27th May2021

ເຈົ້າແຂວງວຽງຈັນ ລົງຊີ້ນຳ ແລະ ຊຸກຍູ້ວຽກງານຮອບດ້ານ ຢູ່ເມືອງທຸລະຄົມ

by somchan

ໃນວັນທີ 25 ພຶດສະພາ 2021 ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ໄດ້ລົງເຄື່ອນໄຫວຊີ້ນໍາ ແລະ ຊຸກຍູ້ວຽກງານຮອບດ້ານຢູ່ເມືອງທຸລະຄົມ ແຂວງວຽງຈັນ ໂດຍການຕ້ອນຮັບຂອງທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ ໂອກາດນີ້ທ່ານ ໄດ້ຕາງໜ້າໃຫ້ຄະນະພັກ ຄະນະນໍາຂອງເມືອງ ລາຍງານສະພາບການຈັດຕັ້ງປະຕິບັດວຽກງານ ນັບແຕ່ພາຍຫຼັງສໍາເລັດການດໍາເນີນກອງປະຊຸມໃຫຍ່ສາມຂັ້ນຂອງພັກ ໂດຍສະເພາະແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ VII, ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງວຽງຈັນ ຕິດພັນກັບການຈັດຕັ້ງເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ໄປພ້ອມກັບການຊີ້ນໍາ-ນໍາພາວຽກງານກໍ່ສ້າງຮາກຖານການເມືອງ, ວຽກສາມສ້າງ ແລະ ວຽກງານການປ້ອງກັນ, ຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ໂດຍສະເພາະການສືບຕໍ່ໃນໄລຍະທີ 3 ຕາມຄໍາສັ່ງເລກທີ 15/ນຍ ລົງວັນທີ 21 ເມສາ 2021 ແລະ ວຽກງານສຳຄັນອື່ນໆອີກຈຳນວນໜຶ່ງ ລວມເຖິງວຽກງານລົງກໍ່ສ້າງຮາກາຖານການເມືອງ.

ໃນໂອກາດນີ້ ທ່ານເຈົ້າແຂວງວຽງຈັນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດການຊີ້ນໍາໆພາຂອງຄະນະພັກ, ອົງການປົກຄອງເມືອງທຸລະຄົມ ຮ່ວມກັບປະຊາຊົນບັນດາເຜົ່າທີ່ສາມາດຍາດໄດ້ຜົນງານໃໝ່ເປັນຮູບປະທໍາຫຼາຍດ້ານ ຊຶ່ງຕະຫຼອດໄລຍະຜ່ານມາການນໍາຂອງແຂວງວຽງຈັນ ກໍຮັບຮູ້ດີ ແລະ ເຫັນໄດ້ເຖິງຜົນສໍາເລັດວຽກງານອັນພົ້ນເດັ່ນໃນແຕ່ລະດ້ານຂອງເມືອງທຸລະຄົມ, ເນື່ອງຈາກເມືອງທຸລະຄົມມີທ່າແຮງບົ່ມຊ້ອນບໍ່ໜ້ອຍຖ້າທຽບໃສ່ເມືອງອື່ນໆ, ແຕ່ເຖິງແນວໃດກໍຕາມຖ້າອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນສະເພາະໜ້າ ແລະ ຍາວນານນັ້ນ ບັນດາສະຫາຍຄະນະພັກ, ຄະນະນໍາຂອງເມືອງ ຕ້ອງສືບຕໍ່ຍົກລະດັບຂີດຄວາມສາມາດຊີ້ນໍາ-ນໍາພາວຽກງານຮອບດ້ານຕື່ມອີກ ເປັນຕົ້ນການສ້າງຄວາມເຂັ້ມແຂງ, ຄວາມເປັນແບບເປັນຢ່າງຂອງພະນັກງານການນໍາ, ພະນັກງານຄຸ້ມຄອງນໍາພາ, ການສ້າງພະນັກງານໃຫ້ໄດ້ສາມຮຸ່ນ, ສາມປະເພດ ທີ່ຜ່ານຈາກການທົດສອບວຽກງານຕົວຈິງ; ຍົກສູງຫົວຄິດປະດິດສ້າງດ້ານວິຊາສະເພາະຕິດພັນກັບການນໍາໃຊ້ເຕັກນິກວິຊາການ ແລະ ວິທະຍາສາດເຂົ້າຊ່ວຍເພື່ອຍູ້ແຮງກໍາລັງການຜະລິດຂອງປະຊາຊົນ; ສົ່ງເສີມການຜະລິດເປັນສິນຄ້າໃຫ້ມີຫຼາກຫຼາຍ, ເຮັດໃຫ້ມີສະບຽງອາຫານບໍລິໂພກພຽງພໍ ແລະ ຂາຍເປັນສິນຄ້າ, ຕ້ອງເຮັດແທ້ທໍາຈິງ; ສ້າງຄວາມເຊື່

ອໝັ້ນໃນໝູ່ມະຫາຊົນຂອງພັກ ແລະ ໃກ້ຊິດຕິດແທດຊ່ວຍເຫຼືອປະຊາຊົນ ຈຶ່ງຈະເຮັດໃຫ້ບັນດາມະຕິກອງປະຊຸມ ກໍຄືແຜນຈຸດສຸມທີ່ວາງໄວ້ບັນລຸຜົນສໍາເລັດຕາມລະດັບຄາດໝາຍ.
ຈາກນັ້ນ, ທ່ານເຈົ້າແຂວງວຽງຈັນ ຍັງໄດ້ລົງຢ້ຽມຢາມໃຫ້ກໍາລັງໃຈອ້າຍນ້ອງປ້ອງກັນຢູ່ຕາມຈຸດກວດກາຂອງບ້ານຈໍານວນໜຶ່ງ ແລະ ໄປຊຸກຍູ້ວຽກງານລ້ຽງສັດ, ການປູກຜັກສະອາດຢູ່ຟາມນໍ້າເພັດ ບ້ານຕານປ່ຽວ ແລະ ຟາມປູກໝາກແຕງຫວານ ຢູ່ບ້ານໄຮຢ່ອນ ຕື່ມອີກ.

Off

Comments are closed.