07th May2021

ກອງປະຊຸມພົບປະທາງໄກ ລະຫວ່າງ ລັດຖະມົນຕີ ສອງກະຊວງປ້ອງກັນປະເທດ ລາວ-ຫວຽດນາມ

by somchan

ກອງປະຊຸມພົບປະທາງໄກ ລະຫວ່າງລັດຖະມົນຕີ ກະຊວງປ້ອງກັນປະເທດລາວ – ຫວຽດນາມ ໄດ້ຈັດຂຶ້ນ ໃນວັນທີ 6 ພຶດສະພາ 2021 ຝ່າຍລາວນໍາໂດຍ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ, ຝ່າຍຫວຽດນາມ ນໍາໂດຍ ສະຫາຍ ພົນໂທ ຟານ ວັນຢາງ ກໍາມະການກົມການເມືອງສູນກາງພັກຄອມມູນິດຫວຽດນາມ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ, ເຊິ່ງມີບັນດາ ຄະນະນຳກະຊວງ, ຄະນະນໍາກົມໃຫຍ່, ຫ້ອງວ່າການກະຊວງ, ພະນັກງານວິຊາການ ທັງສອງຝ່າຍເຂົ້າຮ່ວມ.

ໃນ ກອງປະຊຸມທັງສອງຝ່າຍໄດ້ພ້ອມກັນສະຫລຸບຕີລາຄາຄືນໝາກຜົນຂອງການຈັດຕັ້ງປະຕິບັດແຜນການພົວພັນຮ່ວມມືວຽກງານຮອບດ້ານ ຂອງສອງກະຊວງປ້ອງກັນປະເທດ ໃນໄລຍະທີ່ຜ່ານມາ ແລະ ວາງແຜນການຮ່ວມມືໃນຕໍ່ໜ້າ, ພ້ອມກັນສືບຕໍ່ຈັດຕັ້ງຜັນຂະຫຍາຍ ບັນດາອະນຸສັນຍາການຮ່ວມມືຮອບດ້ານ ລະຫວ່າງສອງຊາດ, ສອງກອງທັບລາວ-ຫວຽດນາມ ໃຫ້ປະກົດຜົນເປັນຈິງ.ນອກຈາກນີ້, ສອງລັດຖະມົນຕີ ຍັງໄດ້ສົນທະນາໂອ້ລົມແລກປ່ຽນບົດຮຽນການປ້ອງກັນ, ຕ້ານ ແລະ  ສະກັດກັ້ນການແຜ່ລະບາດຂອງພະຍາດຂອງໂຄວິດ-19.

ໂອກາດດຽວກັນນີ້, ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ກໍໄດ້ຕາງໜ້າໃຫ້ລັດຖະບານ ກໍຄືປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນອັນເລິກເຊິງຢ່າງຈິງໃຈ ຕໍ່ພັກ-ລັດຖະບານຫວຽດນາມ ກໍຄື ປະຊາຊົນຫວຽດນາມ ທີ່ໃຫ້ການຊ່ວຍເຫລືອໃນຫລາຍດ້ານ, ໂດຍສະເພາະວຽກງານການຊ່ວຍເຫລືອດ້ານທືນຮອນ, ວັດຖຸອຸປະກອນການແພດ, ລວມເຖິງຊ່ຽວຊານການແພດ ໃຫ້ແກ່ ສປປ ລາວ. ການພົບປະໃນຄັ້ງນີ້, ເປັນການພົບປະທາງໄກ ຖານສະຫາຍອ້າຍນ້ອງຮ່ວມອຸດົມການດຽວກັນ, ເຊິ່ງມັນສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຂອງທັງສອງຊາດ, ສອງກອງທັບ ທີ່ຍາມໃດກໍມີການຖະນຸຖະໜອມ ແລະ ເຊີດຊູເສີມຂະຫຍາຍມູນເຊື້ອແຫ່ງຄວາມສາມັກຄີພິເສດລະຫວ່າງສອງຊາດ, ສອງກອງທັບ ແລະ ປະຊາຊົນສອງຊາດ ລາວ-ຫວຽດນາມ ທີ່ແໜ້ນແຟ້ນ ແລະ ຈະເລີນງອກງາມຂຶ້ນເລື້ອຍໆ.

Off

Comments are closed.