31st May2021

ກອງບັນຊາການ ປກສ ເມືອງສີສັດຕະນາກ ເຂັ້ມງວດຕໍ່ບັນດາ ຫ້າງຮ້ານ ທີ່ບໍ່ປະຕິບັດຕາມແຈ້ງການ ເລກທີ 02/ຈນວ

by somchan

ວັນທີ 29 ພຶດສະພາ 2021, ກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ ນໍາໂດຍ ພັທ ສຸບັນໄຊ ບຸນມະວົງ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງສີສັດຕະນາກ ໄດ້ສົມທົບກັບ ປກສ ກຸ່ມ ທາດຂາວ ແລະ ອຳນາດການປົກຄອງບ້ານທາດຂາວ ລົງກວດກາລາດຕະເວນ ແລະ ເອົາໃຈໃສ່ຕິດຕາມບັນດາຫ້າງຮ້ານ ທີ່ບໍ່ປະຕິບັດຕາມແຈ້ງການຂອງເຈົ້າຄອງນະຄອນຫຼວງວຽງຈັນ ເລກທີ 02/ຈນວ ກ່ຽວກັບການຈັດຕັງປະຕິບັດມາດຕະການປ້ອງກັນການແຜລະບາດຂອງພະຍາດໂຄວິດ-19.

ໃນຂະນະທີ່ກວດກາລາດຕະເວນ ພົບເຫັນຮ້ານຂາຍເຂົ້າປຽກ 1 ຮ້ານ ຢູ່ເຂດບ້ານທາດຂາວ ເມືອງສີສັດຕະນາກ ເປີດໃຫ້ບໍລິການຂາຍເກີນເວລາທີ່ກໍານົດໄວ້ ທາງເຈົ້າໜ້າທີ່ຈຶ່ງໄດ້ສຶກສາອົບຮົມກ່າວເຕືອນ ແລະ ເຮັດບົດບັນທຶກໄວ້, ພ້ອມດຽວກັນກໍ່ໄດ້ອະທິບາຍ ໃຫ້ເຈົ້າຂອງຮ້ານເຂົ້າໃຈຕໍ່ໄພອັນຕະລາຍຂອງພະຍາດໂຄວິດ-19 ແລະ ແນະນໍາໃຫ້ປະຕິບັດແຈ້ງການ ເລກທີ 02/ຈນວ ທີ່ລະບຸໄວ້ໃນຂໍ້ 1.3 ແລະ ຂໍ້ 2 ທີ່ກໍານົດໄວ້ວ່າ: ສະຖານທີ່ທີ່ໄດ້ຮັບອະນຸຍາດ ໃຫ້ດໍາເນີນກິດຈະການ ເຊັ່ນ: ຕະຫຼາດ, ຮ້ານຄ້າ, ສູນການຄ້າ, ຫ້າງຊັບພະສິນຄ້າໃນເຂດທົ່ວໄປ ໃຫ້ປິດບໍ່ກາຍ 22:00 ໂມງ ແລະ ໃນເຂດແດງ ໃຫ້ປິດບໍ່ກາຍ 20:00 ໂມງ ແລະ ຂໍ້ 3 ກໍານົດວ່າ: ຮ້ານອາຫານ ແລະ ຮ້ານກາເຟ ໃຫ້ບໍລິການໃນຮູບແບບຊື້ກັບເຮືອນ, ບໍ່ໃຫ້ລູກຄ້ານັ່ງກິນຢູ່ຮ້ານ.

ເຈົ້າໜ້າທີ່ ປກສ ເມືອງສີສັດຕະນາກ ຍັງໄດ້ຮຽກຮ້ອງ ໃຫ້ຜູ້ປະກອບການ ຈົ່ງພ້ອມກັນຈັດຕັ້ງປະຕິບັດຕາມແຈ້ງການ, ເພື່ອເປັນການປ້ອງກັນການແຜ່ລະບາດຂອງພະຍາດໂຄວິດ-19, ແລະ ຮ່ວມແຮງຮ່ວມໃຈກັນ ເພື່ອກຳຈັດຮັດແຄບການແຜ່ລະບາດຂອງພະຍາດໃຫ້ຫຼຸດລົງ ເພື່ອໃຫ້ການດຳລົງຊີວິດຂອງພໍ່ແມ່ປະຊາຊົນ ກັບຄືນສູ່ສະພາວະປົກກະຕິ.

 

Off

Comments are closed.