22nd May2021

ປະທານສະພາປະຊາຊົນ ນະຄອນຫຼວງວຽງຈັນ ລົງຕິດຕາມ, ຊຸກຍູ້ການປ້ອງກັນສະກັດກັ້ນພະຍາດໂຄວິດ-19 ຢູ່ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ນະຄອນຫຼວງວຽງຈັນ

by somchan

ໃນວັນທີ 20 ພຶດສະພາ 2021, ປອ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ ພ້ອມຄະນະ ໄດ້ລົງພົບປະຢ້ຽມຢາມ ແລະ ຊີ້ນໍາວຽກງານປ້ອງກັນສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຢູ່ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ນະຄອນຫຼວງວຽງຈັນ ໂດຍມີ ພັອ ສຸກພະຈັນ ບຸດດາຄໍາ ຫົວຫນ້າກອງບັນຊາການ ນະຄອນຫຼວງວຽງຈັນ ພ້ອມດ້ວຍພະນັກງານຫຼັກແຫຼ່ງ ເຂົ້າຮ່ວມ.

ໃນໂອກາດນີ້, ພັທ ສີໄພ ໄຊສຸລິຍະວົງສາ ຫົວຫນ້າສູນປິ່ນປົວ ແລະ ຝຶກວິຊາຊີບຜູ້ຕິດຢາເສບ ນະຄອນຫຼວງວຽງຈັນ ໄດ້ລາຍງານສະພາບລວມຂອງສູນ ແລະ ວຽກງານປ້ອງກັນສະກັດກັ້ນ, ຄວບຄຸມ

ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ພາຍໃນສູນ ໂດຍໃຫ້ຮູ້ວ່າ: ພາຍຫຼັງການແຜ່ ລະບາດຂອງພະຍາດໂຄວິດ-19 ທາງສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ໄດ້ເອົາໃຈໃສ່

ປະຕິບັດຕາມຄໍາສັ່ງເລກທີ 15/ນຍ, ຄໍາສັ່ງຂອງຄະນະສະເພາະກິດ ນະຄອນຫຼວງວຽງຈັນ ແລະ ຫນັງສື ແຈ້ງການຂອງ ກອງບັນຊາການ ປກສ ນະຄອນຫຼວງວຽງຈັນ ຢ່າງເຂັ້ມງວດ ເປັນຕົ້ນແມ່ນ ຢຸດເຊົາ

ພົວພັນຄົນພາຍນອກແບບໃກ້ສິດ ແລະ ບໍ່ໃຫ້ຄົນພາຍນອກເຂົ້າມາສູນ ເພື່ອບໍ່ໃຫ້ມີຄວາມສ່ຽງຕໍ່ການ ແຜ່ເຊື້ອພະຍາດໂຄວິດ-19, ປິດຊົ່ວຄາວໃນການຮັບຜູ້ຖືກເຄາະຮ້າຍຈາກສິ່ງເສບຕິດ, ບໍ່ອະນຸຍາດໃຫ້ ຍາດຕິພີ່ນ້ອງຜູ້ຖືກປິ່ນປົວ-ບໍາບັດ ເຂົ້າຢ້ຽມຢາມ ສໍາລັບເຄື່ອງ ແລະ ອາຫານການກິນ ແມ່ນສາມາດ ຝາກໄດ້ ແຕ່ຕ້ອງຜ່ານການກວດກາຂອງເຈົ້າຫນ້າທີ່ປະຈໍາປະຕູເຂົ້າ-ອອກຂອງສູນຢ່າງລະອຽດ, ພະນັກງານທຸກຄົນທີ່ຈະເຂົ້າ-ອອກສູນ ຕ້ອງວັດແທກອຸນຫະພູມ, ຮັກສາໄລຍະຫ່າງ 2 ແມັດ, ໃສ່ຜ້າ ປິດປາກ-ດັງ ແລະ ລ້າງມືດ້ວຍນ້ໍາສະອາດ, ໃສ່ສະບູ ຫຼື ເຈວລ້າງມືທຸກໆຄັ້ງ.

ໃນໂອກາດດຽວກັນ, ທ່ານ ປອ ອານຸພາບ ຕຸນາລົມ ໄດ້ເນັ້ນໃຫ້ຄະນະພັກ-ຄະນະບັນຊາສູນ ປິ່ນປົວ ແລະ ຝຶກວິຊາຊິບຜູ້ຕິດຢາເສບຕິດ ເອົາໃຈໃສ່ສືບຕໍ່ປ້ອງກັນບໍ່ໃຫ້ພະຍາດໂຄວິດ-19 ແຜ່ລະບາດຢູ່ພາຍໃນສູນ, ເຈົ້າຫນ້າທີ່ຕໍາຫຼວດຜູ້ທີ່ຢູ່ນອກ ແລະ ຢູ່ໃນສູນ ໃຫ້ເອົາໃຈໃສ່ປ້ອງກັນຕົນເອງເພື່ອບໍ່ໃຫ້ ພະຍາດດັ່ງກ່າວເກີດຂຶ້ນກັບເຈົ້າຫນ້າທີ່ຢ່າງເດັດຂາດ, ນອກຈາກນີ້, ຕ້ອງຊອກຫາແຫຼ່ງທຶນຈາກສັງຄົມ ໃຫ້ປະກອບສ່ວນເຂົ້າໃນວຽກງານປ້ອງກັນຄວາມສະຫງົບ, ຕ້ອງມີການຖອດຖອນບົດຮຽນກັບຄ້າຍ ຄຸມຂັງອື່ນ ເພື່ອສ້າງລະບົບນ້ໍາໃຊ້ໃຫ້ມີຄວາມສະດວກ, ສະບາຍ ແລະ ພຽງພໍ

Off

Comments are closed.