12th May2021

ຂະແໜງສື່ມວນຊົນ ຫາລືວຽກງານໂຄສະນາ ເພື່ອຮັບປະກັນໃຫ້ສັງຄົມໄດ້ຮັບຂໍ້ມູນຂ່າວສານທີ່ຖືກຕ້ອງ

by somchan

ໃນວັນທີ 11 ພຶດສະພາ 2021, ຂະແໜງສື່ມວນຊົນ ນັບທັງສື່ເອເລັກໂຕຣນິກ ແລະ ສື່ສິ່ງພິມ ເຊິ່ງນໍາໂດຍ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ພ້ອມກັນປຶກສາຫາລືວຽກງານທີ່ໄດ້ເຮັດຜ່ານມາກ່ຽວກັບການໂຄສະນາ ໂດຍສະເພາະການຕ້ານຫາງສຽງທີ່ບໍ່ດີ, ຕ້ານຂ່າວລື-ຂ່າວປອມທີ່ເກີດຂຶ້ນ ນັບຕັ້ງແຕ່ເລີ່ມຕົ້ນຂອງການລະບາດພະຍາດໂຄວິດ-19 ຮອບໃຫມ່ ຈົນມາຮອດປັດຈຸບັນ.

ໂອກາດນີ້, ທ່ານ ສົມສະຫວາດ ພົງສາ ຫົວຫນ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທັງເປັນຫົວຫນ້າຫນ່ວຍງານໂຄສະນາ ໄດ້ກ່າວວ່າ: ກອງປະຊຸມຄັ້ງນີ້ ເປັນກອງປະຊຸມສືບເນື່ອງຈາກຂໍ້ຕົກລົງການແຕ່ງຕັ້ງຄະນະສະເພາະກິດດ້ານການຕ້ານ ແລະ ແກ້ໄຂຜົນກະທົບຈາກການລະບາດເຊື້ອພະຍາດໂຄວິດ-19 ຂອງກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເຊິ່ງໄດ້ປະເມີນຄືນວຽກການໂຄສະນາທັງຫມົດ ເປັນຕົ້ນແມ່ນບັນຫາງສຽງທີ່ບໍ່ດີ, ບັນຫາຂ່າວລື-ຂ່າວປອມ, ມີຜົນກະທົບແນວໃດ ແລະ ໄດ້ມີການແກ້ໄຂແນວໃດ ເພື່ອພ້ອມກັນປຶກສາຫາລື ແລະ ຫາວິທີທາງແກ້ໄຂບັນຫານັ້ນໆໃນຕໍ່ຫນ້າ ແນ່ໃສ່ຮັບປະກັນໃຫ້ສັງຄົມໄດ້ ຮັບຂໍ້ມູນຂ່າວສານທີ່ຖືກຕ້ອງ, ຊັດເຈນ ແລະ ທັນເຫດການ ໂດຍສະເພາະກ່ຽວກັບການລະບາດຂອງ ພະຍາດດັ່ງກ່າວ, ວິທີການປ້ອງກັນຕົນເອງທີ່ຖືກຕ້ອງ ແລະ ບັນຫາອື່ນໆ.

ຂະແຫນງສື່ມວນຊົນຢູ່ສູນກາງ ບໍ່ແມ່ນເຮັດວຽກຢູ່ສະເພາະແຕ່ສູນກາງເທົ່ານັ້ນ ແຕ່ລວມໄປທັງຫມົດໃນຂອບເຂດທົ່ວປະເທດ, ສະນັ້ນທຸກໆບັນຫາວຽກງານໂຄສະນາທີ່ຈະດໍາເນີນນັບແຕ່ນີ້ຈົນຮອດວັນທີ 20 ພຶດສະພາ 2021 ໄດ້ປຶກສາຫາລືກັນ ແລະ ວາງແຜນເປັນອັນລະອຽດອອກມາ, ເຊິ່ງຜົນສະຫລຸບແມ່ນຈະແຈ້ງໃຫ້ສື່ມວນຊົນຮັບຊາບ ແລະ ເຮັດບົດລາຍງານໃຫ້ລັດຖະມົນຕີ ກໍຄືສະເຫນີໃຫ້ຄະນະສະເພາະກິດກະຊວງຮັບຊາບເພື່ອພິຈາລະນາ.

Off

Comments are closed.