30th May2021

ກອງບັນຊາການ ປກສ ນະຄອນຫຼວງວຽງຈັນ ຮັບເຄື່ອງຊ່ວຍເຫຼືອ ຄອມພີວເຕີ້ 9 ຊຸດ

by somchan

ໃນວັນທີ 28 ພຶດສະພາ 2021, ຢູ່ຫ້ອງປະຊຸມ ກອງບັນຊາການ ປກສ ນະຄອນຫຼວງວຽງຈັນ ທ່ານ ບຸນມີ ສີລິແສງ ຕາງໜ້າໃຫ້ ບໍລິສັດ ລັດຕະນະ ຈໍາກັດຜູ້ດຽວ ແລະ ໂຮງງານເຟີນີເຈີ ບຸນມີ ສີລິແສງ ມອບຄອມພີວເຕີ້ ໂນດບຸກ ຈໍານວນ 9 ຊຸດ, ລວມມູນຄ່າ 23.391.000 ກີບ ໃຫ້ກອງບັນຊາການ ປກສ ນະຄອນຫຼວງວຽງຈັນ ຕາງໜ້າກ່າວຮັບໂດຍ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ພ້ອມດ້ວຍຄະນະ.

ທ່ານ ບຸນມີ ສີລິແສງ ໄດ້ກ່າວວ່າ: ການມອບຄອມພີວເຕີ້ ໂນດບຸກ ໃຫ້ກອງບັນຊາການ ປກສ ນະຄອນຫຼວງວຽງຈັນ ຄັ້ງນີ້, ເພື່ອເປັນການປະກອບສ່ວນ, ຊຸກຍູ້ ໃຫ້ກໍາລັງ ປກສ ນະຄອນຫຼວງວຽງຈັນ ຮັບໃຊ້ເຂົ້າໃນວຽກງານປ້ອງກັນຄວາມສະຫງົບ ແລະ ກອງປະຊຸມຜ່ານລະບົບວີດີໂອທາງໄກ ( Video Conference ) ໃນໄລຍະປ້ອງກັນການແຜ່ລະບາດຂອງພະຍາດໂຄວິດ 19.

ໂອກາດດຽວກັນນີ້, ພັອ ສຸກພະຈັນ ບຸດດາຄຳ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ສະແດງຄວາມຂອບໃຈ ທັງ 2 ພາກສ່ວນ ທີ່ເຫັນໄດ້ຄວາມໝາຍ, ຄວາມສໍາຄັນຕໍ່ກັບວຽກງານຮັກສາຄວາມສະຫງົບ-ຄວາມເປັນລະບຽບຮຽບຮ້ອຍທາງສັງຄົມ ແລະ ຈະນຳໃຊ້ອຸປະກອນຈຳນວນດັ່ງກ່າວ ເຂົ້າໃນການປັບປຸງລະບົບການສື່ສານຢູ່ບັນດາ ປກສ ກຸ່ມບ້ານ ແລະ ສູນ 1191 ໃນຈຳນວນ 79 ຈຸດ ໃຫ້ມີຄວາມສະດວກວ່ອງໄວຫຼາຍຂຶ້ນ, ທັງເປັນການການພັດທະນາລະບົບກອງປະຊຸມທາງໄກ ໃນການຫັນການບໍລິການສັງຄົມ ແລະ ບໍລິຫານວຽກງານຢູ່ ນະຄອນຫຼວງວຽງຈັນ ກ້າວໄປສູ່ຄວາມທັນສະໄໝ, ນອກນັ້ນ ຍັງຈະຊ່ວຍປະຢັດຄ່າໃຊ້ຈ່າຍການເດີນທາງ, ເວລາໃນການເຮັດວຽກງານໄດ້ຢ່າງຫຼວງຫຼາຍ, ພ້ອມນີ້ ທ່ານໄດ້ອວຍພອນໄຊໃຫ້ 2 ພາກສ່ວນ ທີ່ໃຫ້ການຊ່ວຍເຫຼືອຕະຫຼອດຮອດພະນັກງານທຸກຄົນ ຈົ່ງມີສຸຂະພາບແຂງແຮງ ປະສົບຜົນສຳເລັດໃນໜ້າທີ່ການງານ ແລະ ກໍໄດ້ມອບໃບຍ້ອງຍໍໃຫ້ ບໍລິສັດ ລັດຕະນະ ຈໍາກັດຜູ້ດຽວ ແລະ ໂຮງງານເຟີນີເຈີ ບຸນມີ ສີລິແສງ ເພື່ອສະແດງຄວາມຄວາມຮູ້ບຸນຄຸນ ແລະ ເປັນການຢັ້ງຢືນຄຸນງາມຄວາມດີທີ່ໄດ້ປະກອບສ່ວນເຂົ້າໃນວຽກງານປ້ອງກັນຄວາມສະຫງົບໃນຄັ້ງນີ້.

 

Off

Comments are closed.