່ໃນການຈັດວາງກໍາລັງລົງສົມທົບກັບອົງການປົກຄອງບ້ານ ເພື່ອໂຄສະນາເຜີຍແຜ່ຜ່ານທາງໂທລະໂຄງຂອງບ້ານ, ພ້ອມນຳໃຊ້ຍານພາຫະນະ ລົງຕາມພື້ນທີ່ຕ່າງໆພາຍໃນບ້ານ ເພື່ອເຜີຍແຜ່ກ່ຽວກັບຜົນຮ້າຍ, ຄວາມອັນຕະລາຍຂອງເຊື້ອພະຍາດໂຄວິດ-19, ພ້ອມທັງປຸກລະດົມໃຫ້ປະຊາຊົນບໍ່ອອກຈາກເຮືອນໂດຍບໍ່ມີຄວາມຈໍາເປັນ ຫຼື ບໍ່ໄດ້ຮັບອະນຸຍາດ ເພື່ອສະກັດກັ້ນບໍ່ໃຫ້ມີຜູ້ຕິດເຊື້ອພະຍາດໂຄວິດເພີ່ມຂຶ້ນ. ເນື່ອງຈາກວ່າພາຍຫຼັງທີ່ມີການລະບາດພະຍາດດັ່ງກ່າວນີ້, ຂອບເຂດກຸ່ມເພຍວັດ ມີຜູ້ຕິດເຊື້ອສະສົມ ທັງໝົດ 5 ຄົນ ຍິງ 2 ຄົນ ແລະ ໄດ້ກັກບໍລິເວນຕິດຕາມອາການອີກ 4 ຄົນ.

ທ່ານຍັງໄດ້ໃຫ້ຮູ້ຕືມອີກວ່າ: ຄຽງຄູ່ກັບການແພ່ລະພະບາດຂອງພະຍາດໂຄວິດ-19, ຍັງມີຄົນບໍ່ດີຈໍານວນໜຶ່ງໄດ້ເຄື່ອນໄຫວກໍ່ເຫດລັກຊັບ ແລະ ຄ້າຂາຍ, ມົ້ວສຸມຢາເສບຕິດ,ເຊິ່ງເຈົ້າໜ້າທີ່ ປກສ ກຸ່ມເພຍວັດ ກໍ່ສາມາດມ້າງ ແລະ ແກ້ໄຂຄະດີລັກຊັບພົນລະເມືອງໄດ້ 1 ເລື່ອງ, ມີຜູ້ຖືກຫາ 1 ຄົນ, ຄະດີຄ້າຂາຍ, ມົ້ວສຸມຢາເສບຕິດ 1 ເລື່ອງ ມີຜູ້ຖືກຫາ 1 ຄົນ ແລະ ຜູ້ມົ້ວສຸມ 3 ຄົນ ຍຶດຂອງກາງຢາບ້າໄດ້ 172 ເມັດ ແລະ  ຢາໄອສ໌ 1 ຖົງນ້ອຍ.

 

Off

Comments are closed.