28th May2021

ກວດຄົ້ນເຮືອນເປົ້າໝາຍລາຍໃຫຍ່ ພົບຢາບ້າ 1.000.000 ກວ່າເມັດ ພ້ອມ ແປ້ງຝຸ່ນສີຂາວ 1.000 ກວ່າກິໂລກຼາມ.

by somchan

ໃນວັນທີ 26 ພຶດສະພາ 2021 ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ນໍາກໍາລັງຕໍາຫຼວດວິຊາສະເພາະ ເຂົ້າກວດຄົ້ນເຮືອນເປົ້າໝາຍຄ້າຂາຍຢາເສບຕິດລາຍໃຫຍ່ ຢູ່ບ້ານປ່າສັກ ເມືອງໄຊ ແຂວງອຸດົມໄຊ; ຜ່ານການກວດຄົ້ນພົບເຫັນຢາເສບຕິດປະເພດຢາບ້າ  549 ມັດ ເທົ່າກັບ 1.098.000 ເມັດ ແລະ ແປ້ງຝຸ່ນສີຂາວ  48 ເປົ້າ ນໍ້າໜັກ 1.200 ກິໂລກຼາມ; ຈາກນັ້ນ, ເຈົ້າໜ້າທີ່ຈຶ່ງກັກຕົວເຈົ້າຂອງເຮືອນ ຊື່ ທ້າວ ສົມລີ ຫຼື ຕົວ ອາຍຸ 39 ປີ ດໍາເນີນາການສືບສວນ-ສອບສວນຂະຫຍາຍຜົນຫາກຸ່ມແກ້ງທີ່ພົວພັນຮ່ວມຂະບວນການ ເພື່ອດໍາເນີນຄະດີຕາມກົດໝາຍ.

ເຈົ້າໜ້າທີ່ໄດ້ໃຫ້ຮູ້ວ່າ: ຜ່ານການເຄື່ອນໄຫວຕິດຕາມ ເກັບກໍາຂໍ້ມູນເຫັນວ່າ ທ້າວ ສົມລີ ໄດ້ມີການຄ້າ-ຂາຍຢາເສບຕິດແທ້, ມາຮອດວັນທີ 26 ພຶດສະພາ 2021 ເຈົ້າໜ້າຈິ່ງນໍາກໍາລັງເຂົ້າກວດຄົ້ນເຮືອນຜູ້ກ່ຽວ ພົບເຫັນຢາເສບຕິດ, ວັດຖຸເຄມີເພື່ອຜະລິດຢາເສບຕິດ ແລະ ເຄື່ອງຂອງກາງ ມີປືນສັ້ນ 9 ມມ 1 ກະບອກ ພ້ອມລູກກະສູນ 25 ລູກ,  ໝື້ໝາກຟ້າ 5 ຫຼອດ ນ້ໍາຫນັກ 1 ໂລກຼາມ,  ເງິນບາດ 1.339.000 ບາດ, ເງິນກີບ 90.000.000 ກີບ, ສາຍແຂນສີເຫຼືອງຄ້າຍຄືຄໍາ ຈໍານວນ 1 ເສັ້ນ ນ້ໍາໜັກ 149,4 ກຼາມ, ແຫວນສີເຫຼືອງຄ້າຍຄືຄໍາ ຈໍານວນ 1 ວົງ ນໍ້າຫນັກ 29, 6 ກຼາມ, ໃບຕາດິນ ຈໍານວນ 4 ໃບ,  ປື້ມບັນຊີເງິນຝາກທະນາຄານ 4 ຫົວ, ໂທລະສັບມືຖື 1 ໜ່ວຍ, ລົດກະບະລີໂວ້ ສີຂາວ ທະບຽນ ຣຫ 5689 ກໍາແພງນະຄອນ 1 ຄັນ ແລະ ລົດປາຣາໂດ ສີຂາວມຸກ ທະບຽນ ວຣ 6789 ກໍາແພງນະຄອນ.

ຜ່ານການສອບສວນຂອງເຈົ້າໜ້າທີ່ໃນເບື້ອງຕົ້ນ ທ້າວ ສົມລີ ຫຼື ຕົວ ໄດ້ຮັບສາລະພາບວ່າ: ຢາບ້າ, ແປ້ງຝຸ່ນສີຂາວ ແລະ ອາວຸດເສິກ(ປືນສັ້ນ) ແລະ ເຄື່ອງຂອງກາງ ຈໍານວນດັ່ງກ່າວ ເປັນຂອງຜູ້ກ່ຽວແທ້; ໂດຍຮັບຊື້ມາຈາກຜູ້ຮ່ວມຂະບວນການນໍາກັນ ເຊີ່ງໄດ້ນໍາໃຊ້ລົດກະບະຣີໂວສິຂາວທະບຽນ ຣຫ 5689 ກໍາແພງນະຄອນ ເປັນພາຫະນະໃນການເຄື່ອນໄຫວຄ້າ-ຂາຍ ແລະ ເຄື່ອນຍ້າຍຢາເສບຕິດ ໄປຊຸກເຊື່ອງໄວ້ຢູ່ເຮືອນ ເພື່ອກະກຽມຈະເອົາອອກຈໍາໜ່າຍ ແລະ ສົ່ງຕໍ່ໄປໃຫ້ຜູ້ຮ່ວມຂະບວນການທີ່ຢູ່ຕ່າງແຂວງ ທີ່ສັ່ງຊື້ໄວ້ກ່ອນໜ້ານີ້; ໃນຂະນະທີ່ກໍາລັງຈະເດີນທາງອອກໄປສົ່ງໃຫ້ຜູ້ສັ່ງຊື່ ເຈົ້າໜ້າທີ່ຕໍາຫຼວດເຂົ້າກວດຄົ້ນກ່ອນ ພ້ອມຢຶດຢາເສບຕິດ ແລະ ເຄື່ອງຂອງກາງຈໍານວນດັ່ງກ່າວໄວ້.

ຕໍ່ກັບຄະດີດັ່ງກ່າວ ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ຈະສືບຕໍ່ ສືບສວນ-ສອບສວນຂະຫຍາຍຜົນຫາກຸມແກ້ງພັກພວກທີ່ຮ່ວມຂະບວນການ ເພື່ອນໍາຕົວມາດໍາເນີນຄະດີຕາມກົດ ໝາຍຕໍ່ໄປ.

Off

Comments are closed.