27th May2021

ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດນະຄອນຫຼວງວຽງຈັນ ໄດ້ຮັບເຄື່ອງຊ່ວຍເຫຼືອ ມູນຄ່າ 29 ລ້ານກວ່າກີບ

by somchan

ວັນທີ 26 ພຶດສະພາ 2021  ສະມາຄົມນັກທຸລະກິດແມ່ຍິງຮ່ວມກັບສະມາຄົມນັັກຂ່າວແຫ່ງ ສປປ ລາວ ແລະ ສະມາຄົມຫັດຖະກຳລາວ ໄດ້ມອບເຄື່ອງຊ່ວຍເຫລືອໃຫ້ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດນະຄອນຫຼວງວຽງຈັນ ໂດຍການມອບຂອງ ທ່ານ ນາງ ຈັນເທົາ ປະຖັມມະວົງ ປະທານກິດຕິມະສັກສັງຄົມຫັດຖະກຳ ແລະ ສະມາຄົມນັກທຸລະ ກິດແມ່ຍິງ ແລະ ກ່າວຮັບໂດຍ ພັທ ສີໄພ ໄຊສຸລິຍະວົງສາ ຫົວໜ້າສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ.

ທ່ານ ນາງ ຈັນເທົາ ປະຖັມມະວົງ ໄດ້ກ່າວວ່າ: ຈຸດປະສົງໃນການມອບເຄື່ອງຊ່ວຍເຫຼືອຄັ້ງນີ້ ເພື່ອຊຸກຍູ້ ແລະ ໃຫ້ກຳລັງໃຈແກ່ເຈົ້າໜ້າທີ່ ແລະ ຜູ້ຖືກດັດສ້າງຢູ່ສະຖານທີ່ດັ່ງກ່າວນີ້ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ເຮັດໃຫ້ມີຄວາມຫຍຸ້ງຍາກໃນການສະໜອງເຄື່ອງບໍລິໂພກທີ່ຈຳເປັນ ສະນັ້ນທາງສະມາຄົມ ຈີ່ງໄດ້ນຳເອົາເຄື່ອງປະກອບມີ ເຂົ້າສານ, ໝີ່, ປາກະປ໋ອງ, ນໍ້າດື່ມ ແລະ ອື່ນໆ  ລວມມູນຄ່າ 29 ລ້ານກວ່າກີບ

ໂອກາດນິ້ ພັທ ສີໄພ ໄຊສຸລິຍະວົງສາ ຫົວໜ້າສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ກໍ່ໄດ້ສະແດງຄວາມຂອບໃຈຕໍ່ທາງສະມາຄົມ ທີ່ເຫັນໄດ້ຕໍ່ຄວາມສຳຄັນຂອງວຽກງານ ປກສ ແລະໃຫ້ການຊ່ວຍເຫລືອໃນຄັ້ງນີ້ ເຄື່ອງຈຳນວນດັ່ງກ່າວ ຈະໄດ້ແຍກຢາຍໃຫ້ ພະນັກງານຕະຫລອດຮອດຜູ້ຖືກດັດສ້າງ ໃຫ້ທົ່ວເຖີງ.

Off

Comments are closed.