21st May2021

ປະທານປະເທດ ສໍາເລັດການເຂົ້າຮ່ວມ ກອງປະຊຸມ ສາກົນວ່າດ້ວຍ ອະນາຄົດຂອງອາຊີ ຄັ້ງທີ 26 ໃນຮູບແບບທາງໄກ

by somchan

ໃນວັນທີ 21 ພຶດສະພາ 2021 ທີ່ນະຄອນຫລວງວຽງຈັນ, ທ່ານ ທອງລຸນ ສີສຸລິດ ປະ ທານປະເທດ ແຫ່ງ ສປປ ລາວ ໄດ້ຂຶ້ນກ່າວປາໄສ ໃນກອງປະຊຸມສາກົນວ່າດ້ວຍ ອະນາຄົດຂອງອາຊີ ຄັ້ງທີ 26 ພາຍໃຕ້ຫົວຂໍ້: “ການສ້າງຍຸກສະໄໝ ຫລັງໂຄວິດ-19: ບົດບາດຂອງອາຊີ ໃນການຟື້ນຕົວຂອງໂລກ” (Shaping the post-COVID era: Asia’s role in the global recovery), ເຊິ່ງໄດ້ຈັດຂຶ້ນທີ່ປະເທດຍີ່ປຸ່ນ ໂດຍສໍານັກຂ່າວໜັງສືພິມເສດຖະກິດຍີ່ປຸ່ນ (NIKKEI) ໃນຮູບແບບທາງໄກ ໂດຍເຂົ້າຮ່ວມເປັນປະທານຂອງ ທ່ານ ສຶໂຢຊິ ຮາເຊເບະ (Tsuyoshi Hasebe) ປະທານສໍານັກໜັງສືພິມ NIKKEI ແລະ ພາກສ່ວນທຸລະກິດຕ່າງໆ ຂອງຍີ່ປຸ່ນ ເຂົ້າຮ່ວມ.


ໃນບົດກ່າວປາໄສ ຂອງທ່ານ ທອງລຸນ ສີສຸລິດ ໄດ້ຍົກໃຫ້ເຫັນເຖິງບັນຫາທີ່ພົ້ນເດັ່ນຂອງໂລກ ແລະ ສິ່ງທ້າທາຍ ທີ່ພວກເຮົາກໍາລັງປະເຊີນຢູ່ ໃນປັດຈຸບັນ, ພ້ອມທັງຍົກໃຫ້ເຫັນເຖິງ ການວາງແຜນທີ່ມີລັກສະນະຍຸດທະສາດຮ່ວມກັນ ເພື່ອຮັບມືກັບສິ່ງທ້າທ້າຍຕ່າງໆ ພາຍຫລັງໂຄວິດ-19, ບົດບາດຄວາມສໍາຄັນຂອງອາຊີ ໃນການຟື້ນຟູເສດຖະກິດ-ສັງຄົມ ຂອງໂລກ ແລະ ການເພີ່ມທະວີການຮ່ວມມືທີ່ມີຄຸນນະ ພາບ ເພື່ອການພັດທະນາ ທີ່ສອດຄ່ອງກັບຍຸກສະໄໝໃໝ່ ດ້ວຍຄວາມຮັບຜິດຊອບຮ່ວມກັນ. ພ້ອມກັນນີ້, ທ່ານຍັງໄດ້ຍົກໃຫ້ເຫັນເຖິງບົດບາດຂອງ ສປປ ລາວ ໃນການປະກອບສ່ວນຮ່ວມມືຢ່າງຕັ້ງໜ້າ ເຂົ້າໃນຂະບວນການລວມ ເພື່ອກຽມພ້ອມ ແລະ ຮັບມືກັບວິກິດການຕ່າງໆ ໃນປັດຈຸບັນ ແລະ ອາດເກີດຂຶ້ນໃໝ່ ແນໃສ່ປົກປັກຮັກສາສັນຕິພາບ, ສະຖຽນລະພາບ ແລະ ສ້າງເງື່ອນໄຂອັນສະດວກໃຫ້ແກ່ການພັດທະນາ ຮ່ວມກັບວົງຄະນະຍາດສາກົນ ແລະ ກໍ່ໄດ້ຖືໂອກາດສະແດງຄວາມຂອບໃຈ ຕໍ່ປະເທດເພື່ອນມິດ, ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ເພື່ອສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະ ການພື້ນຟູເສດ ຖະກິດ ຫລັງວິກິດການດັ່ງກ່າວ.


ກອງປະຊຸມດັ່ງກ່າວ ເປັນຄັ້ງທີ 5 ທີ່ທ່ານ ທອງລຸນ ສີສຸລິດ ໄດ້ເຂົ້າຮ່ວມ ນັບແຕ່ເຄີຍດໍາລົງຕໍາ ແໜ່ງເປັນຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແລະ ນາຍົກລັດຖະມົນຕີ ແຫ່ງ ສປປ ລາວ, ເຊິ່ງການປາໄສແຕ່ລະຄັ້ງ ໄດ້ສະແດງໃຫ້ເຫັນເຖິງວິໄສທັດທີ່ສອດຄ່ອງກັບສະພາບການຕົວຈິງ ແລະ ປິ່ນອ້ອມຫົວຂໍ້ຂອງກອງປະຊຸມໃນແຕ່ລະຄັ້ງ. ພ້ອມນີ້, ຍັງເປັນການປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມາແຕ່ດົນນານ ກໍຄືການເປັນຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ກວ້າງຂວາງແໜ້ນແຟ້ນ ແລະ ເລິກເຊິ່ງຂຶ້ນກວ່າເກົ່າ.

Off

Comments are closed.