27th May2021

ຫົວຫນ້າຄະນະສະເພາະກິດ ແຂວງບໍ່ແກ້ວ ຕິດຕາມການປະຕິບັດມາດຕະການປ້ອງກັນໂຄວິດ-19 ຫລັງເປີດຕະຫລາດຄືນ

by somchan

ໃນວັນທີ 26 ພຶດສະພາ 2021, ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ, ຫົວໜ້າຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ພ້ອມດ້ວຍບັນດາຮອງພະແນກ ແລະ ພະນັກງານວິຊາການ ຂະແໜງພາຍໃນ ພະແນກອຸດສາຫະກຳ ແລະ ການຄ້າແຂວງ ໄດ້ລົງຕິດຕາມຊຸກຍູ້ ບັນດາຜູ້ປະກອບການຕະຫລາດຂາຍເຄື່ອງ ແລະ ຕະຫລາດສົດຂາຍພືດຜັກ ຢູ່ຕະຫລາດສາຍມະນີ, ຕະຫລາດວັງວີວ ແລະ ຕະ ຫລາດສີດອນມີ ທີ່ເປັນບ່ອນຄ້າຂາຍແລກປ່ຽນສິນຄ້າໃນເທສະບານ ເມືອງຫ້ວຍຊາຍ ທັງນີ້ ກໍເພື່ອຕິດຕາມເບິ່ງການຈັດສັນ ຄວາມເປັນລະບຽບຮຽບຮ້ອຍ ໃນການປະຕິບັດມາດຕະການຂອງຄະນະສະເພາະກິດວາງອອກ ເພື່ອປ້ອງກັນພະຍາດ ໂຄວິດ-19.

ໃນໂອກາດນີ້ ທ່ານ ຄໍາຜະຫຍາ ພົມປັນຍາ ໄດ້ກ່າວວ່າ: ຜ່ານການລົງຕິດຕາມບັນດາຕະຫລາດທັງ 3 ແຫ່ງ ເຫັນວ່າຜູ້ປະກອບການ, ພໍ່ຄ້າຊາວຂາຍ ມີຄວາມຕືນຕົວໃນການປະຕິບັດມາດຕະການ ຂອງຄະນະສະເພາະກິດວາງອອກ ດ້ວຍການການໃສ່ຜ້າອັດປາກ-ອັດດັງ ແລະ ຮັກສາໄລຍະຫ່າງໄດ້ດີສົມຄວນປະມານ 90%, ພ້ອມທັງເນັ້ນໜັກໃຫ້ຄະນະຈັດສັນຕະຫລາດ ຈົ່ງສືບຕໍ່ເປັນເຈົ້າການ ໃນການປະຕິບັດມາດຕະການຢ່າງເຂັ້ມງວດ ໃນການປ້ອງກັນພະຍາດ ໂຄວິດ-19 ບໍ່ໃຫ້ມີການລະບາດອີກຕໍ່ໄປ.

 

Off

Comments are closed.