07th May2021

ນາຍົກລັດຖະມົນຕີ ຊົມເຊີຍທຸກພາກສ່ວນ ທີ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດໂຄວິດ-19 ດ້ວຍຄວາມຮັບຜິດຊອບສູງ

by somchan

ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວໃນພິທີຖະແຫລງຂ່າວ ກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ໃນວັນທີ 5 ພຶດສະພາ 2021 ທີ່ ສຳນັກງານນາຍົກລັດຖະມົນຕີວ່າ: ການປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ໃນໄລຍະຜ່ານມາເຫັນວ່າ ການຈັດຕັ້ງທຸກພາກສ່ວນທຸກຂັ້ນ ໄດ້ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງຢ່າງບໍ່ຮູ້ອິດຮູ້ເມື່ອຍ. ໃນນີ້,

ລວມທັງການຊີ້ນຳບັນຊາ ຂອງອົງການປົກຄອງ, ຄະນະສະເພາະກິດທຸກຂັ້ນ, ການປະຕິບັດໜ້າທີ່ວິຊາສະເພາະຂອງກຳລັງປະກອບອາວຸດ ແລະ ພະນັກງານແພດໝໍທຸກຂັ້ນ, ພໍ່ແມ່ປະຊາຊົນສ່ວນຫລວງຫລາຍກໍ່ໃຫ້ການຮ່ວມມືຈັດຕັ້ງປະຕິບັດເປັນຢ່າງດີ, ສຳລັບວິຊາການແພດ ແມ່ນໄດ້ເລັ່ງລັດເກັບຕົວຢ່າງຜູ້ສຳຜັດໃກ້ຊິດກັບຜູ້ຕິດເຊື້ອ, ຜູ້ທີ່ມີຄວາມສ່ຽງ ມາກວດຫາເຊື້ອໄດ້ກວ່າ 4 ໝື່ນຕົວຢ່າງ, ເອົາໃຈໃສ່ປິ່ນປົວຜູ້ຕິດເຊື້ອຢູ່ບັນດາໂຮງໝໍຕ່າງໆ ທີ່ກຳນົດໄວ້ເປັນຢ່າງດິີ, ເລັ່ງລັດສັກວັກແຊງໃຫ້ກຸ່ມເປົ້າໝາຍ ແລະ ປະຊາຊົນທົ່ວໄປ ໄດ້ເພີ່ມຂຶ້ນຫລາຍ ຖ້າທຽບໃສ່ໄລຍະເວລາກ່ອນມີຄຳສັ່ງເລກທີ 15/ນຍ, ໄດ້ກະກຽມໂຮງໝໍຢູ່ພາກສະໜາມຫລາຍແຫ່ງ ໃນຂອບເຂດທົ່ວປະເທດ ສຳເລັດພາຍໃນເວລາບໍ່ເຖິງ 10 ວັນ, ສະເພາະຢູ່ນະຄອນຫລວງວຽງຈັນ ມີ 3 ແຫ່ງ (1.200 ຕຽງ), ຢູ່ແຂວງຈຳປາສັກ, ແຂວງບໍ່ແກ້ວ ແລະ ແຂວງອື່ນໆ ແມ່ນມີຫລາຍຮ້ອຍຕຽງ ເພື່ອຮອງຮັບຈຳນວນຜູ້ຕິດເຊື້ອທີ່ຈະເພີ່ມຂຶ້ນ. ສິ່ງສຳຄັນກໍຄືການຈັດຕັ້ງທຸກພາກສ່ວນ, ບຸກຄົນ, ນິຕິບຸກຄົນໄດ້ມີຄວາມຕື່ນຕົວປະກອບສ່ວນຊ່ວຍເຫລືອລັດຖະບານ ແລະ ອົງການປົກຄອງທ້ອງຖິ່ນແຕ່ລະຂັ້ນ ໂດຍທາງກົງ ແລະ ທາງອ້ອມ ຄິດເປັນມູນຄ່າຫລາຍຕື້ກີບ. ສະເພາະຢູ່ຂັ້ນສູນກາງ ແມ່ນໄດ້ຮັບເປັນເງິນ ສຳລັບຊື້ວັກແຊງ ແລະ ອຸປະກອນຕ່າງໆ ລວມຈຳນວນ 9,5 ຕື້ກີບ, ສະກຸນເງິນໂດລາສະຫະລັດ 13 ລ້ານກວ່າໂດລາ ແລະ ສະກຸນເງິນບາດໄທ 4 ລ້ານກວ່າບາດ. ນອກນັ້ນ, ຍັງໄດ້ຮັບການຊ່ວຍເຫລືອເປັນອຸປະ ກອນການແພດທີ່ສຳຄັນ ເຊັ່ນ: ເຄື່ອງຊ່ວຍຫາຍໃຈ, ເຄື່ອງຕິດຕາມອາການຄົນເຈັບ, ເຄື່ອງສ່ອງລັງສີ ແລະ ອຸປະກອນອື່ນໆ ຈາກປະເທດເພື່ອນມິດຄິດເປັນມູນຄ່າຫລາຍກວ່າ 100 ຕື້ກີບ.

Off

Comments are closed.