11th May2021

ເກີດເຫດໄຟໄໝ້ໂຮງງານຜະລິດແກັດເຈ້ຍ ບ້ານອີໄລໃຕ້ ເມືອງນາຊາຍທອງ

by somchan

ໃນເວລາປະມານ 23 ໂມງຂອງວັນທີ 10 ພຶດສະພາ 2021 ນີ້ ໄດ້ເກີດເຫດໄຟໄໝ້ໂຮງງານຜະລິດແກັດເຈ້ຍຂອງບໍລິສັດລາວຊຽງຊີ ເປເປີຄອນເທັນເນີຈຳກັດຜູ້ດຽວ ທີ່ຕັ້ງຢູ່ເຂດບ້ານອີໄລໃຕ້ ເມືອງນາຊາຍທອງ ນະຄອນຫຼວງວຽງຈັນ, ເຊິ່ງພາຍຫຼັງໄດ້ຮັບແຈ້ງເຫດ ເຈົ້າໜ້າທີ່ຕຳຫຼວດພະແນກສະກັດກັ້ນ ແລະ ຕ້ານອັກຄີໄພ ປກສ ນະຄອນຫຼວງວຽງຈັນ ໄດ້ນຳກຳລັງເກືອບ 30 ຄົນ ພ້ອມດ້ວຍລົດມອດໄຟ 6 ຄັນ ເພື່ອສະກັດກັ້ນ ແລະ ດັບມອດໄຟຢ່າງໄວວາ. ແຕ່ເນື່ອງຈາກໂຮງງານດັ່ງກ່າວເປັນໂຮງງານຜະລິດແກັດເຈ້ຍ ເພື່ອຈຳໜ່າຍຢູ່ພາຍໃນ ແລະ ສົ່ງອອກຕ່າງປະເທດ ດັ່ງນັ້ນ ພາຍໃນໂຮງງານຈິ່ງປະກອບດ້ວຍກໍ້ເຈ້ຍ ຂະໜາດໃຫຍ່ ເປັນຈຳນວນຫຼວງຫຼາຍ ຈຶ່ງເຮັດໃຫ້ການປະຕິບັດໜ້າທີ່ດັບມອດໄຟຂອງເຈົ້າໜ້າທີ່ຕຳຫຼວດມີຄວາມຫຍຸ້ງຍາກ ເຊິ່ງນັບແຕ່ເກີດເຫດໄຟ້ໄໝ້ ປະມານເວລາ 23 ໂມງຂອງມື້ຄືນນີ້ ຈົນເຖິງປະຈຸບັນນີ້ ແມ່ນຍັງບໍ່ທັນສາມາດດັບມອດ ແລະ ຄວບຄຸມໄຟໄວ້ໄດ້ເທື່ອ ເຊິ່ງເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານອັກຄີໄພ ພວມສືບຕໍ່ປະຕິບັດໜ້າທີ່ ໃນການສະກັດກັ້ນ ແລະ ດັບມອດໄຟ ດ້ວຍຄວາມເອົາໃຈໃສ່, ການປະຕິບັດໜ້າທີ່ຜ່ານມາຫຼາຍຊົ່ວໂມງ ເຖິງວ່າມີຄວາມອິດເມື່ອຍ ແຕ່ກໍ່ບໍ່ໄດ້ຢຸດພັກ ເພື່ອເຮັດໃຫ້ການດັບມອດໄຟຄັ້ງນີ້ສຳເລັດໂດຍໄວ.

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນຂັ້ນຕົ້ນໃຫ້ຮູ້ວ່າ: ໂຮງງານດັ່ງກ່າວເປັນຂອງທ້າວຢາງເຈິນອີ ອາຍຸ 45 ປີ ເຊິ່ງເປັນຊາວໄຕ້ຫວັນທີ່ໄດ້ເຂົ້າມາຂໍອະນຸຍາດສຳປະທານ ແລະ ສ້າງຕັ້ງໂຮງງານກ່ຽວກັບການຜະລິດແກັດເຈ້ຍ ສຳລັບຈຳໜ່າຍຢູ່ພາຍໃນ ແລະ ສົ່ງອອກຕ່າງປະເທດ, ສຳລັບການປະເມີນມູນຄ່າເສຍຫາຍໃນຂັ້ນຕົ້ນແມ່ນປະມານ 5 ລ້ານໂດລາ ຫຼືເທົ່າກັບປະມານ 47 ຕຶ້ກວ່າກີບ. ສ່ວນສາເຫດຂອງການເກີດເຫດໄຟໄໝ້ໃນຄັ້ງນີ້ ແມ່ນຍັງຢູ່ໃນຂັ້ນຕອບການສືບສວນ-ສອບສວນຂອງເຈົ້າໜ້າທີ່ຕຳຫຼວດ.

 

Off

Comments are closed.