09th May2021

ແຂວງຫລວງພະບາງ ສືບຕໍ່ປະຕິບັດຄຳສັ່ງ ຈົນເຖິງວັນທີ 20 ພຶດສະພາ 2021

by somchan

ປັດຈຸບັນແຂວງຫລວງພະບາງ ຍັງບໍ່ມີຜູ້ຕິດເຊື້ອພະຍາດໂຄວິດ-19 ເພີ້ມ, ຕົວເລກຜູ້ຕິດ ເຊື້ອສະສົມຍັງຢູ່ທີ່ 13 ຄົນ, ແຕ່ອົງການປົກຄອງແຂວງ ກໍ່ຄື ຄະນະສະເພາະກິດ ເພື່ອປ້ອງກັນ ຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ໄດ້ອອກແຈ້ງການໃຫ້ທົ່ວສັງຄົມ ສືບຕໍ່ປະຕິບັດຄຳສັ່ງ ຂອງທ່ານນາຍົກລັດຖະມົນຕີ, ຄຳສັ່ງຂອງທ່ານເຈົ້າແຂວງຫລວງພະບາງ ແລະ ຄຳສັ່ງຂອງຄະນະສະເພາະກິດຂັ້ນແຂວງ ໃນການເພີ່ມທະວີຄວາມເອົາໃຈໃສ່ ຕໍ່ການປ້ອງກັນ ຄວບຄຸມ ສະ ກັດກັ້ນ ແລະແກ້ໄຂການລະບາດ ຂອງພະຍາດໂຄວິດ-19 ເພື່ອບໍ່ໃຫ້ເກີດມີການລະບາດຂອງພະຍາດໃນຊຸມຊົນ.

ໃນໂອກາດຖະແຫລງຂ່າວວັນທີ 7 ພຶດສະພາ 2021 ກ່ຽວກັບສະພາບການລະບາດຂອງພະຍາດໂຄວິດ-19 ຢູ່ແຂວງຫລວງພະບາງ ດຣ. ຄຳສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງ ຮອງຫົວໜ້າຄະນະສະເພາະກິດຂັ້ນແຂວງ ກ່າວວ່າ: ໃນໄລຍະຜ່ານມາທຸກພາກສ່ວນໃນສັງຄົມ ໄດ້ສຸມໃສ່ປະຕິບັດໜ້າທີ່ ແລະ ໃຫ້ການຮ່ວມມື ໃນການປ້ອງກັນ ຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຢ່າງຕັ້ງໜ້າ ຈຶ່ງເຮັດໃຫ້ພາຍໃນແຂວງຫລວງພະບາງໄດ້ຮັບຜົນສໍາ ເລັດໃນເບື້ອງຕົ້ນ ແຕ່ສະພາບການພາຍໃນປະເທດ ຍັງມີຫລາຍແຂວງ ແລະ ນະຄອນຫລວງວຽງຈັນ ທີ່ກວດພົບຜູ້ຕິດເຊື້ອພະຍາດໂຄວິດ-19 ເພີ້ມຂຶ້ນໃນແຕ່ລະວັນ ຈຶ່ງມີຄວາມຈໍາເປັນຕ້ອງໄດ້ສືບຕໍ່ປະຕິບັດ ບັນດາມາດຕະການຕ່າໆ ໄປຈົນເຖິງວັນທີ 20 ພຶດສະພາ 2021 ເພື່ອບໍ່ໃຫ້ແຂວງຫລວງພະບາງ ເກີດມີການລະບາດຂອງພະຍາດໂຄວິດ-19 ພາຍໃນແຂວງຕື່ມອີກ.

ປັດຈຸບັນແຂວງຫລວງພະບາງ ໄດ້ສືບຕໍ່ຕັ້ງຈຸດກວດກາຄົນເຂົ້າ-ອອກເມືອງ ຈຳນວນ 30 ຈຸດ ກຳ ນົດສູນຈຳກັດບໍລິເວນ ສຳລັບແຮງງານ ແລະ ບຸກຄົນສຳພັດ-ໃກ້ຊິດກັບຜູ້ຕິດເຊື້ອ ຈຳນວນ 17 ສູນ ໃນ 11 ເມືອງ ແລະ ນະຄອນຫລວງພະບາງ ມີຜູູ້ເຂົ້າຈຳກັນບໍລິເວນທັງໝົດ 234 ຄົນ.

Off

Comments are closed.