28th May2021

ເຈົ້າແຂວງຈຳປາສັກ ພ້ອມຄະນະ ເຄື່ອນໄຫວວຽກງານຢູ່ເມືອງມຸນລະປາໂມກ

by somchan

ໃນວັນທີ 27 ພຶດສະພາ 2021 ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານ ຢູ່ ເມືອງມຸນລະປາໂມກ ໂດຍສະເພາະ ແມ່ນວຽກງານສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID -19 ຕິດພັນກັບການຕິດຕາມຜົນກະ ທົບຈາກໄພພິບັດທຳມະຊາດ ລົມພະຍຸລະດູຮ້ອນພັດເຮືອນປະຊາຊົນ ຢູ່ ເມືອງມຸນລະປາໂມກ. ໂດຍມີ ທ່ານ ພອນເທບ ພົນເສນາ ອາຈານແພດຊ່ຽວຊານອາວຸໂສ ອະດີດປະທານກຳມາທິການ ວັດທະນາທຳສັງຄົມສະພາແຫ່ງຊາດ, ທີ່ປຶກສາພິເສດ ແກ້ໄຂການລະບາດຂອງພະຍາດ COVID -19 ແຂວງຈໍາປາສັກ, ມີການນຳພະແນກການຂອງແຂວງ, ການນຳຂອງເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພິດສະຫົງ ພົມມະວົງສາ ເຈົ້າເມືອງມຸນລະປາໂມກ ໄດ້ລາຍງານສະພາບການຈັດຕັ້ງປະຕິບັດວຽກງານສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ວ່າ: ອົງ ການປົກຄອງເມືອງ ມຸນລະປາໂມກ  ແມ່ນໄດ້ຈັດຕັ້ງປະຕິບັດ ບັນດານິຕິກຳຕ່າງໆ ທີ່ຂັ້ນເທິງວາງອອກແຕ່ລະໄລຍະ ໂດຍອີງໃສ່ພາລະບົດບາດ, ສິດ ແລະ ໜ້າທີ່ ຂອງຄະນະກຳມະການສະກັດກັ້ນ, ຄວບຄຸມ ແລະ ປິ່ນປົວຜູ້ຕິດເຊື້ອພະຍາດ COVID-19 ໃນການກໍານົດມາດຕະການປິ່ນປົວ, ການເກັບຕົວຢ່າງ-ນຳສົ່ງຕົວຢ່າງ ແລະ ການປະສານງານກັບຄະນະກຳມະການສະເພາະກິດຂັ້ນແຂວງ ເພື່ອດຳເນີນມາດຕະການທີ່ຄະນະກຳມະການສະ ເພາະກິດວາງອອກໃນແຕ່ລະໄລຍະໃຫ້ ທ່ວງທັນກັບສະພາບການ. ໄດ້ແຕ່ງຕັ້ງຄະນະກຳມະການສະເພາະກິດຢູ່ຂັ້ນບ້ານ ພ້ອມທັງກຳນົດຈຸດກວດກາຄົນເຂົ້າ-ອອກ ບ້ານສຳເລັດ 36 ບ້ານ ແລະ ກໍານົດຈຸດກວດກາ-ວັດແທກອຸນຫະພູມທີ່ເປັນຂອງເມືອງ ເພື່ອແນໃສ່ຈຳກັດການເດີນທາງ ລະຫວ່າງບ້ານຫາບ້ານ, ເມືອງຫາເມືອງ, ເມືອງຫາແຂວງ. ພ້ອມກັນນັ້ນ, ກໍໄດ້ລາຍງານໃຫ້ຮູ້ ກໍລະນີການເກີດໄພພິບັດ ລົມພະຍຸລະດູຮ້ອນພັດເຮືອນປະຊາຊົນ ຄັ້ງວັນທີ 17 ພຶດສະພາ 2021 ໃນເວລາ 22:30 ໂມງ, ເຮັດໃຫ້ເຮືອນຂອງປະຊາຊົນ ເປ່ເພ ເສຍຫາຍ ຫລາຍຫລັງຢູ່ໃນຈຳນວນ 4 ບ້ານ ຄື: ບ້ານສະພັງເໜືອ, ບ້ານສະພັງໃຕ້, ບ້ານນາຂາມ ແລະ ບ້ານຫ້ວຍຍາງ, ເຊິ່ງມີຈຳນວນຫລັງຄາເຮືອນ ແລະ ໂຮງຮຽນ ເປ່ເພເສຍຫາຍ ທັງໝົດ 172 ຫລັງຄາ, ໃນນັ້ນມີໂຮງຮຽນ 2 ຫລັງ ໄດ້ຮັບຜົນກະທົບໜັກເກີນ 60%, ມີ 5 ຫລັງຄາເຮືອນ ປະເມີນມູນຄ່າເສຍຫາຍ ທັງໝົດປະມານ 1.184.500.000 ກີບ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ມີຄຳເຫັນຊີ້ນຳ ໃນການສືບຕໍ່ຈັດຕັ້ງປະຕິບັດວຽກງານສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ແລະ ພະຍາດທີ່ມາຕາມລະດູການ, ພ້ອມກັນນັ້ນ ອົງການປົກຄອງເມືອງ ຕ້ອງໄດ້ກະກຽມຄວາມພ້ອມໃນການຮັບມື ກັບ ຜົນກະທົບຈາກໄພພິບັດທາງທຳມະຊາດ. ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ເອົາໃຈໃສ່ຊຸກຍູ້ກໍາລັງປ້ອງກັນຊາດ-ປ້ອງກັນຄວາມສະຫງົບ ກຸ່ມບ້ານ, ບ້ານ ເຄື່ອນໄຫວກວດກາລາດຕະເວນ ເພື່ອຕ້ານການແຜ່ລະບາດຂອງພະຍາດໂຄວິດ-19 ຕິດພັນກັບຕ້ານປະກົດການຫຍໍ້ທໍ້ທີ່ເກີດຂຶ້ນໃນທົ່ວສັງຄົມ.

ໃນໂອກາດລົງເຄື່ອນໄຫວຄັ້ງນີ້, ໄດ້ນໍາເອົາອຸປະກອນການແພດ, ເຄື່ອງອຸປະໂພກ-ບໍລິໂພກ ບັນ ເທົາທຸກເຊັ່ນ: ນ້ຳດື່ມ, ໝີ່, ສັງກະສີ ແລະ ເງິນສົດ 170 ລ້ານກີບ. ລວມມູນຄ່າທັງໝົດ 227.800.000 ກີບ ມອບໃຫ້ເມືອງມຸນລະປາໂມກ ເພື່ອຮັບໃຊ້ເຂົ້າໃນວຽກງານດັ່ງກ່າວ. ຈາກນັ້ນ, ທ່ານເຈົ້າແຂວງ ພ້ອມຄະນະ ຍັງໄດ້ລົງຕິດຕາມເບິ່ງສະພາບການ ແລະ ຊີວິດການເປັນຢູ່ຂອງປະຊາຊົນ ທີ່ຖືກຜົນກະທົບຈາກໄພພິບັດໃນຄັ້ງນີ້ ອີກດ້ວຍ.

Off

Comments are closed.