22nd May2021

ຫ້ອງວ່າການສູນກາງພັກ ເປີດຂະບວນການສັກວັກແຊງ ຕ້ານໂຄວິດ-19 ເຂັມທີ 2

by somchan

ໃນວັນ​ທີ 21 ພຶດສະພາ 2021 ທີ່ຫ້ອງ​ວ່າການ​ສູນ​ກາງ​ພັກ ​ໄດ້​​ເປີດ​ຂະ​ບວນການ ສັກ​​ວັກ​ແຊງຕ້ານ​ໂຄ​ວິດ-19 ​ເຂັມ​ທີ 2 ​ໃຫ້​ບັນ​ດາ​ຫົວໜ້າ​ກົມ, ຮອງ​ກົມ, ຫົວໜ້າ​ພະ​ແນ​ກ, ຮອງພະ​ແນ​ກ, ພ້ອມ​ດ້ວຍ​ພະນັກງານ​-ລັດຖະກອນ ພາຍ​ໃນຫ້ອງ​ວ່າການ​ ສູນ​ກາງ​ພັກ ຫລາຍ​ກວ່າ 200 ຄົນ,  ​ໂດຍ​ທີ​ມ​ແພ​ດ ຈາກ​ໂຮງໝໍມິດຕະພາບ 150 ຕຽງ ມາ​ສັກ​ໃຫ້.

ການຈັດ​ຕັ້ງ, ​ສັກ​ວັກ​ແຊງໃນ​ຄັ້ງ​ນີ້, ​ແນ​ໃສ່​ເຮັດ​ໃຫ້ ພະນັກງານ-ລັດຖະກອນ ພາຍ​ໃນ​ຫ້ອງ​ວ່າການ​ສູນ​ກາງ​ພັກ ມີ​ພູມ​ຕ້ານທານ ​ແລະ ປອດ​ໄພຈາກ​ເຊື້ອ​ໂຄ​ວິດ-19, ທັງ​ເປັນ​ການ​ສະກັດ​ກັ້ນ ​ແລະ ຕ້ານການ​ແຜ່​ລະບາດ ​ຂອງ​ພະຍາດ​ໂຄ​ວິ​ດ-19 ຢູ່​ ສປປ ລາວ ​ໃຫ້​ຫລຸດ​ລົງ ​​ແລະ ກັບ​ຄືນ​ສູ່​ສະພາບ​ປົກກະຕິ​ໂດຍ​ໄວ.

ທ່ານ​ ນາງ ທອງ​ສຸກ ດ້ວງ​ເງິນ ຮອງ​ຫົວໜ້າ​ພະ​ແນ​ກສຸກ​ເສີນ ​ໂຮງໝໍ​ມິດຕະພາບ 150 ຕຽງ ​ລາຍ​ງານ​ໃຫ້​ຮູ້​ວ່າ: ວັກ​ແຊງທີ່​ນຳ​ມາ​ສັກ​ໃນ​ຄັ້ງ​ນີ້, ​ແມ່ນ​ຊີ​ໂນ​ຟາ​ມ ​ເຊິ່ງ​ເປັນ​ວັກແຊງທີ່​ມີ​ຄຸ​ນນະພາ​ບ, ​ເປັນ​ວັກແຊງ 1 ​ໃນ 5 ຊະນິດ ທີ່​ອົງການອະນາ​ໄມ​ໂລກ ​​ຮັບຮອງ​ເອົາ​ຄຸນ​ນະພາບ​, ພາຍຫລັງ​ໄດ້​ຮັບ​ວັກ​ແຊງດັ່ງກ່າວແລ້ວ ມັນຈະ​ສ້າງ​ພູມ​ຄຸ້ມ​ກັນ ​ໃຫ້​ແກ່​ຮ່າງກາຍ​ ສາມາດ​ຕໍ່​ສູ້ກັບ​ ພະຍາດ​ໂຄ​ວິດ-19 ​ໄດ້, ​ແຕ່​ຜູ້​ທີ່​ໄດ້​ຮັບ​ວັກ​ແຊງ ​ແມ່ນ​ຍັງ​ມີ​ໂອກາດ​ຕິດ​ເຊື້ອ​ໂຄ​ວິດ-19 ​ໄດ້ ຖ້າ​ບໍ່​ປະຕິບັດ​ມາດ​ຕະການປ້ອງ​ກັນ​ ການ​ຕິດ​ເຊື້ອຢ່າງ​ເຄັ່ງຄັດ. ວັກແຊງ​ຊະ​ນິດ​ນີ້, ພຽງ​ແຕ່​ບັນ​ເທົາ ​ບໍ່​ໃຫ້​ຕິດ​ເຊື້ອ​ຮຸ​ນ​ແຮງ ​ແລະ ບໍ່​ສາມາດ​ແພ່​ເຊື້ອ​​​ ໄປໃຫ້​ຄົນ​ອື່ນ​ໄດ້.

Off

Comments are closed.