13th May2021

ເຈົ້າຄອງ ນະຄອນຫຼວງວຽງຈັນ ລົງຊີ້ນໍາວຽກງານປ້ອງກັນສະກັດກັ້ນພະຍາດໂຄວິດ-19 ຢູ່ ປກສ ນະຄອນຫຼວງວຽງຈັນ

by somchan

ໃນວັນທີ 11 ພຶດສະພາ 2021, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ລົງພົບປະຢ້ຽມຢາມ ແລະ ຊີ້ນໍາວຽກງານປ້ອງກັນສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ກອງບັນຊາການ ປກສ ນະຄອນຫຼວງວຽງຈັນ ໂດຍມີ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ມີ ຄະນະພັກ-ຄະນະບັນຊາ, ບັນດາຫ້ອງ, ກອງພັນປ້ອງກັນເຄື່ອນທີ ເຂົ້າຮ່ວມ.

ພັນເອກ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ລາຍງານ ສະພາບປະກົດການຫຍໍ້ທໍ້ທີ່ເກີດຂຶ້ນ ໂດຍໃຫ້ຮູ້ວ່າ: ໃນອາທິດຜ່ານມາ ມີປະກົດການຫຍໍ້ທໍ້ເກີດຂຶ້ນທັງໝົດ 24 ເລື່ອງ, ແກ້ໄຂໄດ້ 13 ເລື່ອງ, ພົ້ນເດັ່ນກວ່າໝູ່ແມ່ນ ບັນຫາລັກຊັບ ເກີດຂຶ້ນ 9 ເລື່ອງ, ອຸບັດຕິເຫດ 4 ເລື່ອງ ແລະ ອັກຄີໄພ 3 ເລື່ອງ, ກັກຕົວຜູ້ກະທໍາຜິດໄດ້ 22 ຄົນ. ສໍາລັບ ການຈັດຕັ້ງປະຕິບັດວຽກງານປ້ອງກັນສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ກອງບັນຊາການ ປກສ ນະຄອນຫຼວງວຽງຈັນ ແມ່ນໄດ້ສືບຕໍ່ສຸມໃສ່ 12 ວຽກຄື: ສຸມໃສ່ໂຄສະນາ, ເຜີຍແຜ່ຄໍາສັ່ງ, ຄໍາແນະນໍາ, ແຈ້ງການຕ່າງໆ ແລະ ຜົນຮ້າຍການແຜ່ລະບາດຂອງພະຍາດໂຄວິດ-19; ກໍາແໜ້ນສະພາບການ ແລະ ແກ້ໄຂຕໍ່ກັບການສ້າງສະຖານະການທຸກຮູບແບບທາງສື່ອອນລາຍ-ເຟສບຸກ ທີ່ເປັນການໂຄສະນາໃສ່ຮ້າຍປ້າຍສີ, ຂ່າວປອມ ແລະອື່ນໆ; ຄຸ້ມຄອງການເຂົ້າ-ອອກດ່ານ ແລະ ປ້ອງກັນການລັກລອບຂ້າມຕາມແຊນແດນ; ຕັ້ງດ່ານກວດກາປະຕູເຂົ້າ-ອອກ ນະຄອນຫຼວງວຽງຈັນ ເພື່ອຕັກເຕືອນ ແລະ ຈໍາກັດການໄປມາຂອງພົນລະເມືອງ; ກວດກາ, ຕັກເຕືອນຈໍາກັດການໄປ-ມາຂອງພົນລະເມືອງ ຢູ່ພື້ນທີ່ບ້ານສີແດງ; ເຮັດວຽກງານໄລ່ຊອກ-ໄລ່ຫາ ຜູ້ຕິດເຊຶ່ອທີ່ບໍ່ເຂົ້າປິ່ນປົວ ເພື່ອເຂົ້າປິ່ນປົວ ແລະ ດໍາເນີນການສືບສວນ-ສອບສວນ ບັນດາຮ້ານທີ່ແຜ່ເຊື່ອ ແລະ ຜູ້ທີ່ແຜ່ເຊື່ອ; ຈັດຕັ້ງກໍາລັງສົມທົບ ແລະ ຊ່ວຍເຫຼືອບັນດາຂະແໜງການທີ່ກ່ຽວຂ້ອງ, ກວດກາ, ຄວບຄຸມບັນດາໜ່ວຍທຸລະກິດຕະຫຼາດ ແລະ ຮ້ານຂາຍເຄື່ອງຕ່າງໆ ບໍ່ໃຫ້ສວຍໂອກາດຂຶ້ນລາຄາສິນຄ້າ; ຈັດຕັ້ງກໍາລັງສົມທົບກັບຄະນະສະເພາະກິດ ຄຸ້ມຄອງປ້ອງກັນສະຖານທີ່ກັກກັນ ແລະ ສະຖານທີ່ຄັດກອງກວດຫາເຊື້ອໂຄວິດ-19; ສະກັດກັ້ນ ແລະ ແກ້ໄຂສະພາບຄວາມບໍ່ເປັນລະບຽບຮຽບຮ້ອຍໃນສັງຄົມ; ຮັກສາຄວາມປອດໄພຢູ່ຄ້າຍຄຸມຂັງ-ດັດສ້າງ, ຄ້າຍຄຸມຂັງຊົ່ວຄາວ ແລະ ກຽມສະຖານທີ່ກັກຂັງແຍກກປ່ຽວຜູ້ຖືກຫາເຂົ້າໃໝ່ ເພື່ອບໍ່ໃຫ້ມີການແຜ່ລະບາດໃນຄ້າຍຄຸມຂັງ; ຕິດຕາມຄຸ້ມຄອງກໍາລັງກຽມພ້ອມຊ່ວຍເຫຼືອຄົນເຈັບ, ຜູ້ຕິດເຊື່ອ ແລະ ກຽມພ້ອມສະຖານທີ່ກັກກັນ ແລະ ສະໜອງອຸປະກອນທີ່ຈໍາເປັນໃຫ້ກໍາລັງ ປກສ ນະຄອນຫຼວງວຽງຈັນ; ສຸມໃສ່ຈັດຕັ້ງກໍາລັງເຂົ້າປະຈໍາການຕະຫຼອດ 24 ຊົ່ວໂມງ ແລະ ກຽມພາຫະນະຂົນສົ່ງ ແລະ ສ່ອງແສງລາຍງານໃຫ້ທັນເວລາ.

ພ້ອມດຽວກັນນັ້ນ, ທ່ານ ອາດສະພັງທອງ ສີພັນດອນ ເຈົ້າຄອງ ນະຄອນຫຼວງວຽງຈັນ ໄດ້ເນັ້ນໃຫ້ຄະນະພັກ-ຄະນະບັນຊາ ກອງບັນຊາການ ປກສ ນະຄອນຫຼວງວຽງຈັນ ຈົ່ງເພີ່ມທະວີເອົາໃຈໃສ່ຜັນຂະຫຍາຍ ຄໍາສັ່ງເລກທີ 15/ນຍ ລົງວັນທີ 21 ເມສາ 2021 ວ່າດ້ວຍການເພີ່ມທະວີການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານການແຜ່ລະບາດພະຍາດໂຄວິດ-19 ໃຫ້ນາຍ ແລະ ພົນຕໍາຫຼວດ ທີ່ກໍາລັງປະຕິບັດໜ້າທີ່ຢູ່ຈຸດປ້ອງກັນຕ່າງໆ  ໃຫ້ກໍາໄດ້ເຖິງຄວາມໝາຍຄວາມສໍາຄັນຂອງຄໍາສັ່ງເລກທີ 15/ນຍ ແລ້ວນໍາໄປຈັດຕັ້ງປະຕິບັດຢ່າງເຂັ້ມງວດ ເພື່ອຮັບປະກັນໃນການປະຕິບັດໜ້າທີ່ວຽກງານ ໂດຍສະເພາະການຕິດຕາມ, ກວດກາການລັກລອບເຂົ້າ-ອອກທີ່ບໍ່ຖືກຕ້ອງຢູ່ ນວ; ພ້ອມທັງສຸມໃສ່ກວດກາສະຖານທີ່ຕ່າງໆທີ່ມີການຊຸມນຸມ, ເປີດເພງສຽງດັງ ເພາະອາດມີຄວາມສ່ຽງໃຫ້ເຊື້ອພະຍາດໂຄວິດ-19 ແຜ່ລະບາດອອກເປັນວົງກວ້າງ ຖ້າພົບເຫັນຜູ້ທີ່ລະເມີດ ໃຫ້ປະຕິບັດຕາມມາດຕະການຢ່າງເຂັ້ມງວດ ໂດຍບໍ່ມີຂໍ້ຍົກເວັ້ນ. ນອກນີ້, ໃຫ້ສືບຕໍ່ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ຕ່າງໆ ເປັນຕົ້ນແມ່ນ ບັນຫາຢາເສບຕິດ, ປຸ້ນຈີ້, ຊິງຊັບ, ລັກຊັບ, ບັນຫາອັກຄີໄພ ແລະອື່ນໆ ເພື່ອເຮັດໃຫ້ ນະຄອນຫຼວງວຽງຈັນ ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ໂດຍພື້ນຖານ.

Off

Comments are closed.