16th May2021

ໄຟໄໝ້ ເຮືອນຢູ່ບ້ານສີບຸນເຮືອງທ່າ ເສຍຫາຍ 4 ຮ້ອຍກວ່າລ້ານກິບ

by somchan

ໃນວັນທີ 15 ພຶດສະພາ 2021 ໄດ້ເກີດເຫດໄຟໄໝ້ເຮືອນປະຊາຊົນ ຢູ່ບ້ານສີບຸນເຮືອງທ່າ ເມືຶອງສີໂຄດຕະບອງ ນະຄອນຫຼວງວຽງຈັນ ເຫດການຄັ້ງນີ້ແມ່ນສ້າງຜົນເສຍຫາຍ 4 ຮ້ອຍກວ່າລ້ານກີບ ເຊິ່ງສາເຫດເກີດຈາກໄຟຟ້າລັດວົງຈອນ.

ພັທ ຄໍາເພັດ ດາລາວົງ ຫົວໜ້າພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ຫ້ອງຕໍາຫຼວດ ກອງບັນຊາການ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນເວລາ 9ໂມງ40 ນາທີ ໄດ້ຮັບແຈ້ງວ່າມີໄຟໄໝ້ເຮືອນປະຊາຊົນຢູ່ບ້ານສີບຸນເຮືອງທ່າ ເມືຶອງສີໂຄດຕະບອງ ນະຄອນຫຼວງວຽງຈັນ ທາງພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ຈຶ່ງໄດ້ຮີບຮ້ອນຈັດຕັ້ງກໍາລັງພ້ອມດ້ວຍພາຫະນະມອດໄຟຈໍານວນ 3 ຄັນ. ລົງແກ້ໄຂເຫດການດັ່ງກ່າວ ໂດຍໃຊ້ເວລາ 30 ນາທີ ໃນການດັບມອດ. ຜ່ານການເກັບກໍາຂໍ້ມູນຮູ້ໄດ້ວ່າ: ໄຟໄໝ້ຄັ້ງນີ້ແມ່ນເຮືອນຂອງ ທ້າວ ລັງກອນ  ອາຍຸ 44 ປີ ອາຊີພະນັກງານ ເຮືອນຫຼັງດັ່ງກ່າວແມ່ນເຮືອນ 2 ຊັ້ນ, ຊັ້ນລຸ່ມກໍ່, ຊັ້ນເທີງແອ້ມດ້ວຍໄມ້ ມຸງສັງກະສີ ສາເຫດແມ່ນເກີດຈາກໄຟຟ້າລັດວົງຈອນຢູ່ຊັ້ນ 2 ແລະ ເກີດແປວໄຟຢ່າງວ່ອງໄວ ລວມມູນຄ່າຜົນເສຍຫາຍ 400 ລ້ານກ່ວາກີບ.

ໃນໄລຍະນີ້ ອາກາດມີຄວາມຮ້ອນອົບເອົ້າ ແລະ ຢູ່ໃນໄລຍະມີການແຜ່ລະບາດຂອງພະຍາດໂຄວິດ -19 ປະຊາຊົນແມ່ນອາໄສຢູ່ເຮືອນ ເຮັດໃຫ້ການໃຊ້ສະແສໄຟຟ້າເພີ່ມຂຶ້ນ ສະນັ້ນ ຂໍຮຽກຮ້ອງໃຫ້ທຸກຄົນຈົ່ງມີສະຕິໃນການຊົມໃຊ້ໄຟຟ້າ ເພື່ອປ້ອງກັນ ແລະ ຫຼີກລ່ຽງບໍ່ໃຫ້ອັກຄີໄພເກີດຂຶ້ນ.

 

Off

Comments are closed.