29th May2021

ການນໍາ ເມືອງໄຊທານີ ລົງຊຸກຍູ້, ຊີ້ນໍາວຽກງານ ຢູ່ຈຸດຕັ້ງດ່ານກວດຄັດກອງຄົນເຂົ້າ-ອອກເມືອງ

by somchan

ໃນວັນທີ 27 ພຶດສະພາ 2021, ທ່ານ ຄໍາປະດິດ ເຂັມມະນິດ ເຈົ້າເມືອງໄຊທານີ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງຊຸກຍູ້ ແລະ ມອບເຄື່ອງບໍລິໂພກ ປະເພດ ນໍ້າດື່ມ, ປາປ໋ອງ ແລະ ໝີ່ຈໍານວນໜຶ່ງ ຢູ່ບັນດາຈຸດຕັ້ງດ່ານກວດຄັດກອງຄົນເຂົ້າ-ອອກຕາມເຂດແດນ ເມືອງໄຊທານີ.

ທ່ານ ຄໍາປະດິດ ເຂັມມະນິດ ໄດ້ກ່າວວ່າ: ການນໍາເອົາເຄື່ອງບໍລິໂພກ ລົງຊຸກຍູ້ໃຫ້ບັນດາຈຸດຕັ້ງດ່ານກວດຄັດກອງຄົນເຂົ້າ-ອອກຕາມເຂດແດນ ເຊື່ອມຕໍ່ລະຫວ່າງເມືອງຕໍ່ເມືອງ, ເມືອງຕໍ່ແຂວງ ໃນຄັ້ງນີ້ ເພື່ອຕອບສະໜອງເຄື່ອງຮັບໃຊ້ທີ່ຈໍາເປັນ ໃຫ້ບັນດານາຍ ແລະ ພົນຕໍາຫຼວດ ທີ່ກໍາລັງເຮັດວຽກງານປ້ອງກັນຄວາມສະຫງົບ ຕາມຈຸດຕ່າງໆ; ນອກນັ້ນ, ທ່ານຍັງໄດ້ເນັ້ນໃຫ້ນາຍ ແລະ ພົນຕໍາຫຼວດ ຈົ່ງເພີ່ມທະວີເອົາໃຈໃສ່ກວດກາການເຂົ້າ-ອອກຂອງປະຊາຊົນ ໃຫ້ລະອຽດຢ່າງເຂັ້ມງວດ  ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ອອກສູ່ວົງກວ້າງ.

ໃນໂອກາດນີ້, ທ່ານຍັງໄດ້ກ່າວຍ້ອງຍໍຊົມເຊີຍຕໍ່ກໍາລັງເຈົ້າໜ້າທີ່ທຸກພາກສ່ວນ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານຕາມການມອບໝາຍຢ່າງເຂັ້ມງວດ, ພ້ອມທັງອວຍພອນໃຫ້ທຸກທ່ານຈົ່ງເອົາໃຈໃສ່ຮັກສາສຸຂະພາບຂອງຕົນເອງໃຫ້ແຂງແຮງ ເພື່ອເຮັດໜ້າທີ່ປ້ອງກັນ, ຄວບຄຸມ ໃຫ້ພະຍາດຮ້າຍນີ້ໝົດໄປຈາກເມືອງໄຊທາໄຊໂດຍໄວ.

Off

Comments are closed.