07th May2021

ກົມໃຫຍ່ການເມືອງລົງກວດກາສະຖານທີ່ປູກໄມ້ວິກຢູ່ໂຮງຮຽນວັດທະນະທຳຫຼັກ 67

by somchan

ພົຈວ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ ທັງເປັນຫົວໜ້າຄະນະອະນຸກຳມະການຮັບຜິດຊອບໂຄງການປູກໄມ້ວິກ ລົງກວດກາຄວາມພ້ອມໃນການບຸກເບີກປ່າຈໍານວນ 25 ເຮັກຕາ ເພື່ອກະກຽມເນື້ອທີ່ດິນໃນການປູກຕົ້ນວິກ ຢູ່ທີ່ໂຮງຮຽນວັດທະນະທຳຫຼັກ 67 ຄັ້ງຢູ່ບ້ານນ້ຳແຈ້ງ ເມືອງໂພນໂຮງແຂວງວຽງຈັນ. ໃນວັນທີ 7 ພຶດສະພາ 2021 ນີ້

ພັທ ທະວີພອນ ຮັກໜໍ່ລາດ ຫົວໜ້າອຳນວຍການໂຮງຮຽນວັດທະນະທຳຫຼັກ67 ທັງເປັນຄະນະກຳມະການຮັບຜິດຊອບໂຄງການປູກໄມ້ວິກ ກ່າວວ່າ: ພາຍຫຼັງຄະນະກະຊວງ ປກສ ກໍຄືຄະນະກົມໃຫຍ່ການເມືອງ ປກສ ອະນຸມັດໃຫ້ນຳໃຊ້ທີ່ດິນຈໍານວນ 25 ເຮັກຕ້າທີ່ໂຮງຮຽນຂອງພວກເຮົາຄຸ້ມຄອງໃຫ້ປູກຕົ້ນວິກ; ດັ່ງນັ້ນ; ຄະນະກຳມະການພວກເຮົາຈຶ່ງມອບໃຫ້ບໍລິສັດປ໋ອບກໍ່ສ້າງຂົວທາງຈໍາກັດເປັນຜູ້ຮັບເໜົາເບີກປ່າຈໍານວນ 25 ເຮັດຕາ ມາເຖິງປັດຈຸບັນການເບີກປ່າແມ່ນສຳເລັດແລ້ວ 100% ພຽງແຕ່ລໍຖ້າຮອດມື້ກຳນົດປູກກໍຈະລົງມືປູກຕົ້ນວິກຢ່າງເປັນທາງການ ແລະ ຄາດວ່າຈະນຳໃຊ້ເບຍວິກທັງໝົດ 26.000 ກວ່າຕົ້ນ; ສ່ວນແຮງງານທີ່ຈະມາປູກ ແລະ ບົວລະບັດເບຍໄມ້ແມ່ນລະດົໃຫ້ພໍ່ແມ່ປະຊາຊົນຢູ່ບ້ານໂພນຄ້ອງ ເມືອງໂພນໂຮງ ແຂວງວຽງຈັນ ຈໍານວນ 16ຄອບຄົວພ້ອມທັງອະນຸຍາດໃຫ້ບັນດາຄອບຄົວທີ່ປູກເບຍໄມ້ໃຫ້ນັ້ນສາມາດປູກຂັບ ແລະ ພືດຊະນິດຕ່າງໆຊັບກັບເບຍວິກໄດ້ໂດຍບໍ່ໄດ້ເສຍຄ້າເຊົ່າທີ່ດິນ.

ໂອກາດດຽວກັນ, ພົຈວ ຄຳສາຍ ຈັນທະວົງ ກໍໄດ້ເນັ້ນໃຫ້ຄະນະກຳມະການຮັບຜິດຊອບໂຄງການປູກໄມ້ວິກ ຈົ່ງເອົາໃຈໃສ່ຊີ້ນຳ-ນຳພາບັນດາຄອບຄົວພໍ່ແມ່ປະຊາຊົນເລັ່ງປູກເບ້ຍໄມ້ ໃຫ້ໄວເທົ່າທີ່ຈະໄວໄດ້ ເພາະຖ້າຊັກຊ້າຈະຫຍຸ້ງຍາກແກ່ຍາວພໍ່ແມ່ປະຊາຊົນໃນເວລາປູກເຂົ້າ ແລະ ແນະນຳໃຫ້ພວກເພີ່ນປູກຕາມວິຊາການຂອງບໍລິສັດດຳນົດໄວ້ ເພື່ອຮັບປະກັນໃຫ້ຕົ້ນວິກທີ່ປູກນັ້ນເຕີມໃຫຍ່ຂະຫຍາຍຕົວໄດ້ຕາມມາດຖານ; ສ່ວນບັນດາຄອບຄົວທີ່ຈະມາປູກເບຍໄມ້ແມ່ນສາມາດປູກເຂົ້າ, ປູກພືດປະເພດຕ່າງໆສັບໃສ່ຫວ່າງເບຍວິກໄດ້ແຕ່ ຕ້ອງບົວລະບັດໃຫ້ເບຍວິກເຕີບໃຫຍ່ຂະຫຍາຍຕົວ.

ມື້ພ້ອມນີ້ ພົຈວ ຄຳສາຍ ຈັນທະວົງ ຍັງໄດ້ລົງກວດກາໜອງລ້ຽງປາ ແລະ ເນື້ອທີ່ທຳການຜະລິດຂອງນ້ອງນັກຮຽນໂຮງຮຽນວັດທະນະທຳຫຼັກ 67. ພ້ອມທັງ, ເນັ້ນໃຫ້ຄະນະອຳນວຍການໂຮງຮຽນເລັ່ງຈົກໜອງປາໂຕເກົ່າໃຫ້ກວ້າງຂວາງ ແລະ ປັບໜ້າດິນປູກພືດໃຫ້ຮາບພຽງ ເພື່ອຄວາມສະດວກໃນການປູກພືດຂອງນ້ອງນັກຮຽນ.

ໃນໂອກາດນີ້ ພົຈວ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ມອບອຸປະກອນການແພດໃນການປ້ອງກັນພະຍາດໂຄວິດ 19 ໃຫ້ຄູ-ອາຈານ ແລະ ນັກຮຽນ ໂຮງຮຽນວັດທະນະທຳຫຼັກ 67 ເຄື່ອງທີ່ນຳມາມອບໃຫ້ໃນຄັ້ງນີ້ມີ: ຜ້າປິດປາກ-ດັງ 100 ກັບ, ສະເປຂ້າເຊື້ອ 50 ກ່ອງ, ເຈວລ້າງມື 5 ກ່ອງ, ເຄື່ອງວັດແທກອຸນຫະພູມອີກຈຳນວນໜຶ່ງ.

ໃນໂອກາດນີ້ ພັທ ທະວີພອນ ຮັກໜໍ່ລາດ ຫົວໜ້າອຳນວຍການໂຮງຮຽນວັດທະນະທຳຫຼັກ 67 ໄດ້ສະແດງຄວາມຂອບໃຈ ແລະ ຮູ້ບຸນຄຸນ ທີ່ຄະນະພັກ-ຄະນະນຳກົມໃຫຍ່ການເມືອງປ້ອງກັນຄວາມສະຫງົບ ພ້ອມຄະນະໄດ້ນຳເອົາເຄື່ອງມາມອບໃຫ້ໃນຄັ້ງນີ້ ແລະ ຈະນຳໄປໜູນໃຊ້ໃນການເຮັດໜ້າທີ່ວຽກງານໃຫ້ໄດ້ຮັບໝາກຜົນສູງສຸດ.

 

Off

Comments are closed.