19th May2021

ລັດຖະມົນຕີກະຊວງ ປກສ ຕ້ອນຮັບທູດຣັດເຊຍ ປະຈຳລາວ

by somchan

ໃນວັນທີ 19 ພຶດສະພາ 2021 ນີ້ ຢູ່ທີ່ກະຊວງປ້ອງກັນຄວາມສະຫງົບ ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂອງທ່ານ ວະລາດີເມຍ ກາລີນີ ເອກອັກຄະລັດຖະທູດແຫ່ງສະຫະພັນຣັດເຊຍ ປະຈຳ ສປປ ລາວ ເພື່ອພົບປະຫາລືວຽກງານການພົວພັນຮ່ວມມື ລະຫວ່າງ ກະຊວງປ້ອງກັນຄວາມສະຫງົບລາວ ແລະ ສະຖານທູດຣັດເຊຍ ປະຈຳລາວ.

ໃນໂອກາດດັ່ງກ່າວທ່ານ ລັດຖະມົນຕິ ກະຊວງປ້ອງກັນຄວາມສະຫງົບ ແລະ ທ່ານ ເອກອັກຄະລັດຖະທູດຣັດເຊຍ ປະຈຳລາວ ຕ່າງກໍ່ໄດ້ແຈ້ງສະພາບການລະບາດ, ການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດຂອງຕົນໃຫ້ກັນຊາບ, ພ້ອມທັງສະແດງຄວາມຂອບໃຈ, ຕໍ່ການພົວພັນຮ່ວມມື, ສະໜັບສະໜູນ ແລະ ຊ່ວຍເຫຼືອດ້ານຕ່າງໆ ລະຫວ່າງລັດຖະບານ ແລະ ປະຊາຊົນທັງສອງປະເທດໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ.

ນອກຈາກນັ້ນ ທັງສອງຝ່າຍຍັງໄດ້ພົບປະແລກປ່ຽນຄຳຄິດເຫັນ  ແລະ ປຶກສາຫາລື ບັນຫາສຳຄັນຕ່າງໆທີ່ພົວພັນກັບການຮ່ວມມືລະຫວ່າງລັດຖະບານ ກໍຄືກຳລັງປ້ອງກັນຄວາມສະຫງົບຂອງຣັດເຊຍ ກັບກຳລັງປ້ອງກັນຄວາມສະຫງົບລາວ ໂດຍມີສະຖານທູດຣັດເຊຍປະຈຳລາວເປັນຜູ້ປະສານງານ, ຕະຫຼອດຮອດວຽກງານການພົວພັນຮ່ວມມືໂດຍກົງລະຫວ່າງ ກະຊວງ ປກສ ລາວ ແລະ ສະຖານທູດຣັດເຊຍ ປະຈຳລາວ.

ເພື່ອກຳນົດທິດທາງ ໃຫ້ແກ່ການພົວພັນຮ່ວມມືກັນໃນການຈັດຕັ້ງປະຕິບັດຢູ່ໃນໄລຍະທີ່ສະພາບການແຜ່ລະບາດຂອງພະຍາດໂຄວິດ-19 ຢູ ສປປ ລາວ ໂດຍສະເພາະແມ່ນຢູ່ນະຄອນຫຼວງວຽງຈັນ ກ້າວເຂົ້າສູ່ໄລຍະທີ່ມີການປ່ຽນແປງທີ່ດີຂື້ນ ແລະ ການຮ່ວມມືໃນໄລຍະຕໍ່ໄປ, ທັງນີ້ກໍ່ເພື່ອເຮັດໃຫ້ການພົວພັນຮ່ວມມືສອງຝ່າຍໃນການປະຕິບັດບັນດາແຜນການຮ່ວມມືຕ່າງໆນັ້ນມີຜົນສຳເລັດ ພ້ອມທັງຖືກຕ້ອງ ແລະ ສອດຄ່ອງກັບຄຳສັ່ງຂອງນາຍົກລັດຖະມົນຕີ ແລະ ມາດຕະການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.

Off

Comments are closed.