22nd May2021

ການນຳແຂວງຈຳປາສັກ ລົງຕິດຕາມກວດກາຜົນກະທົບ ໄພພິບັດລົມພະຍຸລະດູຮ້ອນ ພັດບ້ານເຮືອນປະຊາຊົນຢູ່ເມືອງໂຂງ

by somchan

ໃນວັນທີ 20 ພຶດສະພາ 2021 ການນຳແຂວງຈຳປາສັກ, ນຳໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ອື່ນໆ ໄດ້ລົງຕິດຕາມກວດກາຜົນກະທົບໄພພິບັດ ຈາກລົມພະຍຸລະດູຮ້ອນ ພັດເຂົ້າໃສ່ບ້ານເຮືອນປະຊາຊົນເຂດ ເມືອງໂຂງ ແຂວງຈໍາປາສັກ. ມີເຮືອນປະຊາຊົນໄດ້ຮັບຜົນກະທົບເປ່ເພເສຍຫາຍ 279 ຫລັງຄາເຮືອນ, ມູນຄ່າເສຍຫາຍປະມານ 1 ຕື້ກວ່າກີບ. ໂດຍການຕ້ອນຮັບຂອງ ທ່ານ ນາງ ຄຳພູ ລິດທິສັກ ເຈົ້າເມືອງໆໂຂງ.

ໂອກາດນີ້ທ່ານ ນາງ ຄຳພູ ລິດທິສັກ ໄດ້ລາຍງານໃຫ້ຮູ້ວ່າ: ໃນຄືນວັນທີ 17 ພຶດ ສະພາ 2021 ເວລາປະ ມານ 21:30 ໂມງ, ໄດ້ເກີດມີລົມພະຍຸພັດ ເຮືອນປະຊາຊົນ ຢູ່ກຸ່ມນາຝັ່ງ, ກຸ່ມຫາດຊາຍຄູນ ແລະ ຈຸດຫົວໂຂງ ຈໍານວນ 10 ບ້ານ, ມີເຮືອນຂອງປະຊາຊົນ ໄດ້ຮັບຜົນກະທົບ ເປ່ເພເສຍຫາຍ 279 ຫລັງຄາເຮືອນ. ກຸ່ມນາຝັ່ງ ມີ ຈໍານວນ 3 ບ້ານ ມີ 94 ຫລັງຄາເຮືອນ, ກຸ່ມຫາດຊາຍຄູນ ມີ 1 ບ້ານ 29 ຫລັງຄາເຮືອນ, ຈຸດຫົວໂຂງ ມີ 6 ບ້ານ, 156 ຫລັງຄາເຮືອນ. ປະເມີນມູນຄ່າເສຍຫາຍ ປະມານ ໜຶ່ງຕື້ສາມຮ້ອຍລ້ານກວ່າກີບ. ເບື້ອງຕົ້ນ ອົງການປົກຄອງເມືອງໂຂງ ໄດ້ຊ່ວຍເຫລືອຄອບຄົວປະຊາຊົນ ຜູ້ບໍ່ມີທີ່ພັກອາໄສ ຢູ່ຈຸດຫົວໂຂງ ມີ: ບ້ານແສນລ່າມ 1 ຄອບຄົວ, ໂຂງຫາດົ້ວ 2 ຄອບຄົວ ແລະ ບ້ານຫາງສັນ 2 ຄອບຄົວ, ການຊ່ວຍເຫລືອປະກອບ ມີ: ສັງກະສີ, ຕະປູ ແລະ ນໍ້າດື່ມ ລວມມູນຄ່າ 4.650.000 ກີບ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ໂອ້ລົມໃຫ້ກຳລັງໃຈ ແລະ ມີຄວາມເປັນຫ່ວງເປັນໃຍ  ຕໍ່ກັບຊີວິດການເປັນ ຢູ່ຂອງປະຊາຊົນ ທີ່ຖືກຜົນກະທົບໃນຄັ້ງນີ້. ໃນໂອກາດລົງເຄື່ອນໄຫວຄັ້ງນີ້, ຄະນະພັກ-ອົງການປົກຄອງ ພ້ອມດ້ວຍຜູ້ ປະກອບການ ມີ ບໍລິສັດເຂື່ອນໄຟຟ້າດອນສະໂຮງ, ເຂດເສດຖະກິດ ມະຫານະທີສີທັນດອນ, ບໍລິສັດ ຄູນຊັບ, ກຸ່ມໂຮງງານປຸງແຕ່ງໄມ້ ແຂວງຈຳປາສັກ, ໂຮງງານອັດຮ່າຍແກ໊ດສີອຳພອນ, ໂຮງງານຕະປູແສງເດືອນກາຊ້າງຄູ່ ແລະ ບໍລິສັດ ສຸກຈະເລີນຟາມ ໄດ້ຮ່ວມຈິດຮ່ວມໃຈກັນ ນໍາເອົາເຄື່ອງ ອຸປະໂພກ-ບໍລິໂພກ ມາຊ່ວຍເຫລືອເບື້ອງຕົ້ນ ເຊັ່ນ: ເຂົ້າສານ, ນ້ຳດື່ມ, ໝີ່, ສັງກະສີ, ຢ່າປົວພະຍາດ ແລະ ຍັງມີປັດໄຈອື່ນໆ ທີ່ຈຳເປັນ, ມູນຄ່າ 500.000.000 ກີບ. ມາມອບໃຫ້ເມືອງ ກໍ່ຄື ພໍ່ແມ່ປະຊາຊົນ ທີ່ຖືກຜົນກະທົບ ຈາກເຫດການດັ່ງກ່າວ.

Off

Comments are closed.