21st May2021

ຫລາຍພາກສ່ວນສືບຕໍ່ມອບເຄື່ອງຊ່ວຍເຫລືອ ໃຫ້ກະຊວງຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ຕ້ານໂຄວິດ-19

by somchan

ຫລາຍພາກສ່ວນສືບຕໍ່ມາມອບເຄື່ອງຊ່ວຍເຫລືອ ໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເພື່ອນຳໃຊ້ເຂົ້າໃນວຽກງານປ້ອງກັນ ແລະ ຕ້ານການແຜ່ລະບາດພະຍາດໂຄວິດ-19 ພິທີມອບ-ຮັບດັ່ງກ່າວ, ໄດ້ຈັດຂຶ້ນໃນວັນທີ 20 ພຶດສະພາ 2021 ຕາງໜ້າຮັບໂດຍ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໂດຍມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ການມອບເຄື່ອງຊ່ວຍເຫລືອໃນຄັ້ງນີ້, ມີສະມາຄົມທຸລະກິດຊາວຊຽງຂວາງ ມອບເຈວລ້າງມື 50 ກ່ອງ, ຜ້າປິດປາກ-ດັງ 30.000 ອັນ, ສະເປຂ້າເຊື້ອ 50 ກ່ອງ, ນໍ້າຢາຂ້າເຊື້ອ 10 ຕຸກ ແລະ ນໍ້າດື່ມ 30 ແພັກ, ລວມມູນຄ່າ 20.000.000 ກີບ, ສະຫະພັນກິລາ ອີສະປອດ ແຫ່ງຊາດ ກຸ່ມ PUBG MOBILE LAOS ຮ່ວມກັບ ບໍລິສັດ ລາວຈະເລີນສິນ ຈຳກັດ ມອບເງິນສົດ ຈຳນວນ 11.500.000 ກີບ.

ໃນໂອກາດນີ້, ທ່ານ ສະຫວັນຄອນ ລາຊະມຸນຕີ ໄດ້ສະແດງຄວາມຂອບໃຈ ຕໍ່ບັນດາບໍລິສັດ ທີ່ໄດ້ໃຫ້ການສະໜັບສະໝູນ ໃນການຊ່ວຍເຫລືອໃນຄັ້ງນີ້. ພ້ອມທັງ, ຢືນຢັນວ່າຈະນຳເອົາເຄື່ອງຊ່ວຍ ເຫລືອໃນຄັ້ງນີ້, ໄປໝູນໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ກໍຄື ພາຍໃນກະຊວງ ຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ໃຫ້ເກີດຜົນປະໂຫຍດສູງສຸດ, ສ່ວນນໍ້າຢາຂ້າເຊື້ອ ແລະ ເຈວລ້າງມື ຈະນໍາໄປແຈກຢາຍໃຫ້ ບັນດາສື່ມວນຊົນອ້ອມຂ້າງກະຊວງ.

Off

Comments are closed.