22nd May2021

ຜົນກອງປະຊຸມລັດຖະບານ ສະໄໝສາມັນປະຈໍາເດືອນພຶດສະພາ 2021

by somchan

ກອງປະຊຸມລັດຖະບານ ສະໄໝສາມັນ ປະຈໍາເດືອນພຶດສະພາ 2021 ໄດ້ໄຂຂຶ້ນຢ່າງເປັນທາງການ ໃນວັນທີ 20 ແລະ ໄດ້ອັດລົງ ໃນວັນທີ 21 ພຶດສະພາ 2021 ໂດຍໄດ້ດຳເນີນກອງປະຊຸມຜ່ານລະບົບທາງໄກ, ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຮັບຟັງ, ຄົ້ນຄວ້າປຶກສາຫາລື ແລະ ປະກອບຄຳເຫັນຢ່າງກົງໄປກົງມາ ດ້ວຍຄວາມຮັບຜິດຊອບສູງ ຕໍ່ບັນດາເອກະສານສຳຄັນ ຕ່າງໆເປັນຕົ້ນແມ່ນ:  ບົດລາຍງານຮອບດ້ານ ການຈັດຕັ້ງປະຕິບັດວຽກງານ ຂອງລັດຖະບານ ປະຈໍາເດືອນພຶດສະພາ ແລະ ທິດທາງແຜນວຽກຈຸດສຸມ ເດືອນມິຖຸນາ 2021: ກອງປະຊຸມ ເຫັນດີດ້ານຫລັກການ ຮັບຮອງເອົາເນື້ອໃນຂອງບົດລາຍງານດັ່ງກ່າວ. ສຳລັບແຜນວຽກຈຸດສຸມ ປະຈຳເດືອນມິຖຸນາ 2021 ອີກຄື: ສືບຕໍ່ປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບຂອງພັກ ຢ່າງຕັ້ງໜ້າ, ທັງເພີ່ມທະວີການແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ໃຫ້ຫລຸດໜ້ອຍຖອຍລົງ; ສືບຕໍ່ລາດ ຕະເວນຕາມຊາຍແດນ ລວມທັງ ຢູ່ຕາມສະຖານທີ່ຊຸມຊົນຕ່າງໆ ໃຫ້ເປັນປົກກະຕິ ຕິດພັນກັບການແກ້ໄຂຕົວຈິງ ຕໍ່ກໍລະນີຕ່າງໆທີ່ພົບເຫັນ ຕາມກົດໝາຍ, ລະບຽບການຕ່າງໆໃຫ້ຖືກຕ້ອງ ແລະ ເຂັ້ມງວດກວ່າເກົ່າ.

– ສືບຕໍ່ປັບປຸງບັນດານະໂຍບາຍຕ່າງໆ ທີ່ເປັນສິ່ງກີດຂວາງ ໃຫ້ແກ່ການລົງທຶນຂອງທຸກພາກສ່ວນ ເພື່ອສ້າງເງື່ອນໄຂສະດວກໃຫ້ແກ່ນັກລົງທຶນ ທັງພາຍໃນ ແລະ ຕ່າງປະເທດ ແລະ ຍົກສູງປະສິດທິພາບການບໍລິການປະຕູດຽວ; ຮີບ ຮ້ອນເຈລະຈາ ສັນຍາທົດລອງການພັດທະນາແຮ່ທາດ ຕາມການຕົກລົງຂອງລັດຖະບານ ແລະ ປັບປຸງສັນຍາບັນ ດາໂຄງການສຳປະທານຂະໜາດໃຫຍ່, ລວມທັງ ຢູ່ເຂດເສດຖະກິດພິເສດ ເພື່ອໃຫ້ສອດຄ່ອງກັບວາລະແຫ່ງຊາດ ທາງດ້ານເສດຖະກິດ-ການເງິນ ທີ່ຈະຮັບຮອງໃນຕໍ່ໜ້າ.

– ສືບຕໍ່ຕິດຕາມກວດກາ ຊຸກຍູ້ການຈັດຕັ້ງປະຕິບັດບັນດາໂຄງການ ຕາມກົດໝາຍ ແລະ ລະບຽບການກ່ຽວຂ້ອງ ນັບທັງໂຄງການຂອງລັດ ແລະ ເອກະຊົນ;

– ກະກຽມ ແລະ ສະຫລຸບ ການປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ກຳນົດວຽກຈຸດສຸມ 6 ເດືອນທ້າຍປີ; ສືບຕໍ່ປະຕິບັດແຜນດັດແກ້ງົບປະ ມານ ປີ 2020 ເປັນຕົ້ນ ເງິນເກີນແຜນ; ກະກຽມສ້າງແຜນພັດທະນາເສດຖະກິດ-ສັງຄົມ ປີ 2022 ໃຫ້ທັນກຳນົດເວລາ.

– ສືບຕໍ່ຈັດຕັ້ງປະຕິບັດນະໂຍບາຍຜ່ອນຜັນ ການປະຕິບັດພັນທະຕ່າງໆ ຂອງຜູ້ປະກອບການ, ຫົວໜ່ວຍທຸລະກິດຂະໜາດນ້ອຍ, ຂະໜາດກາງ, ຈຸນລະວິສາຫະກິດ ຕາມທີ່ໄດ້ຮັບຮອງຈາກລັດຖະບານ ໃຫ້ຖືກຕ້ອງ ແລະ ທົ່ວເຖິງ.

– ສືບຕໍ່ສຸມໃສ່ເກັບລາຍຮັບງົບປະມານ ໃຫ້ໄດ້ຕາມຄາດ ໝາຍ ຮັບປະກັນການເບີກຈ່າຍເງິນເດືອນ ແລະ ນະໂຍ ບາຍຕ່າງໆ ໃຫ້ເປັນປົກກະຕິ; ສືບຕໍ່ປັບປຸງເຄຶ່ອງມື ແລະ ກົນໄກການເກັບລາຍຮັບຄຸ້ມຄອງລາຍຈ່າຍງົບປະມານ ໃຫ້ສໍາເລັດໂດຍພື້ນຖານ ເພື່ອຮັບປະກັນການແກ້ໄຂບັນຫາການຮົ່ວໄຫລຂອງງົບປະມານ.

– ສືບຕໍ່ຄຸ້ມຄອງອັດຕາເງິນເຟີ້ ແລະ ອັດຕາແລກປ່ຽນ ລະ ຫວ່າງທະນາຄານ ກັບຮ້ານແລກປ່ຽນເງິນຕາ ບໍ່ໃຫ້ມີຄວາມຫລຸດໂຕນກັນຫລາຍ ແລະ ສາມາດຄວບຄຸມໄດ້; ຄົ້ນຄວ້າອັດຕາດອກເບ້ຍເງິນກູ້ ແລະ ກົນໄກການສະໜອງທຶນ ເພື່ອຊຸກຍູ້ສົ່ງເສີມການຜະລິດພາຍໃນ ແລະ ຊ່ວຍເຫຼືອບັນດາຫົວໜ່ວຍທຸລະກິດ ໃນໄລຍະທີ່ໄດ້ຮັບຜົນກະທົບຈາກການລະບາດຂອງເຊື້ອພະຍາດໂຄວິດ-19.

– ສືບຕໍ່ກະກຽມຄວາມພ້ອມຮອບດ້ານ ເພື່ອຊຸກຍູ້ການຜະລິດລະດູຝົນປີ 2021, ການສະໜອງແນວພັນພືດ, ແນວພັນສັດ ແລະ ເຕັກນິກວິຊາການ ເຂົ້າໃສ່ການຜະລິດກະສິກໍາ ຕາມທ່າແຮງຂອງປະເທດເຮົາ ເພື່ອຄ້ໍາປະກັນຄວາມໝັ້ນຄົງ ທາງດ້ານສະບຽງອາຫານ ໃຫ້ພຽງພໍກັບການບໍລິໂພກພາຍໃນ ໃນຊ່ວງການແຜ່ລະບາດຂອງພະຍາດໂຄວິດ-19 ແລະ ເພື່ອສົ່ງອອກເປັນສິນຄ້າ, ກະກຽມຄວາມພ້ອມ ແລະ ຊຸກຍູ້ຂະບວນການປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ ໃຫ້ເປັນຂະບວນການກວ້າງຂວາງ ໂດຍໃຫ້ສອດຄ່ອງກັບເງື່ອນໄຂ ທີ່ມີການລະບາດ ຂອງພະຍາດໂຄວິດ-19 ຢູ່ແຕ່ລະບໍລິເວນ.

– ສືບຕໍ່ຄຸ້ມຄອງລາຄາສິນຄ້າອຸປະໂພກ ແລະ ບໍລິໂພກ, ພ້ອມທັງຊຸກຍູ້, ສົ່ງເສີມການຊົມໃຊ້ສິນຄ້າພາຍໃນຢ່າງກວ້າງຂວາງ ແລະ ເປັນຮູບປະທໍາ, ເພີ່ມການປະຊາສຳພັນ ໃຫ້ປະຊາຊົນຫັນມານຳໃຊ້ຜະລິດຕະພັນພາຍໃນໃຫ້ຫລາຍຂຶ້ນ.

– ສືບຕໍ່ຕິດຕາມ, ເກັບກຳ, ລາຍງານຂໍ້ມູນອຸທົກກະສາດ, ເຝົ້າລະວັງການປ່ຽນແປງດິນຟ້າອາກາດ ພ້ອມທັງແຈ້ງເຕືອນໃຫ້ປະຊາຊົນຊາບ ແລະ ກຽມຮັບມືຢ່າງທັນການ ເພື່ອຮັບປະກັນບໍ່ໃຫ້ມີການສູນເສຍຊີວິດ ແລະ ຊັບສິນ ຂອງປະຊາຊົນ.

– ສືບຕໍ່ຕິດຕາມປະລິມານນໍ້າ ແລະ ກວດກາບັນດາເຂື່ອນຕ່າງໆ ເພື່ອຮັບປະກັນຄວາມປອດໄພ ແລະ ການບໍລິຫານຈັດການນໍ້າ ບໍ່ໃຫ້ມີຜົນກະທົບຕໍ່ການທຳມາຫາກິນປະຊາຊົນ.

– ກະກຽມຄວາມພ້ອມ ໃນການສ້ອມແປງເສັ້ນທາງ, ແກ້ໄຂບັນຫາດິນເຊາະເຈື່ອນຖົມທາງ ໃນຊ່ວງລະດູຝົນ ເພື່ອຮັບປະກັນການສັນຈອນໄປມາ ໃຫ້ມີຄວາມສະດວກ ແລະ ປອດໄພ. ສືບຕໍ່ຊຸກຍູ້ໂຄງການທາງລົດໄຟ ລາວ-ຈີນ ແລະ ໂຄງການອື່ນໆ ໃຫ້ສາມາດປະຕິບັດໄດ້ຕາມແຜນການ, ພ້ອມນີ້ກອງປະຊຸມຍັງໄດ້ວາງທິດທາງແຜນການວຽກງານຈຸດສຸມຕ່າງໆອີກຫຼາຍວຽກງານເປັນຕົ້ນແມ່ນ: ວຽກງານໃນຂົງເຂດວັດທະນະທຳ-ສັງຄົມ,  ຂົງເຂດການປົກຄອງ ແລະ ຍຸຕິທໍາ, ຂົງເຂດວຽກງານການຕ່າງປະເທດ, ຮ່າງຄຳສັ່ງ ຂອງນາຍົກລັດຖະມົນຕີ ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫລ ຂອງລາຍຮັບງົບປະມານແຫ່ງລັດ, ຮ່າງດຳລັດ ວ່າດ້ວຍການປະຢັດ ແລະ ຕ້ານການຟູມເຟືອຍ, ຮ່າງດຳລັດ ວ່າດ້ວຍລົດບໍລິຫານຂອງລັດ, ບົດລາຍງານ ຄວາມຄືບໜ້າ ໃນການກະກຽມບັນດາຮ່າງກົດໝາຍ ເພື່ອສະເໜີຄະນະປະຈຳສະພາແຫ່ງຊາດ ນຳເຂົ້າພິຈາລະນາ ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊາດທີ IX ເຊິ່ງລັດຖະບານ ຈະສະເໜີຮ່າງກົດໝາຍ 11 ສະບັບ, ໃນນີ້ ມີກົດໝາຍສ້າງໃໝ່ ຈຳນວນ 4 ສະບັບ ແລະ ກົດໝາຍປັບປຸງ ຈຳນວນ 7 ສະບັບ, ຮ່າງຍຸດທະສາດການພັດທະນາພະລັງງານແຫ່ງຊາດ, ຮ່າງແຜນຍຸດທະສາດ ການຫລຸດຜ່ອນຄວາມສ່ຽງໄພພິບັດແຫ່ງຊາດ ປີ 2021 ຫາ 2030 ແລະ ຮ່າງແຜນດໍາເນີນງານແຫ່ງຊາດເພື່ອຄວາມສະເໝີພາບຍິງ-ຊາຍເພື່ອເຮັດໃຫ້ຜົນຂອງກອງປະຊຸມລັດຖະບານ ໃນຄັ້ງນີ້ ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາຕົວຈິງ, ປະທານກອງປະຊຸມ ຈຶ່ງຮຽກຮອງໃຫ້ບັນດາສະມາຊິກລັດຖະບານ ຕະຫລອດຮອດອົງການປົກຄ້ອງທ້ອງຖິ່ນຕ້ອງໄດ້ ຫັນເປັນແຜນປະຕິບັດລະອຽດທີ່ສອດຄ່ອງກັບເງື່ອນໄຂຄວາມສາມາດຕົວຈິງ ຂອງຕົນ ແລະ ຈັດຕັ້ງປະຕິບັດໃຫ້ໄດ້ຮັບຜົນເປັນຢ່າງດີ.

Off

Comments are closed.