08th May2021

ສອງບໍລິສັດ ມອບເຄື່ອງຊ່ວຍເຫລືອ ຕ້ານການລະບາດພະຍາດໂຄວິດ-19 ຢູ່ ແຂວງຈໍາປາສັກ

by somchan

ບໍລິສັດ ປາກຊ່ອງໄຮແລນ ຈຳກັດ ຜູ້ດຽວ ແລະ ບໍລິສັດ ເກັດສະໜາ ກ໋ອຟ ຈຳກັດ ໄດ້ຮ່ວມກັນມອບເຄື່ອງຊ່ວຍເຫລືອ ລວມມູນຄ່າ 32 ລ້ານກວ່າກີບ, ໃຫ້ແຂວງ ຈຳປາສັກ, ໃນນັ້ນ ມີເງິນສົດ 12 ລ້ານກີບ ແລະເຄື່ອງດື່ມ, ອາຫານແຫ້ງ ແລະ ອຸປະກອນການແພດ ALCOHOL-75% ມູນຄ່າ 20 ລ້ານກວ່າກີບ ເພື່ອປະກອບສ່ວນສະໜັບສະໜູນ ເຂົ້າໃນວຽກງານປ້ອງກັນ, ຄວບຄຸມ ແລະ ສະກັດກັ້ນການລະບາດ ພະຍາດໂຄວິດ-19 ຢູ່ ແຂວງຈໍາປາສັກ.

ພິທີມອບ-ຮັບໄດ້ມີຂຶ້ນໃນວັນທີ 7 ພຶດສະພາ 2021 ທີ່ຫ້ອງວ່າການປົກຄອງແຂວງຈໍາປາສັກ, ຕາງໜ້າກ່າວມອບໂດຍ ທ່ານ ນະລົງໄຊ ຄົງສະໝຽນ ຜູ້ອຳນວຍການ ບໍລິສັດ ເກດສະໜາ ກ໊ອຟ ຈຳກັດ, ທ່ານ ໄກສິດ ຟູສຸວັນ ກຳມະການຜູ້ຈັດການ ບໍລິສັດ ປາກຊ່ອງ ໄຮແລນ ຈຳກັດ ຜູ້ດຽວ, ເປັນກຽດກ່າວຮັບໂດຍ ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ, ຜູ້ປະຈຳການ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ມີການນຳພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ເປັນສັກຂີພິຍານ.

ໂອກາດນີ້, ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ, ໄດ້ສະແດງຄວາມຂອບໃຈ ແລະ ຊົມເຊີມມາຍັງ ທ່ານ ຜູ້ອຳນວຍການ ບໍລິສັດ ເກດສະໜາ ກ໊ອຟ ຈຳກັດ ແລະ ທ່ານ ກຳມະການຜູ້ຈັດການ ບໍລິສັດ ປາກຊ່ອງ ໄຮແລນ ຈຳກັດ ທີ່ເຫັນໄດ້ເຖິງຄວາມສຳຄັນຂອງວຽກງານສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ຢູ່ແຂວງ. ເນື່ອງຈາກສະພາບລວມການລະບາດ ຖືວ່າເປັນວົງກວ້າງ ແລະ ຍັງມີທ່າອ່ຽງທີ່ຈະເພີ່ມຂຶ້ນສູງ. ແຂວງຈໍາປາສັກ ແມ່ນສືບຕໍ່ປິດການເຂົ້າ-ອອກເມືອງ ເລີ່ມແຕ່ວັນທີ 7-20 ພຶດສະພາ 2021 ເພື່ອສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ຢູ່ ສປປ ລາວ ກໍຄື ຢູ່ແຂວງຈຳປາສັກ ໃຫ້ຫລຸດລົງ ແລະ ສໍາລັບຜູ້ທີ່ມີຄວາມຈໍາເປັນ ຕ້ອງເດີນທາງໄປປະຕິບັດໜ້າທີ່ຢູ່ຕ່າງແຂວງ ຕ້ອງມີໃບຢັ້ງຢືນການກວດເກັບຕົວຢ່າງຫາເຊື້ອໂຄວິດ-19 ( PCR ) ພາຍໃນ 72 ຊົ່ວໂມງ ຫລື ມີໃບຢັ້ງຢືນການສັກວັກແຊງປ້ອງກັນພະຍາດໂຄວິດ-19 ເພື່ອສະເໝີ ຄະນະສະເພາະກິດຂັ້ນແຂວງ, ຜູ້ທີ່ມີຄວາມຈໍາເປັນຕ້ອງເດີນທາງລະຫວ່າງເມືອງພາຍໃນແຂວງ ແມ່ນໃຫ້ຂໍໜັງສືອະນຸມັດການເດີນທາງນໍາຄະນະສະເພາະກິດຂັ້ນນະຄອນ/ເມືອງ ໃນເວລາລັດຖະການ.

Off

Comments are closed.