14th May2021

ພິທີມອບ-ຮັບໂຄງການຕິດຕັ້ງກ້ອງວົງຈອນປິດຕາມເສັ້ນທາງຫຼວງ ຂອງແຂວງ ວຽງຈັນ

by somchan

ພິທີມອບ-ຮັບໂຄງການຕິດຕັ້ງກ້ອງວົງຈອນປິດຕາມເສັ້ນທາງຫຼວງຂອງແຂວງວຽງຈັນ ລະຫວ່າງບໍລິສັດ FSG ລາວ ບໍລິການຄວາມປອດໄພຈໍາກັດຜູ້ດຽວ ກັບກອງບັນຊາການ ປກສ ແຂວງວຽງຈັນ ໄດ້ຈັດໃນວັນທີ 12 ພຶດສະພາ ນີ້ ໂດຍການເປັນປະທານຂອງ ພັທ ບຸນນອງ ຊາມຸນຕີ ຮອງຫົວໜ້າກອງບັນຊາການ ປກສ ແຂວງ, ມີ ພັທ ແຫວນເພັດ ໂພມະຫາລາດ, ມີຄະນະກຳມະການຈາກພະແນກ ການ, ກົມກອງກ່ຽວຂ້ອງ ພ້ອມດ້ວຍບໍລິສັດ FSG ລາວ ບໍລິການຄວາມປອດໄພຈໍາກັດຜູ້ດຽວເຂົ້າຮ່ວມ.

ທ່ານ ນາງ changnannan ຕາງໜ້າບໍລິສັດ FSG ລາວ ບໍລິການຄວາມປອດໄພຈໍາກັດຜູ້ດຽວ ໄດ້ລາຍງານໂດຍຫຍໍ້ກ່ຽວກັບຜົນສໍາເລັດຂອງໂຄງການຕິດຕັ້ງກ້ອງວົງຈອນປິດຕາມເສັ້ນທາງຫຼວງຂອງແຂວງວຽງຈັນ ແມ່ນສຳເລັດ 100% ໃນມູນຄ່າ 390,474,000 ກີບ ລວມມີ 6 ຈຸດຄື: ຈຸດວົງວຽນໂພນໂຮງ, ວົງວຽນໂພນໝີ, ຈຸດເສັ້ນທາງຕໍ່ໜ້າກອງບັນຊາການທະຫານແຂວງ, ກອງບັນຊາການ ປກສ ແຂວງ, ວົງວຽນເມືອງເກົ່າ ແລະ ຢູຫ້ອງວ່າການປົກຄອງແຂວງ, ມີທັງໝົດ 5 ໜ້າວຽກຄື: ວຽກຕິດຕັ້ງຈໍຄວບຄຸມພາບ, ວຽກແລ່ນສາຍໄຍແກ້ວ, ວຽກຕິດຕັ້ງເສົາ, ວຽກຕິດຕັ້ງກ້ອງ ແລະວຽກໄຟຟ້າ ຜ່ານການລົງກວດ ກາແຕ່ລະວຽກແມ່ນສຳເລັດແລ້ວ 100% ແມ່ນງົບປະມານຂອງແຂວງທັງໝົດ ເຊິ່ງເປັນໂຄງການໜຶ່ງ ເພື່ອພັດທະນາເສດຖະກິດສັງຄົມຢູ່ພາຍໃນແຂວງວຽງຈັນ ໃຫ້ເຕີບໃຫຍ່ຂະ ຫຍາຍຕົວຢ່າງກວ້າງຂວາງ, ເປັນການຍົກສູງຄວາມສາມາດໃນວຽກງານປ້ອງກັນຄວາມສະຫງົບ, ເປັນໂສມໜ້າໃໝ່ຂອງແຂວງວຽງຈັນ, ຍົກສູງຄວາມປອດໄພໃຫ້ແກ່ປະຊາຊົນບັນດາເຜົ່າ, ເພື່ອຕິດຕາມຄວາມເປັນລະບຽບຮຽບຮ້ອຍຂອງການສັນຈອນໃຫ້ເຂົ້າສູ່ລະບຽບຫຼັກການ, ຍົກສູງວຽກງານຕ້ານການກໍ່ອາຊະຍາກຳເປັນຕົ້ນປຸ້ນຈີ້, ຊິງຊັບ, ຂີ້ລັກງັດແງະ, ອາລະວາດຕີກັນ, ຂີ່ລົດກວນເມືອງ ແລະອຶ່ນຯ ໂຄງການດັ່ງນີ້ແມ່ນໄດ້ມອບໃຫ້ກອງບັນຊາການ ປກສ ແຂວງວຽງຈັນ ເປັນຜູ້ຄວບຄຸມ, ປົກປັກຮັກສາ ແລະນຳໃຊ້ໃຫ້ໄດ້ຮັບຜົນປະໂຫຍດສູງສຸດ.

ໃຫ້ກຽດເຊັນມອບໂດຍແມ່ນທ່ານ Xionghaibo ຕາງໜ້າບໍລິສັດ FSG ລາວ ບໍລິການຄວາມປອດໄພຈໍາກັດຜູ້ດຽວ ຜູ້ຮັບເໝົາ ແລະ ພັທ ບຸນນອງ ຊາມຸນຕີ ຮອງຫົວໜ້າກອງບັນຊາການ ປກສ ແຂວງ ເຈົ້້າຂອງໂຄງການ ມີຄະນະກຳມະການ ແລະວິຊາການກ່ຽວຂ້ອງເຂົ້າເປັນສັກຂີພະຍານ.

Off

Comments are closed.