07th May2021

ພວກເຮົາຕ້ອງຜ່ານຜ່າຄວາມຫຍຸ້ງຍາກນີ້ໄປພ້ອມໆກັນ

by somchan

ໃນທ່າມກາງສະພາບທີ່ທົ່ວສັງຄົມ ພ້ອມກັນປະຕິບັດມາດຕະການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ພວກເຮົາເຫັນໄດ້ຄວາມສາມັກຄີ ອູ້ມຊູຊ່ວຍເຫລືອເຊິງກັນ ແລະ ກັນ, ໃນຍາມຫຍຸ້ງຍາກຄືແນວນີ້, ຫລາຍຄົນ, ຫລາຍຄອບຄົວ ແລະ ພາກສ່ວນຕ່າງໆທົ່ວສັງຄົມ ທີ່ມີເງື່ອນໄຂ ໄດ້ເສຍສະລະກໍາລັງຊັບ, ກໍາລັງແຮງສ່ວນຕົວເຂົ້າໃນບັ້ນຮົບສໍາຄັນ ໃນການຕີຖອຍພະຍາດຮ້າຍນີ້ ຊຶ່ງໄດ້ຮັບການຍ້ອງຍໍ, ຊົມເຊີຍ ແລະ ສັນລະເສີນນໍ້າໃຈທີ່ຍິ່ງໃຫຍ່ນັ້ນຈາກສັງຄົມທີ່ສຸດ.

ນັບແຕ່ວັນທີ 21 ເມສາ 2021 ເປັນຕົ້ນມາ, ພວກເຮົາພ້ອມກັນປະຕິບັດຄໍາສັ່ງເລກທີ 15/ນຍ ຂອງນາຍົກລັດຖະມົນຕີ ຢ່າງເຂັ້ມງວດ ເພື່ອສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19; ຄວາມຫຍຸ້ງຍາກນັ້ນມີຫລາຍ, ແຕ່ດ້ວຍຄວາມເອົາໃຈໃສ່ຂອງພັກ-ລັດ, ການປະກອບສ່ວນຂອງທົ່ວສັງຄົມ, ການຊ່ວຍເຫລືອຂອງບັນດາປະເທດເພື່ອນມິດ ເຮັດໃຫ້ການປະຕິບັດບັນດາມາດຕະການ ໄດ້ຮັບໝາກຜົນເປັນພື້ນຖານທີ່ໜ້າພໍໃຈ. ນອກຈາກລັດຖະບານໄດ້ມີຄວາມພະຍາຍາມສູງ ສຸມໃສ່ປິ່ນປົວຜູ້ຕິດເຊື້ອໂຄວິດ-19 ຢ່າງເອົາການເອົາງານຂອງແພດໝໍ ກໍ່ຄືທຸກພາກສ່ວນທີ່ກ່ຽວຂ້ອງຢ່າງບໍ່ຮູ້ອິດເມື່ອຍ ນັ້ນແລ້ວ, ໃນດ້ານອື່ນໆ ກໍ່ບໍ່ໄດ້ປ່ອຍປະລະເລີຍໂດຍໄດ້ມີການຊຸກຍູ້ໃຫ້ບັນດາຂະແໜງການກ່ຽວຂ້ອງຮີບຮ້ອນກວດກາ ແລະ ປັບປຸງນິຕິກຳຂອງຂະແຫນງການຕົນເພື່ອແກ້ໄຂຜົນກະທົບ, ບັນເທົາທຸກແກ່ຜູ້ປະກອບການ, ວິສາຫະກິດ, ປະຊາຊົນ ເປັນຕົ້ນແມ່ນ ນະໂຍບາຍດ້ານການເງິນ, ທະນາຄານ, ການບໍລິການສັງຄົມ,ໄຟຟ້າ, ນໍ້າປະປາ, ຂີ້ເຫຍື້ອ, ການສະຫນອງສະບຽງອາຫານ ເຄື່ອງໃຊ້ປະຈຳວັນທີ່ຈຳເປັນ ໃຫ້ແກ່ຜູ້ເຊົ່າຫ້ອງແຖວ ຫລື ມີແຜນຈັດສົ່ງກັບຄືນທ້ອງຖິ່ນສຳລັບຕ່າງແຂວງ, ຜູ້ວ່າງງານທີ່ມີອາຊີບອິດສະລະ ຫາເຊົ້າກິນຄ່ຳ ແລະ ອື່ນໆ. ມາຮອດເວລານີ້ ກໍ່ມີບາງຂະແໜງການໄດ້ຂຸ້ນຂ້ຽວຄົ້ນຄວ້າ ຊຶ່ງຈະເປັນຜົນ ແຈ້ງໃຫ້ທົ່ວສັງຄົມໄດ້ຮັບຊາບຕໍ່ໄປໃນມໍ່ໆນີ້ ອັນສະແດງເຖິງຄວາມເປັນຫ່ວງເປັນໃຍຂອງລັດ ຕໍ່ທົ່ວສັງຄົມ ໃນສະພາບຫຍຸ້ງຍາກ.

ເຖິງຢ່າງໃດກໍ່ດີ ພວກເຮົາທົ່ວສັງຄົມ ຄວນເປີດໃຈໃຫ້ກວ້າງ ຢ່າງມີສະຕິ ໂດຍຄຶດເຖິງສະພາບຄວາມຈໍາເປັນ, ຂໍ້ຈໍາກັດຂອງພວກເຮົາໃນປັດຈຸບັນ ທີ່ລັດພວມປະເຊີນຢູ່ ໂດຍສະເພາະສະພາບຄວາມຫຍຸ້ງຍາກຊົ່ວຄາວດ້ານການເງິນ-ງົບປະມານ ທີ່ອາດຈະເຮັດໃຫ້ການແກ້ໄຂບາງວຽກງານບໍ່ທັນການໄດ້, ພວກເຮົາກໍ່ຕ້ອງຮັບຮູ້ ແລະ  ເຂົ້າໃຈໃນຄວາມຈໍາເປັນຂອງລັດ ເພາະຄໍາຮຽກຮ້ອງນັ້ນມີຫລາຍ, ແຕ່ຄວາມສາມາດຕອບສະໜອງຍັງມີລັກສະນະຈໍາກັດ. ສໍາຄັນໃນເວລານີ້ແມ່ນຄວາມຮັກແພງສາມັກຄີ ເປັນຈິດໜຶ່ງໃຈດຽວ ຂອງທົ່ວປວງຊົນທັງຊາດ, ເຊື່ອໝັ້ນຕໍ່ການນໍາພາຂອງພັກ-ລັດ ທີ່ຍາມໃດກໍ່ຖືເອົາຜົນປະໂຫຍດຂອງປະເທດຊາດ ແລະ ປະຊາຊົນ ເປັນອັນສຳຄັນສູງສຸດ. ຖ້າຫວນຄືນໃນໄລຍະຕໍ່ສູ້ກູ້ຊາດ ໂດຍການນໍາພາຂອງພັກ, ມູນເຊື້ອອັນພິລະອາດຫານບໍ່ຍອມຈໍານົນຂອງປວງຊົນລາວບັນດາເຜົ່າ ພວກເຮົາກໍ່ສາມາດເຮັດການປະຕິວັດຊາດສໍາເລັດຜົນ. ສ່ວນໃນເວລານີ້ປະເທດພວມມີໄພ ຍ້ອນການລະບາດຂອງພະຍາດໂຄວິດ-19 ຮອບໃໝ່ ຊຶ່ງພວກເຮົາພວມພ້ອມກັນຕໍ່ສູ້ຢ່າງແຂງແຮງ ເພື່ອໃຫ້ສັງຄົມກັບຄືນສູ່ສະພາບປົກກະຕິໂດຍໄວ, ຄືດັ່ງທີ່ສູນກາງພັກ ໄດ້ລະບຸໄວ້ໃນຄໍາສັ່ງແນະນໍາເລກທີ 87/ຄລສພ, ລົງວັນທີ 25 ເມສາ 2021ວ່າ: ໃຫ້ຄະນະພັກແຕ່ຂັ້ນ ຕ້ອງມີຄວາມເປັນເອກະພາບກັນວ່າ ຕ້ອງຖືການຕ້ານ, ສະກັດກັ້ນ, ຄວບຄຸມ ແລະ ປ້ອງກັນພະຍາດ ໂຄວິດ-19 “ເປັນຫນ້າທີ່ຍຸດທະສາດສໍາຄັນ ແລະ ຮີບດ່ວນ ໃນການນໍາພາຊີ້ນໍາ ແລະ ບັນຊາຕົວຈິງ ຄືໃນພາວະສົງຄາມ”. ອັນນີ້ ສະແດງເຖິງຄວາມເປັນຫ່ວງເປັນໃຍ, ການນໍາພາຊີ້ນໍາຢ່າງໃກ້ຊິດຂອງພັກ ໃນສະພາວະຫຍຸ້ງຍາກ ຄືດັ່ງສົງຄາມ ທີ່ເຫັນຜົນປະໂຫຍດປະເທດຊາດ ແລະ ປະຊາຊົນເປັນກົກ. ໃນພຶດຕິກໍາຕົວຈິງສັງຄົມ ໄດ້ເຫັນແລ້ວວ່າ ດ້ວຍມູນເຊື້ອສາມັກຄີພາຍໃນອັນເປັນປຶກແຜ່ນແໜ້ນໜາ, ນໍ້າໃຈເອື້ອເຟື້ອເພື່ອແພ່ ແລະ ຄວາມເຫັນອົກເຫັນໃຈກັນຂອງພີ່ນ້ອງຮ່ວມຊາດ, ພວກເຮົາມີຄວາມເຊື່ອໝັ້ນຢ່າງຕາຍໃຈວ່າບັ້ນຮົບນີ້ ພວກເຮົາຈະຕີເອົາໄຊຊະນະໄດ້ຢ່າງແນ່ນອນ. ເຖິງຢ່າງໃດ ພວກເຮົາກໍ່ບໍ່ອາດປະໝາດ ຂາດສະຕິ ໃນການປ້ອງກັນ, ຕ້ອງໃຫ້ຄວາມໄມ້ຮ່ວມມືກັບລັດ ໃນການສະໜອງຂໍ້ມູນຂ່າວສານທີ່ຖືກຕ້ອງ, ຜູ້ທີ່ກວດພົບວ່າມີເຊື້ອພະຍາດ ກໍ່ບໍ່ໃຫ້ລົບລີ້ໜີໄປໃສ,ຄວນເຂົ້າໄປຮັບການປິ່ນປົວເພາະນະໂຍບາຍຂອງລັດກໍ່ແມ່ນຂ້າພະຍາດເພື່ອກອບກູ້ເອົາຊີວິດຄົນ, ໃຫ້ທົ່ວສັງຄົມມີຄວາມປອດໄພ, ສະຫງົບສຸກໂດຍໄວ ຊຶ່ງທັງໝົດແມ່ນຕ້ອງໄດ້ຮັບຄວາມຮ່ວມມືຈາກທຸກຄົນ, ສໍາຄັນແມ່ນຫົວໜ່ວຍຄອບຄົວ ໂດຍສະເພາະຜູ້ເປັນຫົວໜ້າຄອບຄົວ, ຜູ້ປົກຄອງຕ້ອງເປັນເຈົ້າການປະຕິບັດມາດຕະການທີ່ລັດວາງອອກຢ່າງເຂັ້ມງວດ.

ຄໍາຮຽກຮ້ອງຂອງສັງຄົມຕໍ່ລັດເພື່ອຢາກໃຫ້ຊ່ວຍ, ແກ້ໄຂແມ່ນມີຫລາຍ; ໃນຂະນະດຽວກັນ ທຸກຄົນທົ່ວສັງຄົມ ກໍ່ຈະຕ້ອງເປັນເຈົ້າການຊ່ວຍລັດໃນການປະຕິບັດມາດຕະການ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ເພື່ອຈະເຮັດໃຫ້ພວກເຮົາຜ່ານຜ່າບັນຫາທີ່ຫຍຸ້ງຍາກນີ້ໄປພ້ອມໆກັນ.

 

Off

Comments are closed.