06th May2021

ລັດຖະບານມີຄວາມເປັນຫວ່ງເປັນໃຍ ຕໍ່ຊີວິດການເປັນຢູ່ ຂອງປະຊາຊົນ ໄລຍະການລະບາດຂອງພະຍາດໂຄວິດ-19

by somchan

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທັງເປັນຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ຂັ້ນສູນກາງ ໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 4 ພຶດສະພາ 2021 ນີ້ວ່າ: ການລະບາດຂອງພະຍາດໂຄວິດ-19ກໍ່ໃຫ້ເກີດຜົນກະທົບຕໍ່ຫລາຍບັນຫາ ໂດຍສະເພາະ ຊີວິດການເປັນຢູ່, ການເຮັດທຸລະກິດ, ການຜະລິດ ແລະ ອື່ນໆທົ່ວສັງຄົມ, ເຊິ່ງເຫັນໄດ້ຄວາມຈໍາເປັນນີ້ ລັດຖະບານ ກໍາລັງຄົ້ນຄວ້າມາດຕະການທີ່ຈໍາເປັນຈໍານວນໜຶ່ງ ນອກຈາກບັນດາມາດຕະການທີ່ມີແລ້ວ ແລະ ໄດ້ປະກາດໄປແລ້ວ ເປັນຕົ້ນ ຫລຸດຜ່ອນພາສີ, ຫລຸດ ຜ່ອນເລື່ອງອາກອນມູນຄ່າເພີ່ມຕ່າງໆ. ພ້ອມນີ້, ຍັງຈະໄດ້ຄົ້ນຄວ້າມາດຕະການລະອຽດຈໍານວນໜຶ່ງ ເພື່ອຊ່ວຍເຫລືອບັນດາການຜະລິດທຸລະກິດ ຈົນໄປເຖິງມາດຕະການຕ່າງໆ ທີ່ໄດ້ວາງອອກແລ້ວໃນປີ 2020 ຜ່ານມາ ແມ່ນຈະໄດ້ສືບຕໍ່ກັບຄືນໄປເບິ່ງມາດຕະການເຫລົ່ານັ້ນ ເພື່ອເຮັດແນວໃດໃຫ້ຮັບປະກັນດ້ານ ການຜະລິດທຸລະກິດ ກໍສາມາດຢູ່ໄດ້ ແລະ ຜູ້ປະກອບການຕ່າງໆ ກໍ່ສາມາດເຄື່ອນໄຫວໄດ້ ເຖິງຈະມີຄວາມຈຳກັດກໍຕາມ ແລະ ປະຊາຊົນຜູ້ທຸກຍາກ ກໍສາມາດມີວິທີການດຳລົງຊີວິດຂອງຕົນເອງ ໂດຍສະເພາະແມ່ນເລື່ອງ ຄ່ານ້ຳ, ຄ່າໄຟຟ້າ ແລະ ອື່ນໆ ນີ້ກໍແມ່ນຄວາມເປັນຫ່ວງເປັນໃຍຂອງລັດຖະບານ.

ທ່ານ ກິແກ້ວ ໄຂຄໍາພິທູນ ຍັງມີຄຳເຫັນຕື່ມວ່າ: ສຳລັບຄຳສັ່ງເລກທີ 15/ນຍ ແມ່ນຄຳສັ່ງການເພີ່ມທະວີມາດຕະການເຂັ້ມງວດ ຢູ່ໃນການຄວບຄຸມ ສະກັດກັ້ນ ຕ້ານ ແລະ ແກ້ໄຂຜົນກະທົບຂອງພະ ຍາດໂຄວິດ-19 ຍ້ອນແນວນັ້ນ ຂໍໃຫ້ທຸກຄົນປະຕິບັດຕາມມາດຕະການນີ້ໃຫ້ເຂັ້ມງວດທີ່ສຸດ ແລະ ຖືກຕ້ອງທີ່ສຸດ. ຖ້າວ່າມີຄວາມຈຳເປັນ ແລະ ຫາກມີການລະບາດຮ້າຍແຮງກວ່ານີ້ ຄະນະສະເພາະກິດຈະຄົ້ນຄວ້າພິຈາລະນາ ສະເໜີ ໃຫ້ລັດຖະບານອອກມາດຕະການທີ່ເຄັ່ງກວ່ານີ້ ຕົວຢ່າງສະພາວະສຸກເສີນຄືຫລາຍປະເທດທີ່ປະກາດ. ດຽວນີ້, ພວກເຮົາຍັງ ອະນຸຍາດໃຫ້ມີການເຄື່ອນໄຫວຕາມລະບຽບການທີ່ວາງໄວ້ນັ້ນ, ແຕ່ບໍ່ແມ່ນການຈຳກັດຮັດແຄບ, ບໍ່ແມ່ນເກືອດຫ້າມທຸກການເຄື່ອນໄຫວ ຄືວ່າຄອບຄົວໜຶ່ງ ຈະຈຳກັດອອກຈາກເຮືອນທໍ່ນັ້ນທໍ່ນີ້ຄົນ ຫລື ອາທິດໜຶ່ງອອກເຮືອນໄດ້ສອງຫາສາມເທື່ອ. ສະນັ້ນ, ພໍ່ແມ່ປະຊາຊົນລາວບັນດາເຜົ່າ ຢ່າຟ້າວແຕກຕື່ນ ແລະ ຢ່າຟ້າວຢ້ານຫລາຍເກີນໄປ, ພວກເຮົາຈົ່ງພ້ອມກັນປະຕິບັດເຂັ້ມງວດ ຕາມມາດຕະການ ທີ່ໄດ້ອອກໄປນັ້ນໃຫ້ດີ. ນອກຈາກນີ້, ການຂົນສົ່ງສິນຄ້າຍັງມີເຂົ້າມາຢູ່ ໂດຍສະເພາະການເຄື່ອນໄຫວຂົນສົ່ງສິນຄ້າ ຈາກແຂວງໄປຫາແຂວງ ຖ້າມີຄວາມຈຳເປັນ ທາງຄະນະສະເພາະກິດກໍອະນຸຍາດໄດ້, ການໄປຜະລິດທຸລະກິດ ເຊັ່ນ: ກະສິກຳ, ການປູກ, ການລ້ຽງ ພວກເຮົາ ແມ່ນຍັງອະນຸຍາດໃຫ້ໄປຢູ່, ແຕ່ມີບາງບ່ອນເຂົ້າໃຈຜິດວ່າບໍ່ໃຫ້ຜະລິດບໍ່ໃຫ້ລ້ຽງ. ສະນັ້ນ, ຢາກໃຫ້ປະຊົນເຂົ້າໃຈໃຫ້ແຈ້ງຕື່ມວ່າ ມີແຕ່ບໍລິເວນທີ່ເປັນສີແດງເທົ່ານັ້ນ ທີ່ມີການເກືອດຫ້າມ. ພ້ອມກັນນີ້, ຢາກໃຫ້ສັງຄົມເຂົ້າໃຈ ຢ່າພາກັນແຕກຕື່ນ ແລະ ໃຊ້ມາດຕະການທີ່ເຂັ້ມງວດຫລາຍຈົນເກີນໄປ ໂດຍບໍ່ມີເຫດມີຜົນ. ໄລຍະຜ່ານມາ ຄະນະສະເພາະກິດຂອງພວກເຮົາ ກໍໄດ້ລົງກວດກາ ແລະ ໄປເບິ່ງຕົວຈິງ ບາງບ່ອນກໍເຮັດຖືກ, ບາງບ່ອນກໍລະເຫລີງແດ່, ບາງບ່ອນກໍເຂັ້ມງວດເກີນໄປ ໂດຍບໍ່ເບິ່ງເຫດເບິ່ງຜົນ, ແຕ່ຖ້າມີຄວາມຈຳເປັນອີຫລີ ການລະບາດຮ້າຍແຮງກວ່ານີ້ ແມ່ນການກ້າວໄປເຖິງການໃຊ້ມາດຕະການທີ່ສູງສຸດ.

ພ້ອມນີ້, ທ່ານ ກິແກ້ວ ໄຂຄໍາພິທູນ ຍັງຮຽກຮ້ອງມາຍັງບັນດາສື່ມວນຊົນ ໃຫ້ເອົາໃຈໃສ່ ແລະ ມີສ່ວນຮ່ວມນຳກັນ ໂດຍສະເພາະບັນຫາຂ່າວປອມ, ຂ່າວບໍ່ເປັນຈິງ, ຂ່າວບິດເບືອນ, ຂ່າວໃສ່ຮ້າຍປ້າຍສີ ເພື່ອເຮັດແນວໃດໃນການໂຄສະນາ ແລະ ເຜີຍແຜ່ຂໍ້ມູນຂ່າວສານ ທີ່ຖືກຕ້ອງ, ບໍ່ໃຫ້ສັງຄົມແຕກຕື່ນ ແລະ ຢ້ານກົວເກີນໄປ.

 

Off

Comments are closed.