08th May2021

ຄອບຄົວການນໍາກະຊວງ ປກສ ມອບເຄື່ອງຊຸກຍູ້ໃຫ້ໂຮງຮຽນວັດທະນະທຳຫຼັກ 67 ນຳໃຊ້ເຂົ້າໃນການປະຕິບັດໜ້າທີ່ ໄລຍະຕ້ານພະຍາດໂຄວິດ-19

by somchan

ວັນທີ 7 ພຶດສະພາ 2021, ຄອບຄົວການນໍາກະຊວງ ປກສ ໄດ້ນໍາເອົາເຄື່ອງບໍລິໂພກ ໄປມອບ ໃຫ້ໂຮງຮຽນວັດທະນະທຳຫຼັກ 67 ເພື່ອນໍາໃຊ້ເຂົ້າໃນການເຄື່ອນໄຫວປະຕິບັດໜ້າທີ່ ໄລຍະສະກັດກັ້ນ ແລະ ປ້ອງກັນການແພ່ລະບາດຂອງພະຍາດໂຄວິດ-19, ສຳລັບເຄື່ອງທີ່ນຳມາມອບ ໃນຄັ້ງນີ້ ປະກອບມີ: ຜ້າປິດປາກ-ດັງ 100 ກັບ,ໝີ່ 40 ແກັດ, ນ້ຳດື່ມ 30 ແພັກ ແລະ ເຂົ້າກ່ອງ 20 ກ່ອງ ລວມມູນຄ່າ 5.000.000 ກີບ, ຕ່າງໜ້າກ່າວມອບໂດຍ ທ່ານ ນາງ ພວງວັນ ກອງມະນີ ແລະ ກ່າວຮັບໂດຍ ພັທ ທະວີພອນ ຮັກໜໍ່ລາດ ອຳນວຍການໂຮງຮຽນວັດທະນະທຳຫຼັກ 67 ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ໃນໂອກາດນີ້, ທ່ານ ນາງ ພວງວັນ ກອງມະນີ ໄດ້ກ່າວສະແດງຄວາມພາກພູມໃຈເປັນຢ່າງຍິ່ງ ທີ່ໄດ້ຕາງໜ້າໃຫ້ຄອບຄົວການນໍາກະຊວງ ປກສ ນຳເອົາວັດຖຸປັດໃຈມາມອບໃຫ້ ໂຮງຮຽນວັດທະນະທຳຫຼັກ 67 ເພື່ອເປັນການແບ່ງເບົາຄວາມອິດເມື່ອຍ ແລະ ເຫັນໄດ້ຄວາມສຳຄັນຕໍ່ພະນັກງານຄູອາຈານ ແລະ ນ້ອງນັກຮຽນທີ່ເຮັດໜ້າທີ່ຢ່າງຕັ້ງໜ້າ.

ໂອກາດດຽວກັນ, ພັທ ທະວີພອນ ຮັກໜໍ່ລາດ ອຳນວຍການໂຮງຮຽນວັດທະນະທຳຫຼັກ 67 ກໍໄດ້ກ່າວສະແດງຄວາມຂອບໃຈມາຍັງ ຄອບຄົວການນໍາ ໂດຍສະເພາະ ທ່ານ ນາງ ພວງວັນ ກອງມະນີ ເປັນຢ່າງສູງ ທີ່ຊ່ວຍອຸປະຖໍາຄັ້ງນີ້ ເພື່ອເປັນການຊຸກຍູ້ສົ່ງເສີມທາງດ້ານກຳລັງແຮງ ໃຫ້ພະນັກງານນັກຮົບ ທີ່ເຮັດໜ້າທີ່ໃນການເຄື່ອນໄຫວວຽກງານວິຊາສະເພາະ ໃນໄລຍະສະກັດກັ້ນ ແລະ ປ້ອງກັນການແພ່ລະບາດຂອງພະຍາດໂຄວິດ-19 ພ້ອມທັງຈະນຳເອົາເຄື່ອງດັ່ງກ່າວ ໄປແຈກຍ້າຍໃຫ້ທົ່ວເຖິງ ໃຫ້ແກ່ນ້ອງນັກຮຽນທີ່ໄດ້ພັກຮຽນໃນຊ່ວງວິກິດຄັ້ງນີ້ ແລະ ອວຍພອນໄຊໃຫ້ຄະນະຄອບຄົວການນໍາຈົ່ງມີສຸຂະພາບເຂັ້ມແຂງ, ມີຄວາມຜາສຸກໃນຊີວິດຄອບຄົວ ແລະ ສ່ວນຕົວ ພ້ອມກັນຜ່ານຜ່າສະກັດກັ້ນພະຍາດໂຄວິດ-19 ໄປດ້ວຍດີ.

Off

Comments are closed.