27th May2021

ເຈົ້າແຂວງ ໄຊຍະບູລີ ລົງຊຸກຍູ້ການຜະລິດລະດູປີ ເຂດບ້ານ ບົວບານ ເມືອງ ປາກລາຍ

by somchan

ໃນວັນທີ 26 ພຶດສະພາ ນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະູບລີ ພ້ອມຄະນະ ໄດ້ລົງຊຸກຍູ້ການຜະລິດ ເຂດບ້ານ ບົວບານ ເມືອງ ປາກລາຍ, ໃຫ້ການຕ້ອນຮັບໂດຍ ທ່ານ ກອງສີ ວົງສີ ເຈົ້າເມືອງ ປາກລາຍ ແລະ ອໍານາດການປົກຄອງ 11 ບ້ານໃນຂອບເຂດ ບ້ານ ບົວບານ.

 

ໃນໂອກາດນີ້ ທ່ານເຈົ້າແຂວງ ພ້ອມດ້ວຍຄະນະ ໄດ້ຮັບຟັງການລາຍງານການຜະລິດລະດູແລ້ງ ແລະ ການກະກຽມແກ່ການຜະລິດລະດູຝົນຈາກອໍານາດການປົກຄອງແຕ່ລະບ້ານ, ໂດຍລວມແລ້ວການຜະລິດລະດູແລ້ງຢູ່ເຂດບ້ານ ບົວບານແມ່ນເກັບກູ້ຜົນຜະລິດສໍາເລັດແລ້ວ 100%, ເຊິ່ງມີເນື້ອທີ່ທັງໝົດເກືອບ 2,000 ເຮັກຕາໃນນີ້: ເນື້ອທີ່ ນາແຊງ 11,79 ເຮັກຕາ, ຜົນຜະລິດໄດ້ 45,39 ໂຕນ, ເນື້ອທີ່ ປູກພືດຕ່າງ 1.710,74 ເຮັກຕາ, ຜົນຜະລິດໄດ້ 3.686,06 ໂຕນ, ພືດທີ່ປະຊາຊົນປູກສ່ວນຫຼາຍແມ່ນ: ສາລີຫວານ, ຖົ່ວດິນ, ຖົ່ວດໍາ, ຖົ່ວແດງ, ໝາກອື, ໝາກໂມ, ໝາກແຕງ, ເຜືອຫ-ມັນ, ໝາກເຜັດ-ໝາກເຂືອ, ໝາກນໍ້າ, ຜັກບົ່ວ-ຜັກທຽມ ແລະ ອື່ນໆ, ສ່ວນການຜະລິດລະດູປີ-ປີນີ້ມີເນື້ອທີ່ທັງໝົດ 8.000 ກວ່າເຮັກຕາ, ໃນນີ້: ເນື້ອທີ່ນາປີ 883 ເຮັກຕາ, ຕົກກ້າສໍາເລັດແລ້ວ 95%, ເຂົ້າໄຮ່ 33 ເຮັກຕາ ແລະ ພືດຕ່າງໆ 7.090 ເຮັກຕາ, ພືດທີ່ປະຊາຊົນປູກແມ່ນ: ສາລີແຂງ, ປູກແລ້ວ 5%, ມັນຕົ້ນປູກແລ້ວ 80%, ໝາກເດືອຍ 5%, ຖົ່ວດິນ 100%, ໝາກງາຂາວປູກແລ້ວ 5% ແລະ ພືດອື່ນແມ່ນພວມກະກຽມແນວພັນ ແລະ ພື້ນທີ່ປູກ, ສໍາລັບແຮງງານແຕ່ລະບ້ານທີ່ຕົກຄ້າງຢູ່ປະເທດໄທມີທັງໝົດ 697 ຄົນ, ຍິງ 469 ຄົນ, ໃນນັ້ນ: ແຕ່ລະບ້ານແມ່ນໄດ້ເຮັດບົດບັດທຶກກັບຄອບຄົວຂອງຜູ້ທີ່ໄປອອກແຮງງານຢູ່ປະເທດໄທ ໃນໄລຍະນີ້ແມ່ນບໍ່ໃຫ້ກັບບ້ານເທື່ອ, ຖ້າຜູ້ໃດຝ່າຝືນແມ່ນຈະໄດ້ປະຕິບັດຕາມບົດບັນທຶກ, ຈາກນັ້ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ໃຫ້ກຽດໂອລົມຕໍ່ຄະນະພັກ, ອໍານາດການປົກຄອງ 11 ບ້ານເຂດບ້ານ ບົວບານ, ພ້ອມທັງໄດ້ຮຽກຮ້ອງໃຫ້ອໍານາດການປົກຄອງຈົ່ງເອົາໃຈໃສ່ເພີ່ມຄວາມເປັນແບບຢ່າງທີ່ດີໃຫ້ລູກບ້ານ, ເອົາໃຈໃສ່ແກ້ໄຂບັນກາປະກົດການຫຍໍ້ທໍ້ພາຍໃນບ້ານເຊັ່ນ: ບັນຫາການຄ້າ-ຂາຍ ແລະ ເສບຢາບ້າ, ດົມກາວ ແລະ ອື່ນໆ, ສືບຕໍ່ຊຸກຍູ້ປະຊາຊົນໃນການຜະລິດລະດູປີໃຫ້ທ່ວງທັນກັບລະດູການ, ພ້ອມທັງເອົາໃຈໃສ່ເບິ່ງແຍງ, ບົວລະບັດຮັກສາ, ໃສ່ຝຸ່ນ-ໃສ່ປຸຍໃຫ້ຖືກຕາມມາດຕະຖານ, ເອົາໃຈໃສ່ເຝົ້າລະວັງຕໍ່ພະຍາດໄຂ້ຍຸງລາຍ, ການລະບາດຂອງພະຍາດສັດເຊັ່ນ: ອະຫິວາໝູອາຝະລິກາ, ປາກເປື່ອຍລົງເລັດ ແລະ ພະຍາດຜີວໜັງງົວ-ຄວາຍ, ພ້ອມນັ້ນກໍ່ຕ້ອງເອົາໃຈໃສ່ເຝົ້າລະວັງການລະບາດຂອງພະຍາດໂຄວິດ-19 ເປັນຕົ້ນແມ່ນຕິດຕາມ ແລະ ກວດກາ ແຮງງານທີ່ລັກລວບເຂົ້າມາແຕ່ປະເທດເພື່ອນບ້ານຕາມຊ່ອງທາງຕ່າງໆຢ່າງຈິງຈັງ ແລະ ເຂັ້ມງວດໃນການຈັດຕັ້ງປະຕິບັດຄໍາສັ່ງຂອງຂັ້ນເທິງວາງອອກ ເພື່ອພ້ອມກັນປ້ອງກັນ ແລະ ສະກັດກັ້ນບໍ່ໃຫ້ມີພະຍາດດັ່ງກ່າວເກີດຂຶ້ນໃນຂອບເຂດແຕ່ລະບ້ານ.

Off

Comments are closed.