27th May2021

ໂຄງການກໍ່ສ້າງຂົວຂ້າມນໍ້າລາຍ ບ້ານ ບົວບານ ເມືອງ ປາກລາຍ ສໍາເລັດ 90 ກວ່າ%

by somchan

ໂຄງການກໍ່ສ້າງຂົວຂ້າມນໍ້າລາຍ ເຂດບ້ານ ບົວບານ ເມືອງ ປາກລາຍ ແຂວງ ໄຊຍະບູລີ ຮອດປະຈຸບັນແມ່ນສໍາເລັດແລ້ວ 90 ກວ່າ%, ທ່ານ ສົມແພງ ປັນຍາທິລາດ ຫົວໜ້າບໍລິສັດ ປັນຍາທິລາດ ກໍ່ສ້າງຂົວທາງຈໍາກັດ ຜູ້ຮັບເໝົາກໍ່ສ້າງຂົວດັ່ງກ່າວໄດ້ໃຫ້ຮູ້ວ່າ: ໂຄງການກໍ່ສ້າງຂົວຂ້າມນໍ້າລາຍ ເຂດບ້ານ ບົວບານ ເມືອງ ປາກລາຍ ໄດ້ເລີ່ມລົງມືຈັດຕັ້ງປະຕິບັດມາແຕ່ເດືອນ ຕຸລາ 2019 ເປັນຕົ້ນມາ,

ຮອດປະຈຸບັນແມ່ນສໍາເລັດແລ້ວ 90 ກວ່າ%, ຂົວດັ່ງກ່າວເປັນຂົວເບເລ່ ( ຂົວເຫຼັກ ), ກວ້າງ 3,8 ແມັດ  ຍາວ 30,20ແມັດ , ເສົາຂົວ, ຝາປີກ, ຫົວເສົາເປັນເບຕົ່ງເສີມເຫຼັກ, ທາງລົດແລ່ນປູດ້ວຍໄມ້ , ກໍ່ສ້າງທາງເຂົ້າ ສອງສົ້ນຂົວ ກວ້າງ 8 ແມັດ ລວມທັງບ່າທາງ , ມີຮ່ອງລະບາຍນໍ້າ  ຍາວ 300 ແມັດ ໜ້າທາງປູດ້ວຍດິນຫີນ, ສ້ອມແປງທາງເວັ້ນ ກວ້າງ 5 ແມັດ  ຍາວ 250 ແມັດ ປູດິນຫີນ, ລວມມູນຄ່າການກໍ່ສ້າງທັງໝົດເກືອບ 5 ຕື້ກີບ, ໂດຍແມ່ນທຶນຂອງປະຊາຊົນສົມທົບກັບທຶນຂອງລັດ, ຄາດວ່າການກໍ່ສ້າງຈະໃຫ້ສໍາເລັດ ແລະ ນຳໃຊ້ໃນທ້າຍ ເດືອນ ມິຖຸນາ 2021 ນີ້.

 

 

ໃນວັນທີ 26 ພຶດສະພາ ນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ໂຄງການກໍ່ສ້າງຂົວຂ້າມນໍ້າລາຍ ເຂດບ້ານ ບົວບານ ເມືອງ ປາກລາຍ, ໂດຍມີ ທ່ານ ກອງສີ ວົງສີ ເຈົ້າເມືອງໆປາກລາຍ, ທ່ານ ສົມແພງ ປັນຍາທິລາດ ຫົວໜ້າບໍລິສັດ ປັນຍາທິລາດ ກໍ່ສ້າງຂົວທາງຈໍາກັດ ແລະ ອໍານາດການປົກຄອງບ້ານ ບົວບານ ໃຫ້ການຕ້ອນຮັບ, ໂອກາດດັ່ງກ່າວ ທ່ານເຈົ້າແຂວງກໍ່ໄດ້ຮຽກຮ້ອງໃຫ້ບໍລິສັດຜູ້ຮັບເໝົາກໍ່ສ້າງຈົ່ງເລັ່ງກໍ່ສ້າງໃຫ້ສໍາເລັດຕາມກໍານົດ ແລະ ໄດ້ເປີດນໍາໃຊ້ຢ່າງເປັນທາງການກ່ອນນໍ້າຈະນອງ, ທັງນີ້ກໍ່ເພື່ອເຮັດໃຫ້ການສັນຈອນໄປ-ມາ, ການຂົນສົ່ງສິນຄ້າ, ຂົນສົ່ງຜົນຜະລິດກະສິກໍາຂອງປະຊາຊົນທີ່ຢູ່ສອງຟາກຝັ່ງຂອງແມ່ນໍ້າລາຍໃຫ້ມີຄວາມສະດວກ ແລະ ປອດໄພ.

Off

Comments are closed.