22nd May2021

ເຈົ້າຄອງນະຄອນຫລວງວຽງຈັນ ເນັ້ນໃຫ້ຜູ້ປະກອບການ ດ້ານກະສິກຳ ຮັກສາມາດຕະຖານໃນການປູກຝັງ

by somchan

ໃນ​ວັນ​ທີ 20 ພຶດສະພາ 2021 ທ່ານ ອາດ​ສະພັງ​ທອງ ສີ​ພັນ​ດອນ ​ເຈົ້າ​ຄອງ​ນະຄອນຫລວງ​ວຽງຈັນ, ພ້ອມ​​ດ້ວຍຄະນະ ​ໄດ້​ລົງ​ຢຽມຢາມ​ເບິ່ງ​ ການ​ຜະລິດກະສິກຳ ສວນໝາກມີ້ ​​ທີ່ບ້ານ​ອີ່​ໄລ​ເໝືອ ​ເມືອງ​ນາ​ຊາຍ​ທອງ ນະຄອນ​ຫລວງ​ວຽງຈັນ​​.

ໂອກາດນີ້ ທ່ານ ​ເຢດດາລາ ອິນ​ສີ​ຊຽງ​ໃໝ່ ຫົວໜ້າຫ້ອງການ​ ບໍລິສັດ ດວງ​ຈະ​ເລີ​ນ ປູກໝາກ​ໄມ້​ໃຫ້ໝາກ ການ​ຄ້າ ​ຂາ​ອອກ-ຂາ​ເຂົ້າ ຈຳກັດ​ຜູ້ດຽວ ​ແຈ້ງໃຫ້​ຮູ້​ວ່າ: ສວນ​ດັ່ງກ່າວ, ​ໄດ້​ເຊົ່າ​ດິນ​ກັບ​ປະຊາຊົນ ທັງໝົດ 184 ​ເຮັກຕາ ​ໄລຍະ​ເວລາ 30 ປີ, ​ໃນ​ເບື້ອ​ງຕົ້ນ ​ໄດ້​ສະ​ເໜີປູກ​ກ້ວຍ​​ເປັນ​ສິນຄ້າ ​ແຕ່​ເນື່ອງ​ຈາກ​ສະຖານ​ທີ່​ຈະ​ນ້ຳໃຊ້ປູກມີນໍ້າ​ບໍ່​ພຽງພໍ​ ດັ່ງ​ນັ້ນ​ຈຶ່ງ​ໄດ້ຫັນ​ມາ​ປູກໝາກມີ້​ແທນ, ​ເຊິ່ງປັດຈຸບັນ​ໄດ້​ບຸກ​ເບີກ​ເນື້ອ​ທີ່ສຳ​ເລັດ​ແລ້ວ 180 ​ເຮັກຕາ, ​ໃນ​ນັ້ນ​ປູກໝາກມີ້ 108 ​ເຮັກຕາ, ປູກໝາກພຸກ 17 ​ເຮັກຕາ ​ແລະ ຈະ​ສື​ບຕໍ່​ປູກໝາກມີ້​ຕື່ມ​ອີກ 47 ​ເຮັກຕາ ​ໃຫ້​ສຳ​ເລັດ​ໃນ​ປີ 2021. ​ແນວ​ພັນໝາກມີ້ ທີ່​ນຳ​ມາ​ປູກ​ ໃນ​ສວນ ​ແມ່ນ​ນຳ​ເຂົ້າ​ຈາກ ປະເທດຫວຽດນາມ,  1 ​ເຮັກຕາ ສາມາດ​ປູກ​ໄດ້ 600 ຕົ້ນ ສະ​ເລ່ຍຜົນລະ​ປູກ ໄດ້​ຮັບ​ປະມານ 15 ​ໂຕນ ​ໃນ​ປີທຳ​ອິດ, ສ່ວນ​ປີ​ທີ 2 ​ແລະ ທີ 3 ຄາດ​ວ່າ​ຜົນລະປູກ​ ຈະ​ເພີ່ມ​ຂຶ້ນ​ປະມານ 30 ​ໂຕນ ​ຕໍ່​ເຮັກຕາ, ຈາ​ກນັ້ນ​ຈະສົ່ງ​ອອກ​ໄປ ສປ ຈີນ 90% ​ແລະ ຂາຍ​ພາຍ​ໃນ 10% ຄາດ​ວ່າ​ຜົນ​ຜະລິດ​ປີ​ທີ 3 ຈະ​ສາມາດ​ສົ່ງໝາກມີ້​ ອອກ​ຂາຍ​ບໍ່​ຫລຸດ 4.500 ​ໂຕນ​ຕໍ່​ປີ.

ພ້ອມນີ້, ທ່ານ ອາດ​ສະພັງ​ທອງ ສີ​ພັນ​ດອນ ກໍ​ໄດ້​ເນັ້ນ​ໝັກ​ເອົາ​ໃຈ​ໃສ່ ​ໃນ​ການ​ຮັກສາ​ບົວລະບັດຜົນ​ຜະລິດ​ໃຫ້​ມີ​ມາດຕະຖານ​ຮັບປະກັນ​ຄຸນ​ນະພາ​ບ ​ແລະ ​ໃຫ້​ເປັນ​ທີ່​ຮອງ​ຮັບ​ຂອງ​ຜູ້​ບໍລິ​ໂພ​ກ ຂອງ​ຕະຫລາດ​ສາກົນ ​ແລະ ຕະຫລາດ​ພາຍ​ໃນ.

 

Off

Comments are closed.