19th May2021

ຄະນະຊ່ຽວຊານແພດຈີນ ສໍາເລັດການປະຕິບັດໜ້າທີ່ຕ້ານໂຄວິດ-19 ຢູ່ ສປປ ລາວ

by somchan

ໃນວັນທີ 18 ພຶດສະພາ 2021 ນີ້, ດຣ ບຸນແຝງ ພູມມະໄລສິດ ລັດຖະມົນຕີກະຊວງ ສາທາລະນະສຸກ ຕາງໜ້າໃຫ້ລັດຖະບານ ແຫ່ງ ສປປ ລາວ ມອບໃບຍ້ອງຍໍໃຫ້ແກ່ຄະນະຊ່ຽວ ຊານການແພດຈີນ 25 ທ່ານ ເພື່ອຍ້ອງຍໍຜົນງານອັນພົ້ນເດັ່ນ ໃນການປະກອບສ່ວນຊ່ວຍເຫລືອວຽກງານ ສາທາລະນະສຸກຂອງລາວ, ໂດຍສະເພາະໃນວຽກງານການຕ້ານພະຍາດໂຄວິດ-19 ພາຍຫລັງສໍາເລັດການປະຕິບັດພາລະກິດຢູ່ ສປປ ລາວ, ໂດຍເປັນກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19.

ຄະນະຜູ້ຊ່ຽວຊານການແພດຈີນ ຊຸດນີ້ປະກອບມີ 25 ທ່ານ ທີ່ລັດຖະບານ ສປ ຈີນ ມອບໝາຍໜ້າທີ່ຊ່ວຍເຫລືອ ສປປ ລາວ ໃນການຕ້ານພະຍາດໂຄວິດ-19, ເຊິ່ງເປັນຊ່ຽວຊານໃນດ້ານລະບາດວິທະຍາ, ການຂ້າເຊື້ອ, ກວດກາຈາກຫ້ອງກວດວິເຄາະ, ການຄຸ້ມຄອງການຕິດເຊື້ອ, ພະແນກມໍລະສຸມ ແລະ ອື່ນໆ. ໃນເວລາ 2 ອາທິດ ທີ່ປະຕິບັດໜ້າທີ່ຢູ່ລາວ, ພວກເຂົາໄດ້ສໍາຫລວດຄົ້ນຄວ້າປິ່ນປົວ, ໂຮງໝໍພາກສະໜາມ, ຫ້ອງທົດລອງກວດພະຍາດ, ສະຖານທີ່ສັກຢາວັກແຊງ, ສະຖານທີ່ກັກບໍລິເວນ ແລະ ອື່ນໆ ຫລາຍກວ່າ 40 ໜ່ວຍງານ ເພື່ອເກັບກໍາຂໍ້ມູນ, ພ້ອມແລກປ່ຽນຄໍາເຫັນທາງດ້ານວິຊາການກັບພາກສ່ວນທີ່ກ່ຽວຂ້ອງ; ຝຶກອົບຮົມວິຊາສະເພາະ ໃຫ້ແກ່ບຸກຄະລາກອນດ້ານການແພດ, ສາທາລະນະສຸກ ແລະ ຂະແໜງທີ່ກ່ຽວຂ້ອງຫລາຍກວ່າ 20 ຄັ້ງ ເປັນຕົ້ນແມ່ນ ການຄວບຄຸມການລະບາດຢູ່ໂຮງໝໍ, ການຈໍາແນກຄົນເຈັບອາການໜັກ ແລະ ອື່ນໆ.

ໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ຕີລາຄາສູງ ຕໍ່ການຊ່ວຍເຫລືອຢ່າງທັນການຂອງ ສປ ຈີນ ໃນຄັ້ງນີ້, ກໍ່ຄືຫລາຍຄັ້ງທີ່ຜ່ານມາ ໄດ້ສະແດງອອກຢ່າງຈະແຈ້ງທີ່ສຸດ ເຖິງຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ຂອງ ພັກ, ລັດ ແລະ ປະຊາຊົນຈີນ ທີ່ມີຕໍ່ພັກ, ລັດ ແລະ ປະຊາຊົນລາວ ໃນຍາມທີ່ມີຄວາມຫຍຸ້ງຍາກທີ່ສຸດ. ພ້ອມນີ້, ຍັງສະແດງເຖິງຄວາມເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອອັນມີມາແຕ່ດົນນານ, ທັງເປັນຄູ່ຮວມຍຸດທະສາດໝັ້ນຄົງຕາມທິດສີ່ດີ ໃນການເປັນຄູ່ຮ່ວມຊາ ຕາກໍາສັງຄົມນິຍົມ ລາວ-ຈີນ, ຈີນ-ລາວ ເຊິ່ງໄດ້ຮັບການເສີມຂະຫຍາຍເຂົ້າສູ່ລວງເລິກນັບມື້ບໍ່ຢຸດຢັ້ງ ທັງເປັນການປະກອບສ່ວນອັນສໍາຄັນເຂົ້າ ໃນການສະເຫລີມສະຫລອງວັນສ້າງຕັ້ງລະຫວ່າງການທູດຂອງສອງປະເທດຄົບຮອບ 60 ປີ ແລະ ປີນີ້ຍັງເປັນປີມິດຕະພາບ ລາວ-ຈີນ, ຈີນ-ລາວ ນໍາອີກ.

Off

Comments are closed.