08th May2021

ຄະນະບັນຊາກອງບັນຊາການທະຫານ ແລະ ກອງບັນຊາການ ປກສ ແຂວງ ບໍ່ແກ້ວລົງຊຸກຢູ່ວຽກງານຕ້ານ ແລະ ສະກັດກັ້ນພະຍາດໂຄວິດ-19 ຢູ່ເມືອງປາກທາ

by somchan

ໃນວັນທີ 6 ພຶດສະພາ 2021 ນີ້,  ພັນໂທ ໂສວັນ ພັນທັນນີ ຮອງຫົວໜ້າກອງບັນຊາການ ຫົວໜ້າຫ້ອງເສນາທິການ ກອງບັນຊາການທະຫານແຂວງ ແລະ  ພັນໂທ ຄຳແດງ ວັນນະສິດ ຮອງຫົວໜ້າກອງບັນຊາການ ປກສ ແຂວງ ບໍ່ແກ້ວ ພ້ອມດ້ວຍຄະນະ ໄດ້ລົງຕິດຕາມ ກວດກາ ຊີ້ນຳ ກຳລັງປ້ອງກັນຊາດ-ປ້ອງກັນຄວາມສະຫງົບ, ກອງຫລອນ ຕະຫລອດຮອດອໍານາດການປົກຄອງທຸກຂັ້ນ ທີ່ປະຕິບັດໜ້າທີ່ຢູ່ຈຸດດ່ານກວດກາ ຄົນເຂົ້າ-ອອກເມືອງ ເພື່ອປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ຢູ່ພາຍໃນຂອບເຂດຄວາມຮັບຜິດຊອບຂອງເມືອງປາກທາ ຢ່າງເຂັ້ມງວດ.

ການລົງຕິດຕາມ ກວດກາໃນຄັ້ງນີ້ປະກອບມີ: ກອງບັນຊາການທະຫານເມືອງປາກທາ, ກອງປະຕິບັດງານ 213, ກອງຮ້ອຍທະຫານຊາຍແດນ 124 ແລະ ປ້ອມຈຽງຕອງກອງຮ້ອຍທະຫານຊາຍແດນ 124. ພິເສດແມ່ນໄດ້ເພີ່ມກຳລັງອີກ 1 ຈຸດຢູ່ ບ້ານຫ້ວຍໄມ້ຊາງ ຊາຍແດນລະຫວ່າງ ແຂວງບໍ່ແກ້ວ-ແຂວງໄຊຍະບູລີ.

ໂອກາດນີ້, ຄະນະບັນຊາທັງສອງກຳລັງກໍໄດ້ສະແດງຄວາມຊົມເຊີຍມາຍັງທຸກພາກສ່ວນ ທີ່ໄດ້ເອົາໃຈໃສ່ຕໍ່ໜ້າທີ່ຂອງຕົນຕາມຂັ້ນເທິງມອບໝາຍໃຫ້, ພ້ອມທັງເນັ້ນໜັກໃຫ້ທຸກພາກສ່ວນທີ່ປະຈໍາຢູ່ບັນດາປ້ອມ, ຈຸດດ່ານກວດກາ ເອົາໃຈໃສ່ປ້ອງກັນຕ້ານ ແລະ ສະກັດກັ້ນ ການລະບາດຂອງພະຍາດໂຄວິດ-19 ໂດຍສະເພາະແຂວງບໍ່ແກ້ວ ໃຫ້ຫລຸດໜ່ອຍຖອຍລົງເປັນກ້າວໆ, ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ສືບຕໍ່ເອົາໃຈໃສ່ເຮັດໜ້າທີ່ ປ້ອງກັນຄວບຄຸມມາດຕະການຕ່າງໆຢ່າງເຂັ້ມງວດຈົນກວ່າຈະມີຄໍາສັ່ງປ່ຽນແປງ.

Off

Comments are closed.