28th May2021

ປກສ ກຸ່ມສີສະຫວາດ ປິດການສັນຈອນເຂົ້າ-ອອກ ບ້ານສີດໍາດວນ ເຂດພື້ນທີ່ສີແດງຢ່າງເຂັ້ມງວດ

by somchan

ພັທ ຈັນທະລາ ຟອງສີຄໍາ ຫົວໜ້າ ປກສ ກຸ່ມສີສະຫວາດ ກອງບັນຊາການ ປກສ ເມືອງຈັນທະບູລີ ໄດ້ກ່າວວ່າ  ໂດຍອີງຕາມແຈ້ງການຂອງຄະນະສະເພາະກິດ ໄດ້ຖະແຫຼງ ໃນວັນທີ 23 ເມສາ 2021 ຜ່ານມາ ບ້ານສີດໍາດວນ ເມືອງຈັນທະບູລີ ນະຄອນຫຼວງວຽງຈັນ ມີຜູ້ຕິດເຊື້ອພະຍາດໂຄວິດ-19 ຈໍານວນ 12 ຄົນ ຍິງ 3 ຄົນ, ປກສ ກຸ່ມບ້ານ ຈິ່ງໄດ້ສົມທົບກັບ ປກສ ເມືອງຈັນທະບູລີ, ອໍານາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງ ລົງກວດກາ, ກໍານົດຈຸດທີ່ມີຄວາມສ່ຽງ ແລະ ໄດ້ກໍານົດບ້ານສີດໍາດວນ ເປັນບ້ານພື້ນທີ່ສີແດງ ໃນວັນທີ 15 ພຶດສະພາ 2021 ພ້ອມທັງປິດການສັນຈອນເຂົ້າ-ອອກພາຍໃນບ້ານ ເພື່ອສະກັດກັ້ນການແຜ່ລະບາດພະຍາດໂຄວິດ-19 ບໍ່ໃຫ້ແຜ່ລາມເປັນວົງກວ້າງ.

ທ່ານຍັງໃຫ້ຮູ້ອີກວ່າ: ຜ່ານການສໍາຫຼວດ ແລະ ກວດກາຕົວຈິງ ສາມາດກໍານົດຈຸດທີ່ມີຄວາມສ່ຽງ ມີ 8 ຈຸດ: ປິດການເຂົ້າ-ອອກ 3 ຈຸດ ທີ່ມີການຕິດເຊື້ອ ນັບແຕ່ເສັ້ນທາງສາມແຍກໂຮງແຮມນະຄອນສັກ ຫາເຂດບ້ານສີບຸນເຮືອງ ຢູ່ໜ່ວຍ 14 ຫາ ໜ່ວຍ 8 ບ້ານສີດໍາດວນ; ປິດການສັນຈອນ 4 ຈຸດ ປິດຮ່ອມ 2 ດ້ານໜ້າ ຖະໜົນອາຊຽນ, ດ້ານຫຼັງຕິດຖະໜົນສໍານັກງານນາຍົກ; ຮ່ອມ 7, 8 ແລະ 9 ທັງສາມຮ່ອມ ດ້ານໜ້າຕິດຖະໜົນອາຊຽນ ສ່ວນດ້ານຫຼັງຕິດຖະໜົນສີດໍາດວນ-ສີບຸນເຮືອງ ແລະ ເສັ້ນທາງລະຫວ່າງສີບຸນເຮືອງ-ທົ່ງສາງນາງ. ເຊິ່ງມີກໍາລັງ ປກສ ແລະ ພາກສ່ວນກ່ຽວຂ້ອງເຂົ້າປະຈໍາການຄອຍເຫດຕະຫຼອດ 24 ຊົ່ວໂມງ ເພື່ອບໍ່ໃຫ້ປະຊາຊົນເຂົ້າ-ອອກ ພາຍໃນບ້ານ ຍົກເວັ້ນກໍລະນີສຸກເສີນຈໍາເປັນ ຕ້ອງໄດ້ຮັບອະນຸຍາດຈາກເຈົ້າໜ້າທີ່. ຜ່ານການຈັດຕັ້ງປະຕິບັດໄດ້ມີການຊີ້ນໍາ-ນໍາພາຢ່າງໃກ້ຊິດຕິດແທດ ຈາກການນໍາເມືອງ, ຄະນະສະເພາະກິດຂັ້ນເມືອງ, ອໍານາດການປົກຄອງບ້ານ, ອົງການຈັດຕັ້ງທຸກພາກສ່ວນ, ປະຊາຊົນພາຍໃນບ້ານມີຄວາມສາມັກຄີກັນ ໃຫ້ການຮ່ວມມືຕື່ນຕົວເປັນເຈົ້າການປະຕິບັດຄໍາສັ່ງ ການປ້ອງກັນສະກັດ-ສະກັດກັ້ນ ແລະ ຄວບຄຸມ ການແຜ່ລະບາດຂອງພະຍາດໂຄວິດ-19 ແລະ ອຸປະຖໍາວັດຖຸປັດໄຈຕ່າງໆ. ເປັນຕົ້ນແມ່ນ ອຸປະກອນຮັບໃຊ້ເຂົ້າໃນວຽກງານ ສະກັດກັ້ນ ແລະ ຕ້ານພະຍາດໂຄວິດ-19 ບໍ່ທັນສົມຄູ່ກັບຄວາມຮຽກຮ້ອງຕ້ອງການ, ສະຖານທີ່ພັກເຊົາຂອງພະນັກງານປະຈໍາຈຸດ ແລະ ປະຊາຊົນຈໍານວນໜຶ່ງຍັງບໍ່ທັນໃຫ້ຄວາມຮ່ວມມືກັບເຈົ້າໜ້າທີ່ເທົ່າທີ່ຄວນ.

ພ້ອມນີ້ທ່ານຍັງໄດ້ຮຽກຮ້ອງມາຍັງປະຊາຊົນທຸກຄົນ ເວົ້າສະເພາະ ຢູ່ບ້ານສີດໍາດວນ ໃຫ້ເອົາໃຈໃສ່ປະຕິບັດຕາມຄໍາສັ່ງ, ແຈ້ງການຂອງຂັ້ນເທິງວາງອອກ ບໍ່ໃຫ້ພົວພັນກັບຄົນພາຍນອກ ຫຼີກລ່ຽງການຊຸມແຊວ, ງານສັງສັນຕ່າງໆ ເພື່ອເປັນການປ້ອງກັນສະກັດກັ້ນ ແລະ ຕ້ານພະຍາດໂຄວິດ-19 ບໍ່ໃຫ້ແຜ່ລາມເປັນວົງກວ້າງ.

Off

Comments are closed.