08th May2021

ກອງບັນຊາການທະຫານ ແລະ ກອງບັນຊາການ ປກສ ແຂວງບໍ່ແກ້ວ ຈັດກອງປະຊຸມປຶກສາຫາລືແຜນວຽກຈຸດສຸມຕອບຕ້ານພະຍາດໂຄວິດ-19 ຢູ່ ເຂດເສດຖະກິດພິເສດສາມຫຼຽມຄໍາ

by somchan

ໃນວັນທີ 7 ພຶດສະພາ 2021ນີ້, ກອງບັນຊາການທະຫານ ແລະ ກອງບັນຊາການ ປກສ ແຂວງບໍ່ແກ້ວ ໄດ້ຈັດກອງປະຊຸມ ປຶກສາຫາລືວຽກງານຈຸດສຸມເພື່ອປ້ອງກັນ, ຕ້ານ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ຢູ່ເຂດເສດຖະກິດພິເສດສາມຫຼຽມຄຳຂື້ນ ຢູ່ທີ່ກອງຮ້ອຍ 13 ປ້ອງກັນອາກາດ ເມືອງຕົ້ນເຜິ້ງ ແຂວງບໍ່ແກ້ວ. ໂດຍການເປັນປະທານຂອງ  ພັນເອກ ບຸນມີ ພາມີໄຊ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ,  ມີບັນດາຄະນະພັກ-ຄະນະບັນຊາ ກອງບັນຊາການທະຫານ ກອງບັນຊາການ ປກສ ແຂວງ,  ເມືອງຕົ້ນເຜິ້ງ, ຄະນະສະເພາະກິດຂັ້ນເມືອງ, ເຂດເສດຖະກິດພິເສດສາມຫຼ່ຽມຄຳ, ສະມາຊິກສະພາປະຊາຊົນຂັ້ນແຂວງປະຈຳເຂດ, ກອງພັນ 405, ກອງພັນ 419, ກອງຮ້ອຍທະຫານຊາຍແດນ , ກ້ອງຮ້ອຍ 13 ຕະຫຼອດຮອດ ພະແນກການກ່ຽວຂ້ອງເຂົ້າຮ່ວມເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຮັບຟັງການລາຍງານ ສະພາບການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ, ສະກັດກັ້ນ ການແຜ່ລະບາດ ຂອງພະຍາດໂຄວິດ-19 ແລະ ການຈັດຕັ້ງຜັນຂະຫຍາຍບັນດານິຕິກຳ ມະຕິຄຳສັ່ງຂອງຂັ້ນເທິງຢ່າງເຂັ້ມງວດ ເວົ້າລວມ ເວົ້າສະເພາະແມ່ນມະຕິຄຳສັ່ງຂອງແຂວງວາງອອກ ເຊິ່ງໄດ້ຕີລາຄາຜົນສຳເລັດ, ຂໍ້ຄົງຄ້າງ ແລະ ສິ່ງທ້າທາຍ, ລວມທັງການກຳນົດທິດທາງແຜນການ ກໍ່ຄືມາດຕະການຕ່າງໆໃນຕໍ່ໜ້າ ເພື່ອກຽມພ້ອມຮັບມືຮອບດ້ານທີ່ອາດຈະເກີດຂື້ນ. ຫຼັງຈາກນັ້ນ, ບັນດາຜູ້ເຂົ້າຮ່ວມກອງປະຊຸມກໍ່ໄດ້ປະກອບຄຳຄິດເຫັນຕໍ່ເນື້ອໃນການລາຍງານດັ່ງກ່າວ ໂດຍສະເພາະວຽກຈຸດສຸມໃນຕໍ່ໜ້າ.

ໃນໂອກາດນີ້ ພັນເອກ ບຸນມີ ພາມີໄຊ ໄດ້ມີທິດຊີ້ນຳສອງກຳລັງ ປກຊ-ປກສ ຕະຫຼອດຮອດເຈົ້າໜ້າທີ່ທີ່ກ່ຽວຂ້ອງ ຮີບຮ້ອນ ນໍາເອົາແຜນຈຸດສຸມລົງຈັດຕັ້ງຜັນຂະຫຍາຍເປັນແຜນວຽກປະຈຳວັນ ແລະ ແບ່ງຄວາມຮັບຜິດຊອບລະອຽດ ເພື່ອຈັດຕັ້ງປະຕິບັດໃຫ້ສຳເລັດ, ໃຫ້ມີການປະສານສົມທົບກັນພາຍໃນຢ່າງກົມກຽວ ແລະ ຕ່າງປະເທດຮອບດ້ານ, ຈັດຕັ້ງລະບົບປະຈຳການລາຍງານສະພາບການໃຫ້ຂັ້ນເທິງເປັນປົກກະຕິ, ເຄືອນໄຫວລາດຕະເວນ ທາງບົກ ທາງນໍ້າ ການຕະຫຼອດ 24 ໂມງ, ໂຄສະນາເຜີຍແຜ່ຜົນຮ້າຍຂອງພະຍາດລະບາດໂຄວິດ-19 ໃຫ້ອົງການແຕ່ລະຂັ້ນ ອຳນາດການປົກຄອງ, ປະຊາຊົນບັນດາເຜົ່າ ຈົນໄປຮອດຊາວຕ່າງຊາດທີ່ອາໄສໃນເຂດດັ່ງກ່າວໃຫ້ເຂົ້າໃຈແຈ້ງ, ຮັດແໜ້ນຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເພີ່ມຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ໄດ້ຮັບຜົນສູງສຸດ.

Off

Comments are closed.