06th May2021

ແຂວງຈຳປາສັກ ຕີລາຄາການຈັດຕັ້ງປະຕິບັດວຽກງານ ສະກັດກັ້ນ ແລະ ຕ້ານການລະບາດພະຍາດໂຄວິດ-19

by somchan

ໃນຕອນບ່າຍ ວັນທີ 4 ພຶດສະພາ 2021, ທີ່ຫ້ອງວ່າການແຂວງຈຳປາສັກ ໄດ້ຈັດກອງປະຊຸມປະເມີນຕີລາຄາ ຂອງຄະນະກຳມະການສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ຕ້ານການລະບາດພະຍາດໂຄວິດ-19 ຂັ້ນແຂວງ, ໃນການກະກຽມຄວາມພ້ອມ ເພື່ອວາງມາດຕະການຕ່າງໆ ໃນການປ້ອງກັນ ສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ຢູແຂວງຈຳປາສັກ ໃຫ້ມີຄວາມຮັດກຸມ ແລະ ຮອບດ້ານ, ພາຍໃຕ້ການເປັນປະທານ ຂອງທ່ານ ວິໄລວົງ ບຸດດາຄຳ ເຈົ້າ ແຂວງຈຳປາສັກ, ໃຫ້ກຽດເຂົ້າຮ່ວມຂອງ ທ່ານ ດຣ. ບຸນກອງ ສີຫາວົງ ອະດີດລັດຖະມົນຕີ ກະຊວງສາທາລະນະສຸກ, ມີ ບັນດາຄະນະນໍາ, ຫົວໜ້າກົມ-ຮອງກົມ ຈາກກະຊວງສາທາລະນະສຸກ, ຄະນະກຳມະການ ສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ຕ້ານການລະບາດພະຍາດໂຄວິດ-19 ຂັ້ນແຂວງ, ນະຄອນ ແລະ ເມືອງ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານ ສະພາບການຈັດຕັ້ງປະຕິບັດວຽກງານສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ- 19 ຢູ່ ແຂວງ, ນະຄອນປາກເຊ, ບັນດາເມືອງ ແລະ ໄດ້ມີການປະກອບຄຳຄິດຄຳເຫັນ ໃນການເຄື່ອນໄຫວວຽກງານຮອບດ້ານ ເຊັ່ນ: ການຜັນຂະຫຍາຍມະຕິ, ຄໍາສັ່ງ, ຄໍາແນະນໍາ, ແຈ້ງການຕ່າງໆ ນັບທັງຂັ້ນສູນກາງ ແລະ ທ້ອງຖິ່ນ, ວຽກງານປ້ອງກັນ, ສະກັດກັ້ນ ແລະ ຄວບຄຸມ ການແຜ່ລະບາດຂອງພະຍາດ. ວຽກງານຊອກຄົ້ນ ແລະ ຄຸ້ມຄອງກໍລະນີ,  ວຽກງານຕິດຕາມ, ກວດກາການລະເມີດກົດໝາຍ, ລະບຽບການ, ຄໍາສັ່ງ ແລະ ນິຕິກໍາທີ່ກ່ຽວ ຂ້ອງກັບການຕ້ານພະຍາດໂຄວິດ-19 ຕີລາຄາປັດໄຈຄວາມສ່ຽງຢູ່ແຂວງຈໍາປາສັກ. ພ້ອມນັ້ນ, ໄດ້ຍົກໃຫ້ເຫັນຂໍ້ສະດວກ ແລະ ຫຍຸ້ງຍາກ ອື່ນໆໃນການຈັດຕັ້ງປະຕິບັດວຽກງານດັ່ງກ່າວ. ກອງປະຊຸມຍັງໄດ້ຮັບຟັງ ຄຳແນະນຳຂອງຄະນະຊ່ຽວຊານ ຈາກສູນວິເຄາະ ແລະ ລະບາດວິທະຍາ, ກົມຄວບຄຸມພະຍາດຕິດຕໍ່, ກະຊວງສາທາລະນະສຸກ.

ໂອກາດນີ້ ທ່ານ ດຣ. ບຸນກອງ ສີຫາວົງ ໄດ້ມີຄຳເຫັນ ເນັ້ນໜັກໃຫ້ຄະນະສະເພາະກິດ ຂັ້ນແຂວງ, ນະຄອນ ແລະ ເມືອງ ທຸກພາກສ່ວນ ຈະຕ້ອງໄດ້ສືບຕໍ່ເພີ່ມທະວີ ມາດຕະການທີ່ໄດ້ຈັດຕັ້ງປະຕິບັດຜ່ານມາຢ່າງເຂັ້ມງວດ ເພີ້ມທະວີການໃຫ້ສຸຂະສຶກສາແກ່ປະຊາຊົນ ຕ້ອງໄດ້ເຜີຍແຜ່ຄູ່ມື ແນະນຳຫລັກການອະນາໄມ ແລະ ຂ້າເຊື້ອ ເພື່ອປ້ອງກັນານລະບາດພະຍາດໂຄວິດ-19 ຕ້ອງໃຫ້ປະຊາຊົນມີຄວາມຮູ້ພື້ນຖານກ່ຽວກັບວຽກງານອະນາໄມ ແລະ ຂ້າເຊື້ອ, ສືບຕໍ່ສັກວັກແຊງປ້ອງກັນພະຍາດCOVID-19 ໃຫ້ສໍາເລັດ. ພ້ອມນັ້ນ, ຄະນະສະເພາະກິດທຸກຂັ້ນ ຕ້ອງໄດ້ຈັດກອງປະຊຸມປຶກສາຫາລື ແບ່ງຄວາມຮັບຜິດຊອບ ແລະ ປະສານງານ ຊີ້ນໍາພະນັກງານກົມກອງຂັ້ນແຂວງ, ຂັ້ນເມືອງ ແລະ ນະຄອນເພີ່ມທະວີເອົາໃຈໃສ່ມາດຕະການປ້ອງກັນ ແລະ ຄວບຄຸມທີ່ວາງໄວ້ຢ່າງເຂັ້ມງວດ.

ພ້ອມນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ໄດ້ມີຄຳເຫັນຊີ້ນຳ ໃນການຈັດຕັ້ງ ປະຕິບັດມາດຕະການໃນຕໍ່ໜ້າ ຈະຕ້ອງໄດ້ສືບຕໍ່ປະຕິບັດຄໍາສັ່ງ ຂອງນາຍົກລັດຖະມົນຕີ, ຄໍາສັ່ງຂອງ ເຈົ້າແຂວງຈໍາປາສັກ ເພື່ອຕ້ານພະຍາດ COVID-19 ຢ່າງເຂັ້ມງວດ ພ້ອມນັ້ນກໍ່ຈະຕ້ອງໄດ້ມີການປັບປຸງບາງມາດຕະການ ທີ່ມີຄວາມຈໍາເປັນ ໃຫ້ມີຄວາມຮັດກຸມຂຶ້ນຕື່ມ ໃນການຄວບຄຸມການລະບາດ ແລະ ແກ້ໄຂຜົນກະທົບຕໍ່ເສດຖະກິດ-ສັງຄົມ ຢູ່ແຂວງຈຳປາສັກ.

ໃນໂອກາດດຽວກັນນີ້ ທ່ານ ດຣ.ບຸນກອງ ສີຫາວົງ ອະດີດລັດຖະມົນຕີ ກະຊວງສາທາລະນະສຸກ, ພ້ອມຄະນະ ກໍ່ໄດ້ຕາງໜ້າໃຫ້ ກະຊວງສາທາລະນະສຸກ ກໍ່ຄືລັດຖະບານມອບລົດສຸກເສີນ Ambulance ຈຳນວນ 1 ຄັນ ເພື່ອສະໜອງເຂົ້າໃນວຽກງານສາທາລະນະສຸກຢູ່ແຂວງນຳອີກ.

 

Off

Comments are closed.