08th May2021

ພະແນກຕຳຫຼວດປ້ອງກັນເສດຖະກິດ ນະຄອນຫຼວງວຽງຈັນ ກວດກາພົບຮ້ານອິນເຕີເນັດກາເຟ ທີ່ລັກລອບເປີດໃຫ້ບໍລິການ

by somchan

ໃນວັນທີ 6 ພຶດສະພາ 2021 ກອງບັນຊາການ ປກສ ນະຄອນຫຼວງວຽງຈັນ ໄດ້ຮັບແຈ້ງ ວ່າ: ມີຮ້ານອິນເຕີເນັດກາເຟໄດ້ລັກລອບເປີດບໍລິການໃຫ້ລູກຄ້າເຂົ້າໄປຫຼິ້ນການພະນັນທາງອອນລ່າຍ, ດັ່ງນັ້້ນ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ຈຶ່ງໄດ້ມອບໃຫ້ພະແນກຕຳຫຼວດປ້ອງກັນເສດຖະກິດ ລົງຕິດຕາມກວດກາ, ຜ່ານການກວດກາຕົວຈິງຈຶ່ງຮູ້ວ່າ: ໃນເວລາ 21ໂມງ 00ນາທີ ຂອງວັນທີ 06 ພຶດສະພາ 2021 ໄດ້ພົບເຫັນຮ້ານອິນເຕີເນັດກາເຟຂອງ ທ້າວ ຄອນແກ້ວ ຕັ້ງຢູ່ບ້ານ ຈອມທອງ ເມືອງຫາດຊາຍຟອງ  ໄດ້ເປີດບໍລິການໃຫ້ລູກຄ້າເຂົ້າມາຫຼິ້ນການພະນັນທາງອອນລ່າຍຢູ່ເຮືອນຜູ້ກ່ຽວເອງ, ກວດກາພົບເຫັນຄອມພິວເຕີ 01 ຊຸດ, ເຄື່ອງພິມ 1 ເຄື່ອງ, ນອກນີ້ຍັງພົບຮ້ານ ເຄ ອິນເຕີເນັດ ອອກຊີ່ທ້າວ ແຂກ ຕັ້ງຢູ່ບ້ານດົງນາໂຊກເໜືອ ເມືອງສີໂຄດຕະບອງ  ໄດ້ເປີດບໍລິການໃຫ້ລູກຄ້າເຂົ້າໄປຫຼິ້ນການພະນັນທາງອອນລ່າຍ, ພົບເຫັນຄອມພິວເຕີ 1 ຊຸດ ແລະ ເຄື່ອງພິມ 1 ເຄື່ອງ.

ຜ່ານການສືບສວນ-ສອບສວນຂອງເຈົ້າໜ້າທີ່ເຫັນວ່າ: ທັງສອງຮ້ານແມ່ນບໍ່ມີໃບອະນຸດຍາດທະບຽນວິສາຫະກິດ ຈາກພາກສ່ວນທີ່ກ່ຽວຂ້ອງ ເຈົ້າໜ້າທີ່ຈຶ່ງໄດ້ສົມທົບກັບອຳນາດປົກຄອງບ້ານ ສຶກສາອົບຮົມກ່າວເຕືອນເຮັດບົດບັນທຶກພ້ອມທັງໃຫ້ຢຸດເຊົາຖ້າພົບເຫັນຍັງມີການລະເມີດຈະໄດ້ດຳເນີນຄະດີຕາມລະບຽບກົດໝາຍຢ່າງເຂັ້ມງວດ. ສ່ວນອຸປະກອນທີ່ໃຊ້ຫຼິ້ນການພະນັນນັ້ນແມ່ນເຈົ້າໜ້າທີ່ໄດ້ຍຶດໄວ້ເພື່ອເປັນຫຼັກຖານ.

Off

Comments are closed.